MARK 13
13
Kükhurüzhe samüsümüna küsa Jisu nüh küphrate
(Mat 24.1-2; Luk 21.5-6)
1Jüsevü ma tü kükhurüzhe lo vünüh kuotsezhuteküwavü, ma sehnyiri küsü nüh ma vü, “Küsosiewa, halie, aloh haritü mokümjie küsa aloh thuoh nüh, thi azhe haritü moküsa azhe thuoh nüh,” ti küna. 2Thinü Jisu nüh ma zhü rüle tajinü, “Noh tü azhe küji hamari ngüveh ülo? Aloh küsü wienga khamüja nüh küsü nüh küsü anyia vü khahke taji hala müpera,” ti küza.
Küüjakünya thi kümnomna kütsü rüna küsa
(Mat 24.3-14; Luk 21.7-19)
3Jüsevü Jisu Olive küzhiho rügi vü kükhurüzhe ashütü wuovü pevehünüh, Pitor thi Jems thi Johan thi Andrew mari küüzhe vünüh ru nü ma vü, 4“Azanyo haritü küsie sanaveh nüh, thi sajuna küsavü mowa nüh athsoshi saruna lo? Vi hiri vü küzatsüjie,” ti küna nü khuo. 5Thinü Jisu nüh mari vü, “Nyi küsü nga nüh nohri müküümüra nta küsakenüh nohri mpa nohri kenüh zipehuo luo, 6küpakenühnyunü anyiri hozake eh nyo vi tajinü, hi Khrista thuoh ta sanü anyi hozake müramünaküveh kenüh. 7Thitü nohri arie küsa thi arie sapeküveh zhükuri küthsüra vü nohri luoveh küza ti müsatümü, jüritü müsanüh külewanyu, thitü jü nüh asekhe nyu. 8Akuoh küsü nüh akuoh küsü anyia vü mükünongü shunaveh, thi kaji küsünüh kaji küsü anyia vü mükünongü shu naveh; thi luo wie vü amükhrüküzhüh naveh; kümükhuojih thi kümnomna pe naveh, zanyo jüritü kümnomna apokhuriwiethuoh. 9#Mat 10.17-20; Luk 12.11,12.Thitü nohri mpa nohri kenüh riazi pehuo luo, küpakenühnyunü nyuri nüh nohri re taji müza kümühu atüvü thse naveh, thi müza kümühupe vünüh nohri fe naveh, thi nohri sie kükhraküviri thi kajiri atüvü ehkenüh mari atü vü eh povü tsü nta tsie naveh. 10Thitü asekhewa müküjie atüvü nüh zhülekümühiewa phrate taji nü akuoh aveh vü wa müjükhuji mümühie. 11Thi nohri sie taji nyiri ake vü thsemüna küsa vü küütü azhüküzana küsari müshe nü nohri luoveh mütsazatümü, nyutü müshe mütsetümü, thitü atsotho jüla nohri küza üta küsari vi küzaluo, thi küüzajüritü nohri azhünyu nü Kümtse Sietse azhü küsa kenüh. 12Tinü ajiewa nüh anüwa zhütsanü küüsü naveh, thi apawa nüh atsawa zhütsanü küüsü naveh, thi atsari nüh apa azari münongü nüh sanü küsülevü thsemü naveh. 13#Mat 10.22. Thi eh nyo kenüh anyiri aveh nüh mürhü naveh, thitü thawa nüh küzhikewa asekhe junaveh nüh jüma nüh külole naveh.
