MATHI 10

Povüküsa Türakünyiri

(Mrk 3.13-19; Luk 6.12-16)

1Jümasevü ma sehnyi türakünyiri ma vü jike tajinü, mükümtse sietseri zheja na küsa; thi küsaküna müküzüküzü aveh thi satsa vü mükümtse aveh sakümühie na küsa kükhra mari vü tsü. 2Thi povüküsa türakünyira nyo hamari: Powa thuoüji, Simon Pitor ta küsawa, thi ma nü Andrew, Zebedee atsa Jems thi ma nü Johan, 3Filip thi Bartholomi, Thomas thi Mathi akhrükükhrüwa, Alfia tsa Jems, thi Thaddaeus, 4Kananri Simon, thi Jisu rekütsüwa Iskariot Judas.

Türakünyiri vü Zhükütsü

(Mrk 6.7-13; Luk 9.1-6)

5Jisu nüh türakünyiri müjie küüze atüvü mari vü zhükütsü: nohri mükütsotüri azavü müwatümü, thi Samariari anyu küsü vü nga müwatümü, 6jütanyunü kümiekümü anyihzhüri azheh vü waluo. 7Thi nohri küwavü Rügi Kajipewa shenyimüthuoh nüh ti küsawa vi sosie waluo. 8Künari sakümühie tsüluo, küsüri sakürhotsüluo, wupie künari sakükutsüluo, sietsekümüsüri zhejamtüluo, nohri nüh ame müsanüh müjuju küngura kümüjie müjuju nyuri tsüluo. 9Nohri pesaku vü, suna, raka nyutü pesa küsü nga vü müwa tümü. 10#1 Kor 9.14; 1 Tim 5.18. Nohri küzeh kütse chükhu, nyutü satsaküüzhuvüh künyi nyutü ajiküükruvüh nyutü akütsüh vimüwa tümü; küpakenühnyunü küürori thuoüji avo ngukütsale kenüh. 11Thi nohri anyuküji vü nyutü anyuküza küsüküsü vü nga wa tü thawa nüh katoveh nüh phah tajinü nohri müjieteküwa küju nü jüla peh luo. 12Thi nohri azheh jülovü kütuvü tsia zhelo jüma tsüluo. 13Mükütüküzü azheh jüma katoveh üji nohri kümühiewa mari vü küwawa saluo, thitü mükato nüh samüthuoüji nohri kümühiewa shele nohri vü küruwa saluo. 14#Krr 13.51. Thi mükütüküzü nyi küsü nga nohri müsieke, nyutü nohri zhü müküna thuoüji azheh jüla nüh nyutü anyu jüla nüh tse sheletewa na küsavü nohri mpha vü azhitho wienga kükhajamü luo. 15#Mat 11.24; Atü 19.24-28. #Luk 10.4-12. Hi nüh nohri vü küzatoke naveh, thuohtüvü ashiküsa küüna rülo vü jüma khuke nyia vünüh Sodom thi Gomorrah anyu khuke nüh küphra küürüzi naveh.

Kümnomna Runa küsa

(Mrk 13.9-13; Luk 21.12-17)

16 # Luk 10.3. Halie! anyihnyih azavü nyihzhüwa küüze kümüjie hi nüh nohri küzeveh, jükenüh nohri amüre aro kümühie kümüjie saluo, thi mükhrietü khuke kümühie kümüjie saluo. 17#Mrk 13.9-11; Luk 12.11,12; 21.12-15. Thitü nohri nyiri vünüh azhüzhüluo, küpakenühnyunü mari nüh nohri re müzakümühu vü thse naveh, thi mari künazizhe vünüh nohri fe naveh; 18jümari thi mükütsotüri atüvü eh kenüh povü sataji küwa kenüh nohri sie atakrüri thi kajiri atüvü wa naveh. 19Thitü mari nüh nohri rekütsüvü mokümjie azhüphrana nyutü mowa phranaveh nüh ti müshemütsaza tümü luo, küpakenühnyunü nohri mowa müphraji mümühie nüh jüma tsothovü kheta nohri tsü naküveh kenüh. 20Jümatü nohri mpa müphratenü nohri Pa Sietsewa nüh nohri vünüh phratenaküveh kenüh. 21#Mrk 13.12; Luk 21.16. Thi ajienü mpa nüh ajienü re tsü nü küüfethe naveh, thi pawa nüh tsari re tsü nü küüfethe naveh, thi tsari nüh azahpari sie münoluongü nüh sataji nü mari re tsü nü küüfethe naveh. 22#Mat 24.9; Mrk 13.13; Luk 21.17; Mat 24.13; Mrk 13.13. The eh nyo kenüh nyiri aveh nüh nohri mürhü naveh, thitü küzhikewa sehkhe küjurawa nüh külole naveh. 23Thi anyu küsü vü nyiri nüh nohri vü kümnomna tsü thuoüji tse anyu küpa vü tewaluo, hi nüh nohri vü küzatoke naveh, anyi Tsawa müjieküru tüvü nohri Israel nyuri vü wa müju khera. 24#Luk 6.40; Jhn 13.16; 15.20. Sekünyiwa tü ma küsosiewa nyia vünüh ji müveh, nyutü ma vüwa nyia vünüh siepewa nüh ji müveh. 25#Mat 9.34; 12.24; Mrk 3.22; Luk 11.15. Sehnyiwa tü ma Küsosiewa kümüjie thi siepewa tü ma vüwa kümüjie thuoüji mühiemü wiethuoh. Thitü mükütüküzü azhe vüwa wienga Beelzebul üta thuoüji azheh lo jüla küpe küpari thuoüji jüma nyia vünüh wienathuoh.

