MARK 14

Jisu lüvü mükünongü kümüshe

(Mat 26.1-5; Luk 22.1-2; Jhn 11.45-53)

1 # Tse 12.1-27. Rülo künyi sevü tsekükari thi ahzhi müthse nüh alohse kütsa khu kükhuna peveh, jütiküsavü levüri küjiri thi Khonyo küsosieri nüh rie tajinü Jisu re nü fethekümü müshepe. 2Thitü mari mpa jüle tajinü, anyiri thama küüjakünya kenüh akhu rülovü müsatümü üti küza.

Bethani vünüh avüju vi Jisu küüna

(Mat 26.6-13; Jhn 12.1-8)

3 # Luk 7.37,38. Thinü ma Bethani vü wupie künawa Simon zhe vü nüh ashie tsapeküveh vü nyimzari küsü avüju kümhie arhe küüngu amekükhotsawa alabaster mürüku küsü viru nü zokhuo taji nü ma lü rügivü thsetü. 4Thitü anyi wuori nüh arüshu tajinü küphrate, “Mokenüh avüju zorie hati sa veh lo? 5Avüju ha zhu tajinü tuli müza küche anyia vü nga nüh zhu taji vikümükhuori tsürana nü,” ti küza. Jütisanü mari tü nyimzawavü jazhi. 6Thinü Jisu nüh, ma mpa jüti küsamü luo, mokenüh nohri ma saküjakünya veh lo? Ma nüh hi vü zanyo kümühie sa tsümüthüo. 7#Kho 15.11. Küpakenühnyunü kümükhuori thuoüji nohri siepehuoveh, thi nohri tü tsotho muomuovü nga jümari vü zanyo kümühie sangü thuoüji nü saranaveh, thitü hi thuoüji nohri siemüpehuora. 8Ma nüh küsarawa samüwiethuoh, ma nüh Hi küchowu kenüh küütü vünüh avüju vi hi künemthuoh. 9Thi hi nüh nohri vü küzatoke naveh, “Azhih aveh vü khiekhiela zhülekümhiewa phrate naveh nüh nyimza hama müshena küsa kenüh ma nüh saküsawa nga vi küza wie naveh,” ti küza.

Judas nüh Jisu zhukütsa ma müsheküsa

(Mat 26.14-16; Luk 22.3-6)

10Jüsevü Iskariot Judas türakünyiri azhie nüh nyi küsü Jisu re nü levü küjiri vü kütsü müshe nü mari vü wa. 11Thinü mari ju thsü nü lozhe nü raka vi ma tsü nti zhüthuohtsü. Thi mokümjie küsavü ma retsüranaveh nüh ti lekhuji phah.

Jisu nüh ma sehnyiri sie kütseshukari shie kütsa

(Mat 26.17-25; Luk 22.7-14,21-23; Jhn 13.21-30)

12Thinü Ahzhi müthse nüh alohse kütsa khu rülo apowa mari kütseshukari akhu kenüh anyizhü küfethe rülovü ma sehnyiri nüh mavü, “Noh tü hiri küze nü khiela nüh nyihzhü fethe nü kütsakhü küüche kümüshe lo?” ti küna. 13Jüti küünavü ma nüh ma sehnyiri nyi künyi küze tajinü masü vü, nohsü anyuküjiwavü waluo, thi küwavü nosü ajulosüza küsüvikütseri küsü sie mütünaveh nüh, ma se nyi waluo, 14Jütisanü ma khiela tunaveh nüh nosü nga nyi tu tajinü azhe avü anyi kümühiewa vü, Küsosiewa nüh, “Hi tü eh sehnyiri sie kütseshukari khu nyihzhü fethe nü tsana küsa küzerazhe khielapeveh lo? ti künaluo. 15Jütathuoüji ma nüh azhe rügi küshothuoh lovü kücheju kümühieküsa aküji küsü küjo nosü kütsanaveh nüh, thinü nosü jala nüh hiri kenüh küche luo,” ti küza. 16Küüza kümüjie ma sehnyi künyi tü tse anyuküjiwavü ru, thinü ma süvü küüza kümüjie pela nü ngura, jütisanü kütseshukari ashieküche.