Kümnomna küngo sa she na küsa
(Mat 24.15-28; Luk 21.2-24)
14 #
Dan 9.27; 11.31; 12.11. “Thitü nohri khielota kümürhü küüzo künguvü” (aküchieri mpa nüh mazhünyo küüthsüluo,) jüvü Judea vü küperi tü zhü küzhihori vü teküwamü luo. 15#Luk 17.31.Thi azhe rügi vü küperi tü azhih vü müküürutümü luo, nyutü ma zhevünüh zanyo küsü nga vi nti sanü mütu tümü. 16Thi azhü vü kütseri tü ma thsü vi nti shele mükühutümü. 17Thitü jüma tsotho vü atsamokütseri thi atsa künüküvehri thuoüji küzakele lorü naveh nüh. 18Thi jümatü küsosa müküsetu naküsa kenüh khuo luo. 19#Dan 12.1; Kkt 7.14.Küpakenühnyunü jüma tsothovü tü münomüna she taji Saküüwuowa nüh zanyo saküjekütsü atükhu vünüh ru nosü tsotho küju jüzake müküsa thi hasevü küsü nga jüta müküsa sa rü wienaküveh kenüh. 20Thi Vüwa nüh ma mpa arülowa sakümülu mütsüthuoüji kürholi küsü nga mükülolera, thitü ma nüh rüka küsari anyo vünüh arülowa sakümülümütüthuoh. 21Jütiküsa vü anyi küsüküsü nga nohri vü, “Halie, Messiah hala peveh! nyütü, tulie tula peveh,” ta wie ketünga mütsotü tümü luo. 22Küpakenühnyunü Messiah küzhüja thi setsaküthsü küzhüja shuru nü athsoshiri thi azanyo küngori sa anyiri kütsanü, alekhuji kümüsüvü küze naküsa kenüh, samühie thuoüji rüka küsari nga müra tewa naküveh kenüh. 23Thitü nohri riazipehuo luo, halie, hi nüh küütü vünüh zanyo avehvi nohri vü küzamüthuoh nüh, ti küza.
Anyi Tsawa shele küru
(Mat 24.29-31; Luk 21.25-28)
24 #
Isa 13.10; Joe 2.10,31; 3.15; Kkt 6.12; Isa 13.10; Eze 32.7. Thitü jü rülovü münomüna kümüsevü, arünyi zotewa nathuoh, thi asah nga ma küwie mütsü nüh satewanathuoh. 25#Isa 34.4; Kkt 6.13; Joe 2.10.Thinü arügivü awutsiri kretewa nathuoh, thi akükhra arügivü peküvehri küzhüjamünathuoh. 26#Dan 7.13; Kkt 1.7.Thi jütiküsavü anyiri nüh anyi Tsawa ma kükhra küji küthola sanü akülu rügivü kütse ngu naveh. 27Thi jüvü ma nüh ma zhüleri küze tajinü amürhü müzü vünüh rüka küsari azhih küpote tsatsa vünüh wa thajüwu küpote tsatsa küjuvünüh sieru sehzhu naveh.
Jichuorhu vünüh küsosiezhü
(Mat 24.32-35; Luk 21.29-33)
28Jichuorhu vünüh küsosiezhü thsüluo, ma tsuonawa rünyi taji manyawa shizhu tsethuoüji nü küzhesa tetsethuohta küsa nohri nüh thsüraveh. 29Jükümjie nohri nga zanyo hamari satekütse ngu thuoüji shenyitsethuoh, küshenyi mpa nyunü amükhie kütuo tsatsa vü pevehthuoh taküsa thsüluo. 30Hi nüh nohri vü küzatokenaveh, zanyo hamari müjie küsaju kheh nü khinyi rhopeküveh anyi hamari mürarah. 31Thajüwu thi azhih thuoüji kümiemünaveh, thitü eh zhüri thuoüji mükümiera.
Nyi küsü nga müküthsü rülowa thi tsothowa
(Mat 24.36-44)
32 #
Mat 24.36. Thitü jüma rülo thi tsotho nyi küsü nga müthsü, arügivü peküvehzhüleri nga müthsü, Atsawa nga müthsü, Apawa mpa wie küchie nüh. 33Nohri zipehuo luo, nope luo, thi khuo pe luo, küpakenühnyunü atsothowa küsie naveh nüh nohri nüh müküthsü kenüh. 34#Luk 12.36-38.Jüma thuoüji nü nyi küsü nüh azhe jamü nü aleküsuo vü aküze tewa tajinü akükhra vi ma sieperi tsotümü nü küüro kürüpe tsümü tajinü amükhie kühuowa vü no pe la üta küüza khewiethuoh. 35Jükenüh nohri nopehuola wie luo, küpakenühnyunü azhe vüwa küru münüle vü naveh nü, nyutü arüne vü naveh nüh müküthsü kenüh. 36Ma no zepeküveh vünüh zhürüluo mükürü nüh sana küsa kenüh. 37Zipeluo ti hi nüh küüza zhü watü aveh vü küzaveh, ti küza.
Currently Selected:
MARK 13: POCHBSI
Highlight
Share
Copy
Want to have your highlights saved across all your devices? Sign up or sign in
Pochuri Naga Bible - KÜMÜTSE BIBLE
Copyright © 2015 by The Bible Society of India
Used by permission. All rights reserved worldwide.
