MATHI 15

Alahnyiri Wule Küsosie

(Mrk 7.1-13)

1Jütiküsavü Farisiri thi Wule küsosieri Jerusalem vünüh Jisu vü ru nü, 2“Mokenüh no sehnyiri tü alahnyiri nüh wule sakütsüri phrürie veh lo? Küpakenühnyunü mari tü ashie müjiekütsa tüvü ake mümütso nüh küsa kenüh,” ti küza. 3Thitü ma nüh mari vü rüle tajinü, “Thinü nohri nga mokenüh nohri wule vi Saküüwuowa nü azhü kütsüri phrürie veh lo?” ti küza. 4#Tse 20.12; Kho 5.16; Tse 21.17; Lev 20.9. Küpakenühnyunü Saküüwuowa nüh azhükütsü thuoüji, noh zah noh pa siakeluo, thi thari nüh azhükümüsü ma zah ma pa vü phranaveh nüh küüsümü luo, ta küza küsa kenüh. 5Thitü nohri thuoüji, nyi küsüküsü nga satü ma zah ma pa vü küza taji, hi vünüh akünyia mowa nguraveh nüh vi Saküüwuowa tsümüthuoh, tinü jükenüh ma pa müsiake wie ketünga azhümünyie, ta küzazati. 6Jükenüh, nohri wule kenüh Saküüwuowa zhüri müküchie samüthuoh. 7Nohri aküthseküsari, khanavü Isaya nüh nohri khuke setsaküthsüzhü vünüh küza kümühie she küsa hakümjie: 8#Isa 29.13. “Anyi hamari tü mari apo vü mpa nüh hi siake küveh wie;

thitü mari luoveh thuoüji hi vünüh kiethuoh shetewathuoh;

9Thi anyiri nüh küsa zhüri vi nyiri sosie nü mari müjuju vünüh hi khurüvehthuoh,” ta küza saveh.

Nyiri Saküümüne Zanyori

(Mrk 7.14-23)

10Jüsevü ma nüh anyi riekhuowa ma vü jike tajinü mari vü, “Küna nü thsüluo; 11apo lovü küturi nü nyiri samükümüneh, thitü apo lovü nüh shuküruri thuoüji nyiri sakümüneh mümüti,” ti küza. 12Thinü ma sehnyiri nüh ma vü ru taji, “Azhü ha küüza vünüh Farisiri tü luoveh mümühie nüh savehthuoh ta küsa noh tü thsüveh ünü nyu lo?” ti küna. 13Thitü ma nüh mari rüle taji, “Rügi vü küpewa eh Pa nüh müküzhori aveh thuoüji lojamü naveh,” ti küza. 14#Luk 6.39. “Mari mpa jüti küpemü luo, mari tü notha küju taji nothaküüjura lekhuji küjo kütse kenüh. Nothaküüjuri nüh nothaküüjuri lekhuji küjo tsethuoüji masükhürü nga zhikrie lovü küluketetu naveh,” ti küza. 15Thinü Pitor nüh ma vü, “Küüzhühie hama zhünyo rüle hiri tsü üti khuo.” 16Thinü ma nüh mari vü nga, “Nohri nga khinyi nga müjie thsüwie ülo?” ti küna. 17Zanyo küsüküsü nga apo lovü küturi thuoüji avo lovü tetü nü kuja mümüti küsa nohri müthsü ülo? 18#Mat 12.34. Thitü apo vünüh küshururi thuoüji luoveh lo vünüh shuru veh, thi jümari nüh nyiri sakümüneh veh. 19Küpakenühnyunü luoveh lo vünüh amüshe kümüsüri, nyuri küfethe, küüphroküphrie, müsarüla küsa, kürühu, küzhüjah povü küsa, nyuri küüjo, hamari shuru veh. 20Zanyo hamari nüh nyiri sakümüneh veh, thitü ake mümütso nüh shiekütsa thuoüji nyiri samükümüneh, ti küza.

