JOHN 8

Phokaphā Sha̱nao Akhali Tukkharā

1Kha Jishuva Olive phungreili kāhaowa. 2Akhama kathā ngathorthakva Jishuna khorumshimli latunga. Chili yarui katongana ali rākuinampama kala pamzangda athumli tamchitheiphoka. 3Chitharan phophākasā sha̱nao akha ain kathembing eina Phariseebingna tukrāda saikorawui mangāli nganing ngasaka. 4Athumna Jishuli hānga, “Ojā, sha̱nao hi phophā mahunglakha tukkakhuina. 5Hikatha sha̱naoli lunggui eina horthatphalungra da ithumwui ainli Mosesna kasohaida lei. Nana khi phaningkhala?” 6Jishuwui khayon tukkhui khavai athumna kahāng kasāna. Kha Jishuna kui mashunzangda pāngmareng eina ngaleili kapi. 7Athumna ngahānshon kaji eina Jishuna nganingkāda hānga, “Morei masālak kaje mi china sha̱naopava̱ hili lunggui eina thamrithuiranu.” 8Chieina ana hamzangluishitta ngaleili kapiluishita. 9Athumna tui chi shālaga athum ava̱va̱ ngamenthui mamānhaowa; khararra eina thuida khangano tāshungda thuiserhaida sha̱naopava̱ chimāng Jishuwui mangāli nganingda leisai. 10Chieina Jishuna yangkāda sha̱nao chili hānga, “He sha̱nao, athum kali vāserhaokhala? Nali khayon mikhavai khipākha maleithula?” 11“Khipakha maleilakmana, Amei” da ana ngahānkai. “Phai, chithākha inala nali khayon mamimana. Zatulu, laga morei masāluialu.”

Jishu Okathuiwui Kahor

12 # Joh 9.5; 12.35; 1.4. Jishuna athumli hāngluishita, “I okathuiwui kahorna, ili kashura china tangkhamangli mazatluilakmara kha kharingwui kahor samphangra.” 13#Joh 5.31-39. Phariseebingna hānga, “Na khalattawui vang shākhi khamina, nana kahāng chi khamashung maleimana.” 14Jishuna ngahānkai, “Ina khalattawui shākhi milala iwui shākhi hi khamashungana, kachiwui vangkhala kaja I kachi eina rākhala kala kachili vāra̱khala kaji ina thei. Kha nathum I rākhavaila, vākhavaila matheimana. 15#Joh 7.24; 3.17. Nathumna okathuiwui apong eina bichar sai, iya khipālikha bichar masāmana. 16#Joh 5.30. Ina bichar sāsālala chi khamashungana, kaja imāng maningla ili kashirāta iwui Avā inina kasāna. 17#Khal 19.15; Mat 18.16. Nathumwui ainli shākhi khani ngaraichā eina miakha aniwui kahāng chi khamashungana da kapihai. 18Ina iwui vang shākhi mi kala ili kashirāta Avāva̱nala iwui vang shākhi mi.” 19#Joh 14.7. Chieina athumna, “Nashavā kachili leikhala?” da ngahāna.

Jishuna ngahānkai, “Nathumna ilila iwui Avālila matheimana, ili nathumna theisi kaja iwui Avālila theihairasaki kajina.” 20#Mk 12.41; Joh 7.30. Jishuna saikora hi khorumshimwui lan haikhavai kāli tamchitheida kahāngna. Kha khipānakha ali matukkhuimana, kachiwui vangkhala kaja awui atam marārangsai.

Ina Vāki kaji Chili Nathum Mavārarmara

21 # Joh 7.33-36. Jishuna athumli hāngluishita, “I thuihaora; nathumna ili phāra, phālala nathum nathumwui moreili thihaora. Ina vāki kaji chili nathum mavārarmara.” 22Chieina Jihudiwui akhavābingna hānga, “Mipa hina ‘Ina vāki kaji chili nathum marārarmara’ jili. A khalatta ngaronthihaora kajila?” 23#Joh 3.31; 17.14; 1 Joh 4.5. Jishuna ngahānkai, “Nathuma azingwui einana, iva atungwui einana; nathumva okathui hiwuina, iva okathui hiwui maningmana. 24#Joh 8.28; 4.26; 13.19; Mk 13.6. Nathum nathumwui moreili thira da ina hānghaira, kaja ‘I chi ilaka’ kaji mashitsangakha nathum nathumwui moreili thira.

25“Na khipākhala?” da athumna ngahāna. Jishuna ngahānkai, “Ina haokaphokwui eina nathumli hāngkahaina. 26Nathumli hāngkhavai kala bichar sākhavai kachungkha lei; ili kashirāta chi khamashungna, kala ina awui eina shākakhui chi okathuili kahāngna.” 27Jishuna Avāva̱wui pongli kahāngna kaji athumna matheimana. 28#Joh 3.14; 12.32. Chieina Jishuna athumli hānga, “Nathumna miwui Naomayarali khāngkakā chitharan ‘I chi ilaka’ kaji theinaora, kala iwui sāshap eina maningla, Avāva̱na tamchithei kahai chi kahāngna kaji theikhuira. 29Ili kashirāta chi ili ngasodalei; imāngli ana mahorhaimana, kaja ina awui ningyāngkhaung chi sāchinga.” 30#Joh 7.31; 10.42; 11.45. Jishuna hi kahāng kashā mi kachungana ali shitsanga.

