MALAKHI 1
1
1Malakhi vünüh Israel vü Vüwa zhü küru.
Israel kenüh Vüwa Küümze
2 #
Rom 9.13. #Isa 34.5-17; 63.1-6; Jer 49.7-22; Eze 25.12-14; 35.1-15; Amo 1.11,12; Oba 1-14. “Hi nüh nohri kümzethuoh,” ta Vüwa nüh küza. Thitü nohri nüh, “Mokümjie vünüh noh tü hiri kümze lo?” ta küza veh. “Esau tü Jacob ajie nyu ülo?” ta Vüwa nüh küza veh. “Tü hi tü Jacob kümzethuoh, 3thi Esau mürhü; hi nüh ma ho nyuji küümsü ja thi ma ka tü areza vü jiperüri vü tsümthuoh,” ta küza. 4Mükütüküzü Edom nüh, “Hiri tü müjemriem thuoh, thitü ferie kümri hiri nüh sale naveh,” ta wieketünga, thopahiri Vüwa nüh küüza, “Mari nüh sa mhie veh, thitü hi nüh zoriemtü naveh, mari tü kümsü küsa nyuji ta müjie küji küju nü, mari tü Vüwa nüh küsuokürho mari vü arüshu küm nyiri,” ta küza. 5Nohri notha mpa nüh hama nyu naveh, thi nohri nüh, “Aküjiwa tü Vüwa, Israel rüte kari wa veh,” ta küza naveh.
Vüwa nüh Navühri Küphra
6Atsa küsü nüh mapa siakesiakhri veh, thi asiepewa nüh ma Vüwa siakesiakhri veh. Thi nüh jüta thuoüji hi tü apa küsü thuohnü eh küsiakesiakhri tü khiela pehveh lo? ta thopahiri Vüwa nüh nohri vü küza veh, O navüri, eh nyo ma kümüri. Nohri nüh, “Hiri tü mokümjie vünüh noh nyo mam lo?” ta küza veh. 7Eh kükhurüpe rügi vü kütsaküzhu kümne vi kükhurü vünüh. Thitü nohri nüh, “Hiri tü mokümjie vünüh jüma sakümnem lo?” ta küza veh. Vüwa toküsape tü kümam nta kümshe kenüh. 8#Kho 15.21. Küsahthuoh vü asamwa küüju vi kükhurü vünüh, jüma tü kümsü nyu ülo? Thi ajihküji thi aküna vi kükhurü vünüh, jüma tü kümsü nyu ülo? Jüma vi nü nohri kümkhrüwa tsü noluo; ma tü nohri vü lozhe naveh ülo nyutü küütso kütsanaveh ülo? ta thopahiri Vüwa nüh küza veh. 9Jükenüh khinyi Saküüwuowa#1.9 Saküüwuowa: Nyi Nyiaza Küjiwa nyutü Nyiaza Küjiwa nyutü Nyiaza ta mpa nga ji mühieveh. küütsokhuo luo, jüta küsa vünüh ma tü hiri vü lozhisheh naveh. Nohri ake vü aküte kümjie küsa vünüh nohri küsüküsü vü nga ma nüh nohri vü küütso kütsanaveh ülo? ta thopahiri Vüwa nüh küza veh. 10O, nohri tü müjuju vünüh eh kükhurüpe rügi vü anyih mükütso nüh sana küsa kenüh khieloman nohri azhievü nyi küsü nüh amükhiewa küükhem ti nü! Hi tü nohri vü eh loküzhe münyiethuoh, thi hi tü nohri ake vünüh kükhurü küsü nga küvinga nyuthuoh, 11küpakenühnyunü rünyi küshu vünüh akütu küju eh nyo tü thopahiri azavü ji, thi azhie aveh vü kürhengu vi nü eh nyo vü khurü, thi alatha kükhurü sa; küpakenühnyunü thopahiri azavü eh nyo tü ji küm kenüh ta thopahiri Vüwa nüh küza veh. 12Vüwa kükhurüpewa sakümnem thuoh ta nohri nüh küüza vü nohri nüh jüma müküchie samthuoh, thi jüma kenüh kütsaküzhuwa tü mamthuoh. 13Nohri nüh, “Hamatü morüthaküsü thuoh lo,” ta küzazati, nohri nüh, thi nohri nüh hi kürhe, ta thopahiri Vüwa nüh küza veh. Nohri nüh küvürie vünüh viküru, nyutü ajihküji nyutü aküna viru, nohri nüh hamari tü kükhurü kenüh viru! Hi nüh jümari tü nohri ake vünüh vi naveh ülo? ta Vüwa nüh küza veh. 14Ma nyihnyih avo peh nü jüma tsü nta küshie taji müra nü Vüwa vü anyiehna küpe vi küsahthuowa tü müzüm luo; küpakenühnyunü hi tü kaji küji küsü, thi eh nyo tü akuoküjiri azavü krüm, ta thopahiri Vüwa nüh küza veh.
Currently Selected:
MALAKHI 1: POCHBSI
Highlight
Share
Copy
Want to have your highlights saved across all your devices? Sign up or sign in
Pochuri Naga Bible - KÜMÜTSE BIBLE
Copyright © 2015 by The Bible Society of India
Used by permission. All rights reserved worldwide.
