MARK 15

Pilate atüvü nüh Jisu sie ashi küsa

(Mat 27.1-2,11-14; Luk 23.1-5; Jhn 18.28-38)

1Jütisanü thoru ünü levü küjiri nüh kükhruori thi Wule küsosieri thi kümühu aveh sie kürüchie nü Jisu phete thi masie wa nü Pilate vü tsüküzemü. 2Thinü Pilate nüh ma vü, “Noh tü Judahri Kajiwa wiethuoh ülo?” ti küna. Thinü ma nüh rüle taji ma vü, “Ah, noh nüh küüza kümüjiewiethuoh,” ti küza. 3Jütiküsavü levü küjiri nüh azanyo hozake phrate nü ma müte, thitü ma nüh zanyo küsü nga rüle mari mütsü. 4Thinü Pilate nüh ma küna taji nü, “Noh tü zanyoküsü nga rületsü nti samüvehwiethuoh ülo? Halie, mari nüh zanyoküzakele phrate nü no müteveh lo?” ti küza. 5Thitü Jisu tü zanyo küsü nga rüle mütsüwie, jükenüh Pilate tü ngoshe.

Jisu zekemuo üta azhü tsükümü

(Mat 27.15-26; Luk 23.13-25; Jhn 18.39—19.16)

6Thi akhu jula mari nüh küsizhe vü küperi thawa khuonaveh nüh Pilate nüh küshushuti. 7Jütiküsa tsothovü Barabas ti küsa sorkari münongü nüh sataji nü anyiri fethekümü küsü nyuri sie küsi sapeveh. 8Thinü anyi riekhuowa nüh ma nüh khanavü mowa wule vünüh sarü nüh jükümjie vünüh mari vü sa tsü üti ma vü khuo. 9Jütiküsavü Pilate nüh mari vü, “Hi nüh Judahri Kajiwa vi nohri vü küütsü nthe ünü nyu lo?” ti küna. 10Küpakenühnyunü levü küjiri tü ma noküüjizhi kenüh ma virü ma kevü küthse küthsü kenüh. 11Thitü ma nüh Barabas vi mari küütsü na küsa kenüh levü küjiri nüh anyi riekhuowa küchü. 12Thinü Pilate nüh mari vü shele, “Thinü hitü nohri nüh Judahri Kajiwa ta küsawatü vi mowa sa üti lo?” ti küna. 13Thinü mari tü ziele nü, “Ma zekemüluo,” ti küza. 14Thinü Pilate nüh mari vü, “Mokenüh lo? Ma tü kümüsü mowa samülo?” ti küna. Thitü mari tü kümüsütsa zie kürügi she taji nü, “Ma zekemü luo,” ti küza. 15Jüti sataji nü Pilate tü anyiri külo sangü taji nü Barabas vi mari tsümü. Jütisanü ma nüh alikümülah nüh vi Jisu fetsü nü zekemü üti vi mari vü tsümü.

Arienyiri nüh Jisü vi kümürümüle

(Mat 27.27-31; Jhn 19.2-3)

16Thinü arienyiri nüh ma sie müzazhe nyula vü wa nü arienyiri refü aveh jiru küsehzhu khe. 17Jütisanü mari nüh athsü küsüma küsü vi ma kümüphie, thi arüzhünüh mükie taji nü kaji lüwe kümüjie küsa küsü sah nü ma lü rügivü thse. 18Thi mari nüh, “Judahri kajiwa, halie salam ti sanü ma khurü. 19Thinü mari nüh amühshüh küsü vi ma lü fe tsü, thi ma vü amütsemüshüke nü khotsütsuo ma khurü. 20Jütisanü mari nüh ma vi mürümüle kümü sevü, ma vünüh rüwuomo athsüküsümowa phremütü nü ma thsümünyi vi küvü le taji zekemüluo nti sietewa.

Jisu zekekümü

(Mat 27.32-44; Luk 23.26-43; Jhn 19.17-27)

