ZECHARIAH 4
4
Thaomeishong Rākhamahā
1Kala ili khangazeka kazingrao china rāluishitta ili, mi akhana pida leilakha mathotkakhui thāda rāmathota. 2Kala ana “Nana khi theikhala?” da ili ngahāna.
Ina hānga, “Ina thaomeishong sinā kachanga eina kasā akha thei, chiwui atungli khongsai akha lei, kala chiwui atungli akhamor shini kakā thaomei shini khalei chi thei. 3#Phon 11.4. Kala chiwui ngalemli oliverong khani lei, akhana khongsai chiwui yāvāk, akhana uivāk lei.” 4Kala ili khangazeka kazingrao chili ina hānga, “Iwui amei, hibing hi khikhala?”
5Chieina ili khangazeka kazingrao china ngahānkai, “Hibing hi khikhala na theila?” Ina hānga, “Matheimana, iwui amei.”
6 #
Ezr 5.2. Chiwui thili ana ili hānga, “Hi Prohona Zerubbabelli kahāng tuina: yāng einala maningma, pangshap einala maningmana, kha iwui Manglā eina kasāna, da saikorawui Prohona hānga. 7O kahaka phungrei na khikhala? Zerubbabelwui mangāli na tampāk sāhaora; kala juimeikap kaje lunggui chi ana ‘Lukhamashan, lukhamashan’ da vaolaga khuirāra.”
8Chili lāngda Prohowui tui chi ili hithāda rāhānga, 9“Zerubbabelwui pāng eina shim hiwui shimphunga sakāhaira; awui pāng eina shim hi kakupla sākupra. Chieina saikorawui Prohona ili nawuili chihokharāna kaji nana theira. 10#Phon 5.6. Khikhalajila kachikathāna kateowa otwui vang ngalang shivāmakha ringphāra, kala Zerubbabelwui pāngli tamkhavai ngalung kasing theira. Shini hi okathui hupta yangkhavai Prohowui mikna.”
11 #
Phon 11.4. Chieina ina ali hānga, “Thaomeishong hiwui uiui-yāyā oliverong khani khalei hi khikhala?” 12Kala kakhane sāda ina ngahānlui, “Thaora̱ heishok khavai sinā lengkhor khaniwui ngalemli khalei oliverongwui aphāng khani chi khikhala?”
13Ana ili hānga, “Hi khikhala kaji na matheimala?” Ina hānga “Matheimana, iwui amei.”
14Chieina ana hānga, “Hi okathui saikorawui Prohowui ngalemli khanganinga thao neomi kahaia khani china.”
Currently Selected:
ZECHARIAH 4: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
