MALAKHI 2
2
1“Thi khinyi thuoüji, O navüri, azhükütsü hama thuoüji noh keri nüh. 2Mükütüküzü nohri nüh müküna nta, thi eh nyo vü kütholathovü mütsü nüh nohri luoveh lovü vi müthse nüh sam thuoüji, hi nüh nohri rügivü kümzü küze naveh thi noh kütsiari müzüm naveh; jüüta nyunü hi nüh jümari müzümthuoh, küpakenühnyunü nohri nüh jüma vi nohri luoveh lovü müküthse kenüh. 3Halie, hi nüh nohri tsatori shüke naveh, thi hi nüh nohri nüh vi kükhurü asü vi nü nohri anyieh rügivü thse tsü naveh, thi eh tüvü nüh nohri vijam naveh. 4#Nyi 3.11-13. Levi sie eh kütsathuozhü saküsawa küjike nü azhükütsü hamatü hi nüh küza ta küsa nohri nüh thsüra naveh, ta thopahiri Vüwa nüh küza veh. 5#Nyi 25.12.Hi nüh kütsathuozhü saküsawa thuoüji akürho thi luovehkürüzi kütsathuozhü küsü, ma nüh küükrü na küsa kenüh hi nüh jümari vi ma tsü; thi ma tü hi krü nü eh nyo krü taji nü torieke peh. 6Küzhütsa küsüphie tü ma po lovü tü, thi ma po mie vü müküleh küsü nga müngu. Ma tü hi sie azazhüka thi kümsho vü tse, thi anyi hozake künakhie vünüh saküüsühle, 7küpakenühnyunü anavüra pomie thuoüji zanyoküthsü müsa üji mümhie, thi anyiri tü ma po vünüh küsüphie mphah üji mümhie, ma tü thopahiri Vüwa zhüleküvüri küsa kenüh. 8Thitü nohri tü lehkhujiwa vünüh anato vü sületewa thuoh; nohri küsüphie vünüh anyiri hozake ajih saküümshüthuo; nohri nüh Levira kütsathuozhü kütsaküsümthuoh, ta thopahiri Vüwa nüh küza veh, 9thi nohri nüh küzake eh lehkhuji mümzhe nüh nohri küsüphei vü kümrhümze kütsanüh jüzake anyiri aveh tüvü nohri küma thi saküsajitsü naveh,” ta küza.
Anyiri nüh Saküüwuowa vü müküzhütsanyitsa
10Hiri aveh tü apa küsü nyu ülo? Saküüwuowa küsü nüh hiri samküje ülo? Thinü mokenüh hiri tü hiri para kütsathuozhü sakümne nü küsü nüh küsü vü kütsotü münyie nüh sam lo? 11Judah tü kütsotü züla, thi Israel vü Jerusalem vü ti akükre sa; küpakenühnyunü Judah nüh Vüwa nüh külo ma kümtsezheh sakümnekümthuoh kenüh, thi aliera Saküüwuowa tsavühri samthuoh. 12Vüwa nüh Jacob jüthsüzheh vünüh hama küsa nyiri, povü sana küsa küsüküsü nga nyutü kürüle, nyutü thopahiri Vüwa vü kükhurü viru nta küsa vijam luo!
13Thi nohri nüh hama sale. Nohri nüh Vüwa kükhurüpe tü arüthsü nüh, akükrie nüh, thi külüchi nüh külüwutemthuoh, küpakenühnyunü ma nüh nohri ake vü küpeh kükhurü müchiekethuoh nyutü küütso vi müküvehthuoh kenüh. 14Nohri nüh, “Ma tü mokenüh nyu lo?” ta küna. Küpakenühnyunü noh nüh müzhütsanyitsanüh saküm noh küviza vünüh thi noh zhievü kütsathuozhüwa vü Vüwa nüh apo Vüwa, ma mpa nüh ma tü noh refüwa thi kütsathuohzhü vünüh noh vünüh wie ketünga. 15Saküüwuowa nüh küsü samtsü ülo thi hiri kenüh akürho sietse samkürho ülo? Thinü ma tü mowa müngu veh lo? Rügih kürho tsatori. Jükenüh azhüzhü luo, thi nyi küsü nga ma küviza vüvüh vü mükütsotü müsa tümluo. 16Hi tü küürüsuo, thi küvürie nüh vi thsümnyi küüzhute, mürhüm, ta Israel Saküüwuowa Vüwa nüh küza veh, jükenüh nohri mpa nüh azhüzhüluo thi müküzhütsanyitsa müsa tümluo, thopahiri Vüwa nüh küza veh.
Ashih küsa rülo tü shenyimthuoh
17Noh zhüri nüh Vüwa saküthasü mthuoh. Tü nohri nüh, “Hiri tü mokümjie vünüh ma saküthasüm lo?” ta küza veh. Thitü kümsüküsa anyiri aveh tü Vüwa nokhie vü mühiem, thi ma tü jümari nolom, ta küüza vünüh. Nyutü, kümsho Saküüwuowa tü khiela pehveh lo? ta küüna vünüh.
Currently Selected:
MALAKHI 2: POCHBSI
Highlight
Share
Copy
Want to have your highlights saved across all your devices? Sign up or sign in
Pochuri Naga Bible - KÜMÜTSE BIBLE
Copyright © 2015 by The Bible Society of India
Used by permission. All rights reserved worldwide.