21 # Rom 16.13. Thinü Simon Sirenri küsü Alexander apa thi Rufas masü anyu vünüh tse ünü wurie taji ma khieluothso küükha. 22Jütisanü mari nüh Jisu sie Golgotha, mazhünyo, alürü azhie ti küsa vü wa. 23Thinü mari nüh akhah thi thsokhaju sarü nü vi ma küzhu thitü ma nüh müzhu nti sa. 24#Krh 22.18.Jütisanü mari tü ma zekekümüsevü, thari nüh küzake küvile nüh ti aküze sanü ma thsümünyi küsuo. 25Thi münühu küche vü mari ma vi khieluothso vünüh zekemü. 26Thinü ma lü rügi vü “JUDAHRI KAJIWA” ti ma phraküümüsü zhünyo vünüh rhüke mütü. 27Thi rühukütsari künyi: küsü ma zhiewuovü thi küsü ma zhu wuovü ti zeke. 28Zhütsazhü wa juna küsa kenüh hakümjie ma vi awule küphrürie vü chiekemütü. 29#Krh 22.7; 109.25; Mrk 14.58; Jhn 2.19.Jütiküsavü ale jüla kütsuokükhru küsari nüh ma rünyie thi mari alü küngo nü, “O, noh nazizheh zoriemü taji nü rülo kücheazhie vünüh küsalewa tü, 30Noh mpa noh külole taji khieluothso vünüh teturuluo mo,” ti küza. 31Jükümjie levü küjiri nga Khonyo Küsosieri sie ma rie sataji nü, “Ma tü küpari nü küloleraveh, thitü ma mpa ma nü mükülolera. 32Hiri nga ngu taji nü tsotü na küsa kenüh Israel kajiwa Khrista tü khieluothso vünüh küütüruluo,” ti haluo pe. Thi ma sie khieluothso vünüh küzeke künyi nga ma vü azhükümüsü phrate.

Jisu sükümü

(Mat 27.45-56; Luk 23.44-46; Jhn 19.28-30)

33Jütiküsavü münühu türo vünüh wa tügu küju azhi jüla aveh vü zosheke pe. 34#Krh 22.1.Thinü münühu tügu vü Jisu tü zie kürügi she taji, “Eloi, Eloi, lama Sabakthani,” mazhünyo thuoüji nü, “Eh Saküüwuowa, eh Saküüwuowa, Noh mokenüh hi jamüthuoh lo?” ti phrate. 35Jütiküsavü jüla küpe anyi wuori nüh jü thsütaji nü, “Halie, matü Elijah jivehthuoh,” ti sa. 36#Krh 69.21. Thinü nyi küsü nüh zhüwa achieshu vi rheliviju lovü tehke tajinü viru amüshüh küsü lovü shoke nü ma küzhu taji nü, “Pelachi, Elijah turu nü ma vi azhih vü teru na ünü nyunüh nonoluo,” ti küza. 37Thinü Jisu tü azhü rügi vünüh zie taji nü ma sietse jaküzemü. 38#Tse 26.31-33.Jütiküsavü Kükhurüizhe vü athsü thuohteküsawa alü vünüh ajih küjukükri künyi sanü kritewa. 39Thinü ma nüh azhü zie taji ma sietse küzekümü arienyiri müzake anyia nüh küjiwa ma tüvü tsie taji nü peküvehwa nüh ngu taji, “Anyi hamaha Saküüwuowa Atsa tsahwiethuoh,” ti küza.

40 # Luk 8.2,3. Thi jütisapeküvehvü nyimzari küriekhuo küsü nga kületsuo vünüh nopeveh: jümari azhie nüh Magdalene Maria thi Jems kürünguowa thi Joses masü aza Mari avühwa thi Salomi nga tsiepeveh. 41Jümaritü ma Galilee vü küpevü ma senyi taji nü ma küchekütsüsa, hamari mpa mükünyu ma sie Jerusalem vü kükhru nyimzari hozake nga tsie peveh.

Jisu küchowu

(Mat 27.57-61; Luk 23.50-56; Jhn 19.38-42)

42Jütiküsavü münüle ru ünü, zanyoküüche rülo sakümüthuoh kenüh, mazhünyo Judahri kümünyierülo sabbath ti küjiwa rülo atüvü sakümükethuoh kenüh, 43Saküüwuowa kükaji küru huo peküveh ma nyo Josef ti küsa Arimatheari zanyoküthsü küsieke küvüri küsü mükrüwiethuoh nüh aluoveh jisheke nü Pilate vü ru nü Jisu kümo khuo. 44Thinü Pilate tü ngo nü, ma küsie vünüh sümüthuoh nüh thsüna küsakenüh küna nti arienyiri müzake nyia nüh küjiwa ji. 45Thinü ma tü müzake nyia nüh küjiwa vünüh thsüra nü Jisu kümo vi Josef tsümü. 46Thi Josef nüh linen thsü kümühie küsü sünü Jisu kümo vituru jülovü thse nü küzhu nü viwa alohphieke nü arüku saküsa lovü thse taji aloh küsü küprirü arükuwa sotemü. 47Thinü Magdalene Maria thi Joses aza Maria masü nüh ma viwa küthsepe ngu.

Currently Selected:

MARK 15: POCHBSI

Highlight

Copy