MATHI 9

Jisu nüh Wiechuküsüri küsü Sakümühiekütsü

(Mrk 2.1-12; Luk 5.17-26)

1Jüsevü ma juhie küsü lovü tu nü tseshu ma mpa ma nyu vü teru. 2Thinü anyi wuori nüh nyi küsü wiechusümü nü na taji aze vü zeküperi küsü kha nü ma vü ru, thinü Jisu nüh mari kütsotü ngu tajinü wiechusükümüwa vü “Eh tsa, noh nyiepha müza luo, no kükhiemuori nojamütsüthuoh nüh,” ti küza. 3Thinü halie, Wule küsosie wuori nüh mari mpa mari luoveh lo vünüh, “Anyi hamatü Saküüwuowa küjoveh nü mo,” ti sa. 4Thitü Jisu nüh mari luoveh lovü müshe küpe thsü nü, hohri mokenüh nohri luoveh lovü zanyokümüsü müshe veh lo? 5Noh kükhiemuori nojamütüthuoh nüh, ta küsari, süra nü aletse luo, ta küüzawa masü khiema nüh küüruzi na lo? 6Thitü anyi Tsawa tü azhih vü kükhiemuo noküjara kükhra pehveh ta küsa nohri küüthsü na küsa kenüh, ma nüh wiechuküsüwa vü, “Süra tajinü no ze kha no zhe vü waluo, ti küüzawa wiethuoh,” ti küza. 7Jütisanü anyi jümatü süra nü tse ma zheh vü tewa. 8Thinü anyi riekhuowa nüh jü ngu tajinü krü sheh, thi Saküüwuowa nüh kükhra jükümjie vi nyiri vü kütsü kenüh ma siake.

Jisu nüh Mathi Küji

(Mrk 2.13-17; Luk 5.27-32)

9Thinü Jisu tü jüla nüh tseshu tse ünü Mathi ti küji akhrükükhrüpe vü pehlanü ngu. Thinü ma nüh ma vü, “Eh se nyi luo,” ti küza.

Thinü ma tü süra nü ma se nyitewa. 10#Luk 15.1,2. Jüti sataji nü Jisu tü ashie tsa nti azheh lovü wa ashiekütsapevü pehveh ünü, halie, mükünongüri kenüh akhrükükhrühri thi anyu vünüh zhejakümüri hozake ru ma thi ma sekünyiri vü nyipe. 11Jüti küsavü Farisiri nüh jü ngu nü ma sehnyiri vü, “Nohri küsosiewa tü mokenüh akhrükükhrühri thi anyu vünüh zhejakümüri sie ashietsaveh lo?” ti küna. 12Thinü Jisu tü jü thsüra tajinü mari vü, “Kümütsari tü nahziküthsüri moma vi sa, thitü nahziküthsüri tü künari kenüh wie, 13#Mat 12.7; Hos 6.6. Nohri wa tajinü hi thuoüji zanyo viküsahthuoh nyia vünüh küümze nüh küülokhe, ti küsawa zhünyo thsüluo. Küpakenühnyunü hi tü künyitsari ji nti müru nü kükhiemuori luoveh küükhaphrü nti küru wie,” ti küza.

Assa küsa Rühle Küüna

(Mrk 2.18-22; Luk 5.33-39)

14Jüsevü Johan sekünyiri tü Jisu vü ru tajinü, “Hiri thi Farisiri nü mokenüh assa saveh thitü noh sekünyiri nü mokenüh assa müsa lo?” ti küna. 15Thitü Jisu nüh mari vü, kümünyutepawa peküveh vünüh kümünyute kenüh kütsaküzhu vü jiruküsa ma füri tü luoveh na pemühieveh ülo? Jütanyunü tsotho ru naveh, kümünyutepawa tü ma füri vünüh sietewaluo nta küsa vü mari tü assa sanaveh. 16“Thi nyi küsüwienga athsü kürüthe küsü viwa tajinü athsü kürüwiwa vü kürüke müveh, küpakenühnyunü jüta thuoüji kürüthe viwa kürüke küsawa nüh shokhrimü naveh, thi kümüsütsa krimü naveh. 17Jümpa mükünyu nyi küsüwienga rhelivi kha kürüthe vi sahu lehuo kürüwi lovü mümüzhi, jütathuoüji sahu lehuowa tü zhiphumü naveh, thi rhelivi kha tü lizhutewa naveh, thi sahu lehuowa nga krimü naveh, thitü rhelivi kha kürüthewa tü vi sahulehuo kürüthe lovü müthseji mümühie, jütathuoüji masü khürü nga pehra naveh,” ti küza.

