ZECHARIAH 14
14
Umpune Jerusalem'nungtlim Raal Kardoupirou, Heitoubi Krung Khoine Thrungrou
1Thilak, Umpune pichar tounei tlaini hunglei, heitoubi naiyei putchei rapya luklouheibi nai maibongra yerkhairillouwa. 2Kouweiyo toulanungri, Keine limrap namyerwaya khumtilbi Jerusalem'ya karhane raal youyerrouwa; heirouri Khulil heiwaya kulchalyerbi luklouyerrou; heitoubi cheem kantangya umbaiyerbi putcheirap namma mulouyerrou; heirou napuiya rapyakhi chorit naimakne daimarekpirouwa; heitoubi khukarthil heiyei thimirul lhang'khatri raal manlouheibi kul chalphoprouwa, heiya khukarthil heiyei thimirap nammari tlengwane maangurchimakrou. 3Heirouri Umpune bongnungkhi raal bomra loukardoukur heinakne, maibong lhangra wathukbine limrap heiwaya karhane raal kardourillou. 4Heitoubi heiyei tlainirouri Jerusalemei kulkung lhangra klei Olive Lhungdoura Aiyei honi trumphopbi mayungeirou; heirou Olive Lhungdou heiwari kulkung rouweini kulrel lhangra lhang'khni thukne toukarkhairouwa, heitoubi heiyei tlakra phaikar marya khatne thunkhairou; heirouri Lhungdou lhang'khat heiwari khalu-lhangra khangloubi chutyerrou, heitoubi lhang'khatri khate-lhangra khangchutlourou. 5Heirouri lhungdouya toukarkhaikur phaikar kraalne nane loutrukrou; kouweiyo toulanungri, lhungdou tlakrei phaikar heiwari Azal wa'tlunglei, moi, heisiya, bongei Judah'yei Krung Uzziahyei chaanrou naiyei nutar-patar rapne linglang khngaakyei kheenrou trukkurnaksi nani trukheirou; heirouri Keiyei Dunpu, Umpune khying thimirap nammane Akou kalhonne yongeirou. 6Heiyei tlaini heirouri kwaarkhi naimakrou, thurdabi krei toukhi makkarou. 7Heiya heiyei tlaini heiwari Umpune kmu tlaini khat hoirou; nung kwaar toukhi naimakrou, heirou kmeh toukhi naimakrou; heiya asitoubi hungthukheirou, touri rawainung kwaarne kat'althutrou.
8 #
Ezk 47.1-12; Kre 22.1-2. Heirou heiyei tlainirouri asitoubi hungthukrou, touri khringei tuysir heiri Jerusalem'rei heikungthutrou; heitoubi tuysir heiyei lhang'khatri kulkung lhangei samadrura kunglhakrou; heitoubi heiyei lhang'khatri kulrel lhangei samadrura yenkunglhakrou; heirou tuysir heiwari manthral-phalbi naimakne heepmakne koongsundarou.
9Heirou Umpune tlaipangpal namyerrei doura Krung khoine thrungrou; heiyei tlaini heirouri Umpu khattom heirou Aiyei minkhi khattom khoine leirou.
10Heirouri khalu-lhangei ram Geba'rouweine Jerusalemei khate lhangrei Rimmon waphane ram namma phaikar hoiwurchirouwa; heiya Jerusalem'yari, aya karhillei klei ram rapbei doura choune mathumbangrouwa; heisi toubine Jerusalem heiwari Benjamin'yei palshung'rouweini lamkriyei louklei koknarei palshungbil wa'tlungne, heirou Hananel'yei shangkai cheem'rouweini Krungei darkha heiyui shumna palshung waphani hoirou. 11#Kre 22.3. Heitoubi thimi rapne bi heiyei rilla paalrouwa; heirou bi heiwari hanui kallengne maangrou; heiya Jerusalem'ri koukhi chinanungei bom makne malungdamni karbilni palna bi hoirou.
12Heitoubi Jerusalem'ya karhane raal kyou thimirap nammayari Umpune phar knane shardayerbi hiyerrou. Yane yaihone mayungbi leiyeinung yaiyei sha'miteerap heiri chulbi khoksundarouwa, heirou yaiyei mitlung rapkhi yai mitlhep rilla heisi chulbine toplhakrou; heirou yaiyei malei rapkhi yai taka rilla chullhakrouwa. 13Heitoubi heiyei tlainirou asitoubi hungthukrou, touri Umpune yaihangra tangne tamungyerrou; heitoubi yani khatle khat hutbangra churmanrilbine, khatne khatdei doura hutlhakrilbi norrillouwa. 14Heirouri Judah'nekhi Jerusalemei doura raal yourou; heitoubi yaya karhillei klei limrap nammaei lalthum, sina-lapakhi, kulshan, heirou phirul-phishambkhi chungwane khummallongrou. 15Heirou heinaksi phar'kna heiwari yeekna thimi rapbei rungbomra klei sapuk rapbei doura, gadha rapbei doura, ut rapbei doura, heirou ui-waarap nammaei dourakhi phar knani chansher dayerrou.
16Heirouri asitoubi hungthukeirou, touri Jerusalem'ya karhayei mayungkhou limrap nam'rouwei maleithungkur thimi napung kantangne kumserrei yane Jerusalem'ra kabine Thangwan-Shimleiyei Pu Umpu, Krungya khrumheirou, heitoubi yane Tabernacle Pucheemyei chaak'khaangnei Kneikhi markhullou. 17Heirou asitoubikhi thukheirou, touri tlaipangpallei bommai nam'rouwei hukounaksi bommai rapne Jerusalem'ra kabine Thangwan-Shimleiyei Pu Umpuya khrumchamanungri, yaidoura nung ropimakrou. 18#Isa 19; Jer 46; Ezk 29—32. Heirou Egyptrei cheemmai-bommai rapne Jerusalem'ra kamakanungri, nimanung bi heirou wachangmanungri, yaidoura nung ropimakrou; heiya yaidoura phar'knani shar dayerbi, Tabernacle Pucheemyei Kneitang markhulnara yaothungmak lim rapya hiyerkur heinaksine Umpune yaidoura hiyerheirou. 19Awane Jerusalem'ra Tabernacle Kneitang markhulnara kabi yaothungmakur Egypt rapbei doura, heirou limrap nammaei dourakhi tanti hoirouwa.
20Heiyei tlaini heirouri sapuk rapbei thirkhungtring rapra asitoubi mayebine yarcharouwa, “Umpuri Khying Hoiniyasu.” Heirou Pucheem rilla klei phuwan rapri khrahpal maibongrei khoukur marthingei kul'lhingnaksi hoiniyasu. 21Moi, Jerusalem, heirou Judah'ra klei phuwan kantangri Thangwan-Shimleiyei Pu Umpuei bomrari khying hoiniyasu; heitoubi Umpunungei khrumnaput makatrou wachangkur thimirap nammane heiraprei waloubine, heitoubi an thungnalaksu. Heirou heiyei tlainirouri Thangwan-Shimleiyei Pu Umpuei cheemwaira Canaania rapri hukhatnekhi wachangmakneasu.
Currently Selected:
ZECHARIAH 14: MARIBSI
Highlight
Share
Copy
Want to have your highlights saved across all your devices? Sign up or sign in
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.