17Thinü münüleh ru ünü ma sehnyi ma siepeküvehri toku ri sie taji küche küsape vü ru. 18#Krh 41.9. Jütisanü mari tsapeküveh vü Jisu nüh, “Hi nüh nohri vü küzatokenaveh, nohri hi sietsapeküvehri küsü nüh hi zhutsanaveh,” ti küza. 19Thinü mari tü alorü nü ma vü, hi ülo? hi ülo? ti küna khe. 20Thinü ma nüh mari vü rüle taji, “Ake akhu lovü thse taji hi sie kürüwietsa küveh nyi türakünyiri azhie nüh nyi küsüwiethuoh. 21Küpakenühnyunü anyi Tsawa tü tewanata khanavü ma zhüku rhüküsakenüh; thitü anyi Tsawa re nyuri vü küthsewa thuoüji müzümünathuoh, anyi jümatü müwuotsatsanüh sakümüwa nüh ma kenüh kümphatsawienaveh,” ti küza.

Vüwa kümüshe shie

(Mat 26.26-30; Luk 22.14-20; 1 Kor 11.23-25)

22Thinü mari tsapeküvehvü Jisu nüh alohse vi nü tsiatsü taji zokhuonü marivü küsuotsütaji küüza, “Nohri vi nü tsaluo, hamatü ehsatsawiethuoh,” ti küza. 23Jüsevü ma nüh ahuowa nga vi nü tsiatsü thi küsuo mari vübtsü nü mari aveh jüma zhükheh. 24#Tse 24.8; Jer 31.31-34.Jütisanü ma nüh mari vü, hamatü anyiri hozake kenüh küthü kütsü zhühthuo küsa kürüthe azühwa wiethuoh. 25Hi nüh nohri vü küzatoke naveh, “Hi tü Saküüwuowa kajipe vünüh rhelivijü kürüthe müjie küzhu atüvü nü hi tü rheliviju müzhulerathuoh,” ti küza. 26Jütisanü mari aza küsü riehi mütaji tse Olive küzhiho rügivü tewa.

Pitor nüh Jisu kürüna küsa küütü vünüh phrate kütsü

(Mat 26.31-35; Luk 22.31-34; Jhn 13.36-38)

27 # Zek 13.7. Jüsevü Jisü nüh mari vü, “Sütavü nohri aveh hi jamü tajinü tewakheh naveh, küpakenühnyunü hi nüh nyihzhü kühuowa fethemünaveh thi anyihzhüri tü vorie tekhehwa naveh ta rhüküsa kenüh. 28Thitü jümasevü thuoüji hi tü rhosürale taji nohri atü vünüh Galilee vü tewa lanathuoh,” ti küza. 29Thitü Pitor nüh ma vü, “Mari aveh nüh noh jamü taji tewawie ketünga hi thuoüji noh küja wanyu,” ti küza. 30Thinü Jisu nüh ma vü, hi nüh noh vü küzatoke naveh, “Sütavü awi künyi keri müjie kükhu atüvü noh hi müthsü ta küchekeri kerü wienaveh,” ti küza. 31Thitü ma tü wurie küza kümüzho tajinü, “Hi nüh noh sie nü sü üta wie ketünga hi tü noh kürho müphrate nüh küsawanyu wie,” ti küza. Thinü küpari nga jükümjie phrate kheh.