Sierhüri Tsa Rülari küsü Sakürhokütsü thi Jisu thsühu küpawa

(Mrk 5.21-43; Luk 8.40-56)

18Ma nüh azhü hari vi mari vü küzapeveh ünü, halie, sierhüri küsü ru ma vü khotsü tajinü ma khurü nü, “Eh tsa rüla küsü khintü tsatsanüh sümü nü, thitü no ru nü no ke thsuo taji ma vü thsejie, jütathuoüji ma tü rholera naveh nü,” ti khuo. 19Thinü Jisu tü ma sehnyiri sie taji süra ma se nyiwa. 20Thinü halie, mavi türakünyi azüh vü tekütse vüh küsü ma se vünüh ru nü ma küüzhuvüh apote vü pa; 21küpakenühnyunü nyimza hamatü ma mpa ma jüle tajinü, “Hi tü ma küüzhuvüh keküparavü wienga nüh mühierana nü,” ti müshe. 22Thinü Jisu tü süle künovü ma ngura tajinü, “Eh tsavühwa, no nyiapha müza luo, noh kütsotü mpa nüh noh sakümühiemüthuoh,” ti küza. Thinü kheti jüma tsotho vünüh nyimza jüma tü mühiera. 23Jütisanü Jisu tü ru sierhü jümawa azhe ju ünü pilechu kükhukhi thi nyiri azhü khieloti küphrala künara; 24thinü ma nüh, “Aleküpie luo, rüla hamatü sümüveh, thitü zepeküvehwie,” ti küza. Thinü mari tü ma riesa tajinü ma müküchie sa. 25Thinü anyi jümari anyulavü zheküzemü tajinü ma tü azheh lovü tu nü rüla jümawa ake si ünü rüla jümawa tü tesüra. 26Thinü azhie jüla aveh vü azhü hama tholah nyuotewa.

Jisu nüh Nothaküüjuri Künyi Sakümühiekütsü

27Jüti satajinü Jisu tü azhie jüla nüh tsezhu tse ünü nothaküüjuri künyi tü ma se nyimüzheh nü zia taji, “David Tsa, Noh tü hisü nokümüze tsümo,” ti khuo. 28Thinü Jisu tü azheh küsü lovü tetu ünü nothaküüju masü nga ma se nyi tetu, jütiküsavü Jisu nüh ma sü vü, “Hi nüh nosü sakümühierawie naveh ti küsa nosü tü tsotü veh ülo?” ti küna. Thinü masü nga ma vü “Ah, Vüwa,” ti rületsü. 29Jütiküsavü ma nüh masü notha pa tajinü, “Nosü nüh kütsotü kümüjie vünüh saluo,” ti küza. 30Thinü masü notha tü koteru, jütiküsavü Jisu nüh wurie masü khe tajinü, “Nyi küsü nga müküüthsü naküsa kenüh küthi luo,” ti küza. 31Thitü masü tü ape jüla nüh tsezhuwa tajinü anyu jüla aveh vü ma azhükuwa phrate küthola she tsü.

Jisu nüh Zhümüküphrari küsü Sakümühiekütsü

32Jüti satajinü mari tü jüla nüh tetse ünü, halie, nyi küsü sietse kümüsüwa nüh mürü taji zhümüphrara nüh tekütseri küsü mari nüh sie ma vü ru. 33Thinü sietse kümüsüwa zhezhujamünü anyi zhümüküphrawa tü azhü phrara; jütiküsavü anyi riekhuo wa tü ngo nü, khinyi küju wienga Israelri azhievü küsü nga hakümjie müjie nguwie, ti küza. 34#Mat 10.25; 12.24; Mrk 3.22; Luk 11.15. Thitü Farisiri nüh, “Ma tü sietsekümüsüri kajiwa sie taji sietsekümüsüri zhekütsewie,” ti küza.

Jisu nüh Nyiri Noküümze

35 # Mat 4.23; Mrk 1.39; Luk 4.44. Jümasevü Jisu tü anyu küzah thi küji aveh vü wa tajinü nazizheri vü tu nü nyuri sosie, thi Kajipe Zhühthe Kümühiewa vi nyuri küza, thi küsaküna aveh thi satsa vü mükümtse aveh sakümühie tsü kheh. 36#Nyi 27.17; 1 Kaj 22.17; 2 Kkz 18.16; Eze 34.5; Mrk 6.34. Thi ma nüh nyiri riekhuowa künguvü ma luoveh natewa, küpakenühnyunü anyi jümari tü münomüna thi nyi küsü nga mari küükra münyiethuoh nüh anyihzhü ma kühuo mükünyie üta luo wie vü porievorie tekütse kenüh. 37#Luk 10.2. Jükenüh ma nüh ma sehnyiri vü, “Atsuo thuoüji khielo ta nevehthuoh, thitü küürori thuoüji zülamü. 38Jükenüh azhu vüwa nüh azhu küürori azhu vü küze na küsa kenüh nohri khuo luo,” ti küza.

Currently Selected:

MATHI 9: POCHBSI

Highlight

Copy