Thari Kükrüle nüh ta Küsa

(Luk 12.2-7)

26 # Mrk 4.22; Luk 8.17. Jükenüh nohri jümari mükrü tümü luo; küpakenühnyunü müküütsa müküüngu nta sate küsa zanyo küsü nga münyie luo, thi müküüthsü nta küthi küsa zanyo küsü nga münyie luo. 27Aküzo vünüh hi nüh nohri vü küüzari küwie vünüh nohri vi nyuri vü küza luo; thi nohri khüna vünüh küünarari azheh rügi vünüh vi zia nyuri sosieluo. 28Thi akümowa fetherawie ketünga sietsewa müküfetherari thuoüji mükrü tümü luo, thitü kümo nga thi sietse nga künyikhürü nyihsuozü vünüh küzorierawa krü luo. 29Kakhrü künyi vü pesa küsü nüh sümüveh ülo? Thi Pawa kümüshe vünüh mükünyu nü jüri küsüwienga tsuotsa azhih vü müwara. 30Thitü nohri ashe aveh wienga chiekhehmüthuoh. 31Jükenüh nohri mükrü tümü luo, küpakenühnyunü nohri tü kakhrü hozake nyia vünüh ame zhi küveh kenüh.

Nyiri Tüvü Khrista Küphrahzhu

(Luk 12.8-9)

32Thi thari nüh nyiri tüvü hi vi phrahzhu naveh nüh hi nga eh Pa rügivü küpewa tüvü ma vi phrahzhu naveh. 33#2 Tim 2.12. Thitü thari nüh nyiri tüvü hi vi müphrahzhu nüh sa naveh nüh hi nga eh Pa rügivü küpewa tüvü ma vi müphrahzhu nüh sanaveh.

Kürükümühie Nyu, thitü Anyuchuwa

(Luk 12.51-53; 14.26-27)

34Hi tü azhih vü kürükümühiewa tsüna ru tünti mümüshe tümü, hi tü kürükümühiewa tsü nti müru thitü anyuchuwa tsü nti küru wie. 35Hi küru thuoüji atsa nyimpawa nüh pawa siemütsarü nüh küsa, thi atsa rülawa nüh azawa siemütsarü nüh küüsa, thi ajünyiwa nüh anyiwa siemütsarü nüh küüsa nti küsa kenüh küruwie; 36Thi ma mpa ma tsapatharuowa mpa nüh ma tsapatharuowa mükünongüri satewanathuoh. 37“Anyi küsüküsü nga eh nyia vünüh ma pa ma za küümze savehthuoüji, ma nü eh senyi müsatse, nyutü anyi küsüküsü nga eh nyia vünüh ma tsa nyimpawa nyutü nyimzawa küümze saveh thuoüji nü eh senyi müsatse. 38Thi anyi küsüküsü nga ma mpa ma khieluothsowa kha tajinü eh se münyi thuoüji eh senyi müsatse. 39#Mat 16.25; Mrk 8.35; Luk 9.24; 17.33; Jhn 12.25. Anyi küsüküsü nga ma satsa kürüpa nü vi ma zhi satekütsewa thuoüji kümiewie naveh, thitü anyi küsüküsü nga eh kenüh ma satsa mükürüpa nüh kümie kütsewa thuoüji ma satsa ngurale wie naveh.

Jisuori

(Mrk 9.41)

40 # Luk 10.16; Jhn 13.20; Mrk 9.37; Luk 9.48. “Thi anyi thari nüh nohri sieke veh nüh hi siekewieveh thuoh, thi thari nüh hi siekeveh nüh hi Küüzewa nga siekewieveh thuoh. 41Thi nyi küsüküsü nga setsaküthsüri sieke thuoüji setsaküthsüri jisuo nguwie naveh; thi anyi küsüküsü nga künyi tsari sieke thuoüji künyitsari jisuo nguwie naveh. 42Thi nyi küsüküsü nga ma mpa nüh rünguowie ketünga sehnyiri anyo vünüh küruvü aju küüji huo küsüwienga tsü thuoüji, hi nüh nohri vü küzatoke naveh, jüma piketü ma jisuo müpeh nüh küsawa nyu,” ti küza.

Currently Selected:

MATHI 10: POCHBSI

Highlight

Copy