Jisu Gethsemane vünüh kükhuo küsa

(Mat 26.36-46; Luk 22.39-46)

32Jümasevü mari tse Gethsemane ti küsa azhie küsü vü ru nü ma nüh ma sehnyiri vü, “Hi nüh khuope küveh vü nohri hala pela luo,” ti küza. 33Jütisanü ma nüh Pitor thi Jems thi Johan sie ma sevü wa taji ma luoveh na she thi küzho she nü peh. 34Thinü ma nüh mari vü, “Hi tü süna küsa aluovehküna namüthuoh, tinü nohri hala petaji no pe luo,” ti küza. 35Thinü ma nüh pike atüvü tsezhüwa nü azhih vü fephoh kenüh khuo taji, saranavehji nü atsotho watü ma küüthoriemtü üti khuo. 36Jüti küsavü ma nüh, “Abba, eh Pa, noh vü thuoüji azanyo veh saranaveh, hi vünüh ahuo hama vimütüluo, thitü eh müshe nyu nü nomüshe vünüh saluo,” ti küza. 37Jütisamü taji ma ru ünü, mari zeküpela ngu taji ma nüh Pitor vü, “Simon noh tü zeveh lo? noh tü münühu küsü nga huomüperathuoh ülo?” ti küna. 38“Nohri kümüji müra vü mütü nüh sana küsa kenüh nope luo thi khuopeluo; sietse thuoüji nü sangüwieveh thitü asatsa thuoüji küchuveh,” ti küza. 39Jütisanü ma tü tsewale nü shientü küphrate kümüjie phrate nü khuo le. 40Thi ma tü shele marivü ru ünü mari tü zepelata ji ngu, mari notha tü mükora nüh samü thi mari tü ma vü mozhüma rüle tsü nüh sa. 41Thinü ma tü kücheawa shele marivü rü nü, “Khinyi nü ze luo thi nohri kümünyie saluo, khinyi nü walethuoh, atsotho jumthuoh, halie, anyi Tsawa tü kükhiemuori ke vü retsümüthuoh. 42Süraluo, tewaluo nüh raluo, halie, hi zhutsamüna küsawa shenyishe vehthuoh,” ti küza.

Jisu küre

(Mat 26.47-56; Luk 22.47-53; Jhn 18.3-12)

43Thinü müküzhikewiethuoh nüh ma azhüphrapeküveh vünüh türakünyiri azhie nüh nyi küsü Judas tü levü küjiri thi Khonyo küsosieri thi kükhruori vünüh anyi khielota sie nü anyuchuwa thi akütsü vinü ru. 44Ma zhü nyuri vü tsümüna küsawa nüh jüma atü vünüh jümari vü athsoshi tsükümüthuoh kenüh mari vü küüza, “Hi nüh thawa kümetsünaveh nüh jümawiethuoh, nohri ma sie nü kümühieti waluo,” ti küza. 45Thinü ma tü ma vü ru nü müküzhikewiethuoh nüh külesho ma vü watajinü, “Küsosiewa, ti ji nü ma küme tsü.” 46Jütisanü mari ma sho nü sietewa. 47Thinü türakünyiri azhievü nyi küsü nüh anyuchuwa shozhu nü vi Levü Kümüsiewa siepewa müwie nüh ma khüna taja mütü. 48Thinü Jisu nüh mari vü, “Nohri kürühuri sieküsaluo kümüjie anyuchuwa thi akütsü vi tajinü hi sie nti tse ülo? 49#Luk 19.47; 21.37.Hi nüh rülotsotho nohri sie Kükhurüzhe lovü pe nü sosie pe, thitü jüvü nü nohri hi müre, thitü Zhütsazhü tü müjüwieji mümühie,” ti küza. 50Thinü mari aveh ma jamü nü zhutewakheh.

51Jütiküsavü vizari linen ti küsawa athsü küsü vi ma satsa küzhunü ma se nyi tse ünü mari nüh ma re. 52Thitü ma tü ma linen thsüwa jamü tajinü kürütso zhütewa.

