ZECHARIAH 13
13
Borh'rouwei Marthingthut
1Thangwan-Shimleiyei Pune shunlei, “Tlaini heirouri David'yei cheemmaile, heirou Jerusalem'ra yuldabi klei thimi rapya yaiyei borh'rouwei mardunya marthingpina'nungei tuysir bikhat pudthutdeirou.”
2“Heitoubi tlaini heirouri asitoubi hungthukheirou toubi Thangwan-Shimleiyei Pu Umpune shunlei, touri Keine ram heirouwei thrailhaei min rapya danrouwa, heiyanungri yayari hunikhi ningthutpimarou; heitoubi Keine Thimkhui rapyakhi heirou marthingmak lhawai rapyakhi ram heirouwei louthutrouwa. 3Heirouri asitoubine hungthukheirou, touri thimi hukhatne Pu'tlou shunthutdei kheenrou, aya pukpikhou pawale puiwini anungei shunheirou: Nangri ringmarou, ngamri nangne Umpuei minra mandalbi yunwurla, heirou Aya pukpikhou pawale puiwini, Ane Pu'tlou shunthutdei kheenrou aya cheine thunhatdeirou. 4Heitoubi heiyei tlainirouri asitoubikhi hungthukeirou, touri Ane Pu'tlou shunthutdei kheenrouri Thimkhui rapne mimiyei kar'ankmu tloubom rapbei ngamrou rikrai phaheirouhui, heitoubi yane miya mandalpinanungei thimkhuiyei shamb rapkhi baangchangmakrou. 5Heiya Ane yunheirou, ‘Keiri Thimkhui nimakme, keiri loutrun thimi khatme; kouweiyo toulanungri, thimi khatne keiyari douwei waiyoubine halsil thimi khoini marnopikhou.’ 6Heitoubi thimi napung-khatne anungei heingairou, ‘Neihutrei hyemna bi msei klei heiwari kouwei toukurawo?’ Heirouri ani louyunrou, ‘Awari keiyei palui rapbei cheemra leiyei kalnung touhyemkurme.’ ”
Yaosil Puya Hatdurbi Yaorul Rapya Touchekkur
7 #
Mt 26.31; Mk 14.27. “Kanthouwalo, O Raalshon, Keiyei yaosil Puya hatlaka, heirou Keiyei paluiya karhane mayunglakalo,” toubi Thangwan-Shimleiyei Pu Umpune shunlei; “Yaosil puya hatlaka, heitoubi yaorul rapya hulcheklakasu, heirou Keihut awane thimi rapbei doura karhane hollhakbi marhotrouwa.” 8Heirou asitoubi hungthukrouwa, touri “ram namma karyouni, siruk-khyumei siruk-khniri hiyerbine maangyerrouwa; heitoubi siruk-khatyari ram heirouwei himaleithung'yerrouwa,” toubi Umpune shunthutlei. 9Heirou siruk-khatdei thimi rapyari meiwaira roulhakbine, kulshanya meira ikbine toumarthingkur heinaksine, heirou sinaya meira ikbine martamthi heinaksine yaya Keine chaangh thirou; yani Keiyei minya ungeirou, heirouri Keine yanungei lourulpirou; Keine, “Yarap heiri Keiyei thimime,” toubi yunheirou; heitoubi yanekhi, “Umpuri kaiyei Dunpume,” toubine yunheirouhui.
Currently Selected:
ZECHARIAH 13: MARIBSI
Highlight
Share
Copy
Want to have your highlights saved across all your devices? Sign up or sign in
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.
