MATHI 14

Johan Baptist Küsü

(Mrk 6.14-29; Luk 9.7-9)

1Jütiküsa tsothovü küjiwa Herod tü Jisu nyo thohla she kümü künara tajinü, 2ma sieperi vü, “Hama tü Johan Baptistwa wiethuoh, ma tü aküsü vünüh rhosüra savehthuoh, jükenüh mari tü ma vünüh küngo küürori saküvehwie,” ti küza. 3#Luk 3.19,20. Herod hama tü khanavü ma nü Filip vüvüh Herodia kenüh Johan re nü ma phe tajinü küsizhe lovü thsemü. 4#Lev 18.16; 20.21. Küpakenühnyunü Johan nüh ma vü, “Noh tü nyimza hama küzale nyu,” ta küüza kenüh. 5Thi Herod tü Johan fethengü teru, thitü anyi riekhuowa krütewa, küpakenühnyunü mari nüh ma tü setsaküthsüri küsü ta küchieke kenüh. 6Thitü Herod küwuo rülo ru ünü Herod vüvüh atsa nüh tsihkütsa tajinü ma sakülozhe tsü. 7Jükenüh rülawa nüh mowa khuo naveh nüh vi ma tsü nta küsa zhü phrazhutsü. 8Thinü rülawa tü ma zah nüh ma vü küüza kümüjie, “Johan lü thuoh tajinü akhu lovü thse nü shiti virutsü üti khuo,” 9Thitü ma nüh nyiri ru ma zheh vü tsazhu küperi tü vünüh küshie kümüthuoh kenüh vi ma tsüna thuohti azhü tsümü. 10Jütisanü ma nüh nyiri küze taji küsizhe vünüh Johan lü thuoh. 11Thi alüwa tü akhu küsü lovü thse nü viru rülawa tsü, thinü rülawa nga vishele wa ma zah tsümü le. 12Thinü Johan sehnyiri nüh ru ma kümo khatewa nü chowumü, thi mari tü wa nü Jisu vü küza.

Jisu nüh Nyiri Nyiemünga vo Küsa

(Mrk 6.30-44; Luk 9.10-17; Jhn 6.1-14)

13Thinü Jisu tü azhü jüma thsüra nü jüla nüh juhie küsü vünüh hie azhie küüzo küsü vü külesho tewa, thinü nyiri tü jü thsüra tajinü mari anyu jamü tajinü ajih vünüh tse ma se nyi tewa. 14Jütiküsavü ma tü ajuhie vünüh tseshuhru ünü anyi shieji küsü ngu tajinü ma nüh mari no küümze kenüh künari sakümühie tsü kheh. 15Jütiküsavü münüleh teru ünü ma sehnyiri tü ma vü ru mari küze taji anyu vünüh kütsaküzhu küsümüluomo, ti küza. 16Thitü Jisu nüh mari vü, “Nohri mokenüh mari küze na lo? Nohri zanyo vi mari kütsaluo,” ti rületsü. 17Thinü mari nüh ma vü, “Hiri nüh khinyi peküveh thuoüji lohse münga thi anga künyi mpathuoh,” ti rületsü. 18Thinü ma nüh mari vü, “Jümari viru hi tsüluo,” ti khuo. 19Jütiküsavü ma nüh anyi shiejiwa vü phrato rügivü shupe kheh üti azhütsü, jütisanü ma nüh lohse münga thi anga künyi ti vi nü thajüwu rügivü no taji tsia jümari nyia vü thse nü zokhuo nü ma sehnyiri vü tsü, thi ma sehnyiri nüh külieluo taji nyiri vü tsü, ti sa 20Thi mari aveh nga tsa tajinü müwakheh; thi mari nüh tsatu küja phahzhu küwavü akhuo türakünyi phahzhura. 21Thi jüla kütsari krevühri thi atsari müchie nüh krepari mpa küchie anyie münga tsa.

Jisu Aju Nyia Lekütse

(Mrk 6.45-52; Jhn 6.15-21)

22Jümasevü müküzhike wiethuoh nüh Jisu nüh nyiri saküze pehküvehvü ma sehnyiri tü juhie lovü tu nü ma tüvü azhie küpa vü tewa üti küza. 23Thi ma nüh anyi riekhuowa saküze kümüsevü ma mpa kükhuo sa nti küzhiho rügivü tewa, jüti sataji nü münüle teru ünü ma mpa jüla petewa. 24Hakümjie küsa tsothovü juhiewa tü mürhü atü vünüh weke kümü kenüh aju nüh küshü taji juküji azhila vü tewa. 25Jüti küsavü rüne bafe küche thi türo azhie vü ma tü juküji rügi vünüh tse ma sehnyiri vü ru. 26Thinü ma sehnyiri nüh ma juküji nyia vü tse kütse ngu tajinü mari tü khieloti krü nü, “Sietse küsü tsethuoh,” ti sanü krü kümü kenüh zia. 27Mari jüüti sapeküveh vü ma nüh shiti mari vü küza tajinü, “Hi wiethuoh tinü nohri mükrü tümü nü lozheluo,” ti küza. 28Thinü Pitor nüh ma vü, “Vüwa, no wie thuoüji, hi tü aju nyia vünüh tse no vü küüru üti küzajie,” ti khuo. 29Jütiküsavü ma nüh, “Raluo,” ti küza. Thinü Pitor tü juhie vünüh tseturu aju nyiavü nüh tse Jisu vü ru. 30Thitü ma tü mürhü kümüsü ngu nü krütewa, thi aju lovü kuoreteküwa kenüh zia taji, “Vüwa, hi külole luo,” ti khuo. 31Thinü Jisu nüh shiti ma ke thsuo küze taji ma shoke tajinü ma vü, “Halie, no kütsotü küzüla anyiwa, no mokenüh kütsotü mükütoh nüh samü lo?” ti küza. 32Jütisanü masü juhie lovü tsetu ünü mürhü mümürhü nüh letewa. 33Thinü juhie lovü peküvehri nüh ru ma khurü taji, “Zhütsa wiethuoh, noh tü Saküüwuowa Tsa tsah wiethuoh,” ti küza.

Gennesaret vü Jisu nüh Künari Saküümühie

(Mrk 3.10; 6.53-56)

34Jüti satajinü mari juküjiwa kari tajinü tse Gennesaret azhih vü teru. 35Thinü anyu jüla nyiri nüh ma ta küsa küthsüravü mari tü anyi küze taji anyu jüla poteposhu aveh vünüh künari aveh sie nü ma vü ru. 36Thinü mari nüh ma vü, “Athsühu wienga raküüpa wieluo üti khuo,” thi künari küzake nüh ma thsühu pa nüh mari aveh mühierakheh.

Currently Selected:

MATHI 14: POCHBSI

Highlight

Copy