Müza kümühu vünüh Jisu sie ashi küsa

(Mat 26.57-68; Luk 22.54-55,63-71; Jhn 18.13-14,19-24)

53Jüsevü mari nüh Jisu sie Levü Kümüsiewa vü wa, thinü alevü küjiri thi kükhuori thi Khonyo küsosieri wa tü ma nü siesehzhü pela. 54Thi Pitor ma siekietuo wietaji ma se nyi tse Levü Kümüsiewavü wa nü jüla akütsüküünari sie anyih küho pe. 55Jütiküsavü levü küjiri thi müza kümühu aveh nüh Jisu fethengü nü ma müküle thsü thi künguto apovü phah, thitü müngura nüh samü. 56Küpakenühnyunü anyiri hozake nüh küzhüja phrate ma müte, thitü mari azhü mükato nüh samü. 57Thinü wuori süra tsie taji küzhüja povü phrate ma müte nü, 58#Jhn 2.19.“Hiri nüh küünara, kenüh saküsa Kükhurüzhe hama ma nüh zorie mütajinü rülo küche azhie vünüh ma nüh ake nüh müsanüh küpasatsüle naveh ta küzalie,” ti küza. 59Thitü jütawie ketünga mari povü watü mütsarü nüh sawie. 60Thi nüh Levü Kümüsiewa nüh süra mari azhie vü tsie tajinü, “Hamari nüh azhü mowa vi no müteveh nüh notü zanyo küsü nga küphratele münyiethuoh ülo?” ti Jisu vü küna. 61Thitü ma tü zohmti petewa nü zanyo küsü nga rülemütsü nüh sa. Thinü Levü Kümüsiewa nüh ma vü, “Noh tü Khrista, Akütsia Tsawa wiethuoh ülo?” ti küna. 62#Dan 7.13.Thinü Jisu nüh, “Ah wiethuoh, thi nohri tü anyi Tsawa kükhratsa azhie wuovü shupeküveh thi rügi vü akülu vünüh küturu ngu naveh,” ti küza. 63Jüti Jisu nü phrate ünü, Levü Kümüsiewa tü arüshu nü ma thsü zokhri tajinü, “Hiri povü küpa phale nü mowa sana lo? 64#Lev 24.16. Nohri mpa nga ma nüh Saküüwuowa küüjo zhü küphra thsürathuoh nü, nohri mowa müsheveh lo?” tisa Jütisanü mari aveh nüh ma tü küsükümü arüle vü pevehthuoh ti müshe müsümü. 65Jüti satajinü mari wuori nüh ma nyia vü amütsemüshüke thi ma nyia tietemütü nü ake shekürülo taji ma to nü ma vü, “Noh setsaküthsüzhü küzamo,” ti sa. Thi riehuori nüh ma siewa nü ma je tsü.

Pitor nüh Jisu küürü

(Mat 26.69-75; Luk 22.56-62; Jhn 18.15-18,25-27)

66Thinü Pitor tü nyula kükhuvü tsieveh nü Levü Kümüsiewa siepevühküsü rü nü; 67Matü Pitor anyi küho peküveh künguvü ma nü ma no taji, “Noh nga Jisu Nazareth sietse nü ah?” ti küna. 68Thitü ma tü kürü taji, “Hi nü müthsü, jü mpa mükünyü noh nüh mowaküzaveh nüh hi nü mümüshera,” ti sanü ma tse alepie vü wa ünü awi khuru. 69Jümase vü nga asiepevüh jümatü ma ngu lehü nü ma kütuo vü tsie peküvehri vü, “Hama nga ma refüri azhie nüh küsü wie lie,” tisa lehü. 70Thitü ma tü kürülehü. Jüsevü nga pike peveh ünü jüla tsiepeküvehri nüh Pitor vü, “Noh nga ma refüri küsü tsawiethuoh, küpakenühnyunü no tü Galileeri küsü wiethuoh nü,” ti küza. Jütisanü mari zhüküsü satewa. 71Thitü ma tü küshiephokewie taji, “Hi tü no nüh phrate peküveh anyiwa tü müthsütsawielie,” ti küza. 72Jüti phrate ünü awi akünyiawa khuteru. Thinü Pitor tü Jisu nüh jüma tüvü ma vü küüza, “Noh tü awi künyi keri müjie kükhu atüvü küchekeri hi kürü naveh,” ta küsa azhüwa ma se müshera. Thinü matü azhü jüma müshekera nü krietewa.

Currently Selected:

MARK 14: POCHBSI

Highlight

Copy