Kananvühri Küsü Kütsotü

(Mrk 7.24-30)

21Jümasevü Jisu tü jüla nüh tse le Tair thi Sidon anyu wuo vü tewa. 22Thinü halie, Kananvühri küsü anyu jümasü wuo vünüh ru zia taji, “Halie, David Tsa, no hi nokümüze luo; eh tsa rülawa tü tsuore kümüsüwa nüh ma mürü kümüsü sheh tetsethuohlie,” ti küza. 23Thitü ma tü ma vü azhü küsü nga mürüle. Thinü ma sehnyiri tü ru ma vü wurie khuo tajinü ma tü küüzemü luo; küpakenühnyunü ma tü hiri senyi taji zia kütse kenüh, ti küza. 24Thinü ma nüh rüle taji, “Hi küüze thuoüji Israelri nyihzhü kümiekümüri vü küüze wie,” ti küza. 25Thinü nyimzawa tü ru nü ma tüvü khotsü nü ma khurü taji, “Vüwa, hi kükra tsümo,” ti khuo. 26Thitü ma nüh rüle tajinü, “Kürünguora müshü viwa tajinü ashuri tüvü küja tü alenyu,” ti küza. 27Thinü nyimzawa nüh shele, “Zhütsa wiethuoh, Vüwa, thitü ashuri wienga avüri nüh tsaküütsuotsa küüze amaseri tsatsati nü,” ti küza. 28Jütiküsavü Jisu nüh ma rüle tajinü, “Halie, nyimzawa, no kütsotü tü ji sheh münü, noh nüh kümüshe kümüjie küsawa saluo,” ti küza. Thinü jüma tsothovü kheti ma tsa rülawa tü mühiera.

Jisu nüh Künari Hozake Sakümühiekütsü

29Jüsevü Jisu tü jüla nüh tse Galilee juküji kütuo vü ru nü küzhiho rügivü tekuo taji jü rügivü petewa. 30Thinü anyi shieji küsü ma vü ru nü arünyihküpriri, nothaküüjuri, azhümüküphrarari, akeküjiri thi küpa hozake nga sieru nü ma jih vü thse, thi ma nüh jümari aveh sakümühie tsü kheh. 31Jütiküsavü azhü müküphrarari azhü phrara, akeküjiri sakümühie kümü, thi arünyihküpriri alekütsera, thi nothaküüjuri zanyoküngura anyi riekhuowa nüh ngu taji mari ngo sheh, thi mari tü Israelri Saküüwuowa siake.

Jisu nüh Anyi Nyiemüzü Voküsa

(Mrk 8.1-10)

32Thinü Jisu nüh ma sehnyiri ma vü jike tajinü, “Hi tü nyi riekhuowa no nü kümüzemüthuoh, küpakenühnyunü mari tü rülo küche eh se nyitetsethuoh, zanyo küsü nga momatsathuoh, thi hi tü mari kürüma taji müküzengü, jüta thuoüji mari tü lekhujivü wa avopha mühieveh nü,” ti küza. 33Thinü ma sehnyiri nüh ma vü, “Hiri tü reza vünüh khiela nüh anyi hazake avo küprora alohse ngura naveh lo?” ti küza. 34Mari müh jüüti küüzavü Jisu nüh mari vü, “Nohri alohse küzake vi tse lo?” ti küna. Thinü mari nüh, “Türü, thi anga küzah nga pike vi tse,” ti rületsü. 35Thinü ma nüh anyi riekhuowa tü azhih vü tsuo shupe üti azhütsü. 36Jütisanü ma nüh alohse türüri thi angari ti ma kevü vi tajinü Saküüwuowa vü kütsia khuo tajinü zokhuo nü vi ma sehnyiri tsü, thi ma sehnyiri nüh küzhiluo taji anyiri vü tsü. 37Jütisanü mari aveh nga tsanü avomüwakheh, thi tsakümü sevü kütsatu amahse phahzhu ünü akhuo türü phahzhura. 38Thi jüla kütsa nyimzari thi atsari müchie nüh nyimpari mpa küchie anyi nyie müzü nüh tsa. 39Thi ma nüh anyi riekhuowa saküzemü tajinü juhie lovü tetu tajinü hie Magdala azhie wuovü mürhü tewa.

Currently Selected:

MATHI 15: POCHBSI

Highlight

Copy