Ningkhān kahai Mibing eina Raobing

31 # Joh 15.7; 2 Joh 9. Chieina ali shitsang kahai Jihudibingli Jishuna hānga, “Nathumna iwui tamkachithei khuisangakha kachangkhat nathum iwui sākhangatha̱bingna. 32#2 Cor 3.17; Gal 5.1. Nathumna khamashung chi theikhuira kala khamashung china nathumli ningkhān ngasakra.”

33 # Mat 3.9; Gal 3.7. Athumna ngahānkai, “Ithum Abrahamwui ara̱-azāna, kala khipākhawui rao masālakranga. Chieina ‘Nathumli ningkhān sāngasakra’ kajiwui kakhalat khikhala?”

34 # Rom 6.16; 2 Pet 2.19. Jishuna hānga, “Kachangkhat eina ina nathumli kahāngna, morei kasā mi kachiva̱ moreiwui raona. 35#Hao 21.10; Gal 4.30. Rao akhana shimkhur chiwui mi mangasāchingmana, kha naomayara chi shimkhur chiwui ngasāchinga. 36Chieina Anaomayarana nathumli ningkhān ngasakakha, nathum ningkhān kachangkhathaira, 37nathum Abrahamwui naotunna kaji ina thei, laga nathumna iwui tamkachithei mamayāmada ili shaothat khavai sai. 38Ina iwui Avāli ngasoda theirum kahai chi nathumli kahāngna, kala nathumna navā ngarāwui eina shākakhui chi kasāna.”

39Athumna ngahānkai, “Abraham chi ithumwui avāva̱na.”

Jishuna hānga, “Nathum Abrahamwui nao kachangkhatsi kaja ana kasā thada nathumla sāra. 40Kha Varewui eina shākhuilaga nathumli khamashung tui chi khamatui ili nathumna shaothat khavai ngarānda lei. Abrahamna hithada masālakmana. 41#Khal 32.6; Isa 63.16; 64.8. “Nathumna navā ngarāwui thada sāda lei.”

Athumna ngahānkai, “Ithum shāmnao maningmana. Ithumwui Avāva̱ Vare akha lei.” 42#Joh 13.3; 16.28. Jishuna athumli hānga, “Vare hi nathumwui Avāva̱na jisi kaja ili leishiki kajina, kaja I Varewui eina kharāna, kala I hili leili. I khalatta marāmana. Varena chihokharāna. 43Kathada ina kahāng nathum bhap matāthukhala? Chiya nathum iwui tui khanganā makhāngkhararwui vangna. 44#1 Joh 3.8,15; Hao 3.4; 1 Joh 2.4; Mat 12.34. Nathum nathumwui avāva̱ chipee chiwuina, chieina nawui sākhangaiva nathumwui avāwui ningkachāng kasā china. Haokaphokwui eina a mi khayumana, kala khamashung ot masālakmana, kaja awuili khamashung maleimana. Kakapik hi awui khangachāna, kaja a kakapikana kala kakapik saikorawui avāva̱na. 45Kha ina khamashung tui khamatuiwui vang nathumna ili mashitsangmana. 46#1 Joh 3.5; Joh 18.37.I morei sāhaira kaji nathum khipāna hāngshaprakhala? Ina khamashung tui hāngakha, nathum khisāda mashitsangmakhala? 47Varewui mi china Varewui tui nganai; nathum Varewui mi maningthuda awui tui makhanganāna.”

Jishu eina Abraham

48 # Joh 7.20; 10.20; 4.9. Athumna Jishuli ngahāna, “Na Samarianaona kala nali chipee zangdalei da ithumna kahāng hi mamashungmala?” 49Jishuna ngahānkai, “Ili chipee mazangmana, iya iwui Avāli khayāshi, kha nathumna ili khayāmashimana. 50Chitha-ilala I khalattawui khayākakā maphāmana; chi kaphā Akha lei, kala ana bicharwo sāra. 51Kachangkhat eina ina nathumli kahāngna, iwui tui khanganāpa chi mathilakmara.” 52Jihudibingna ali hānga, “Ara ithumna theikachangkhathaira kaja nali chipee ngasoda lei. Abraham thihaira, marānbingla thihaira, kha kachikathāna nawui tui nganaakha mathilakmara da nana hāngda lei. 53#Joh 4.12. Thikahaia ithumwui avāva̱ Abrahamli kala thikahaia marānbingli na hakmeilā? Na khipāna kajikhala?” 54Jishuna ngahānkai, “Ina khalattali tekmatei ngasakta leiakha, iwui tekhamatei chi khikha maningmana; ili tekmatei khangasak chi nathumna nathumwui Varelaka da kahānga a chilaka. 55Nathum ali matheilakranga, iya theihaira. Ina theihailaga matheimana jisi kaja ila nathum thada kakapikana. Kha iya ali thei kala awui kahāng nganai. 56#Mat 13.17; Heb 11.13. Nathumwui avāva̱ Abrahamna iwui kharā zimiksho theira da ringphai; kala ana chi theida ringphakhaihaowa.” 57#Joh 2.20. Jihudibingna hānga, “Na zingkum hangphangā makāranga, laga na Abrahamli thei kajila?” 58#Joh 1.1; 17.5,24.Jishuna hānga, “Kachangkhat eina ina nathumli kahāngna, Abraham mapharāranglakha I leisai.” 59#Joh 10.31; 11.8. Chieina athumna lunggui ngamuikhuilaga Jishuli horkida sai; kha Jishuna khorumshimwui eina ngathum sāda shokhaowa.

Currently Selected:

JOHN 8: TANGBSI

Highlight

Copy