ZECHARIAH 12
12
Jerusalemei Doura Raal Darou'kyou
1Israellei doura Umpuei tloulhangei putkharit atoubi leilei, toubine Thangwan ramya sheempi Pu heirou tlaipangpallei cheemmun phunbangpibi, heirou tlaipang thimiyei rilla lhawai lhakpipu Umpune shunthutpilei. 2“Thilak, Keine Jerusalem'ya aiyei karhillei klei thimilim nammya malipyerna tulkep naksine hoiyerrouwa; heirou Jerusalem'ya raal manibi luklouyei kheenrou Judah'yakhi karhayerrou. 3Heitoubi tlaini heirouri asitoubine hungthukheirou, touri Jerusalem'ya Keine thimirap nammanungei khrit thlungmtum khat hoiyerrouwa; heirou tlaipangpallei limrap nammane Aya karhane kartilbinekhi, thlungmtum heiwaya khangloukur thimirap nammaya yaidoura daphopnabine harhar thukni nanchaalheirou.” 4Umpune shunthutpilei, ‘Heiyei tlaini heirouri Keine sapuk rapya hulmathunrou, heitoubi sapuk'tung raallui rapyari tamungyerrou. Heiya thimi rapbei sapuk rapya mitlung deoyerbi manokyerrei kheenrou, Judah'yei cheemmai doura Keiyei mitne yukthrilpirou.’ 5Heirouri Judah'yei cheemkhur upa rapne yaitamei ukningra ningchabine yunrilheirou, ‘Jerusalem'ra klei thimi rapri yaiyei Dunpu, Thangwan-Shimleiyei Pu Umpuei ngamrou Keinungei mantrang hoinalei.’
6“Tlaini heirouri Judah'yei cheemkhur upa rapya Keine meimkarei meiyu hangrei yungphu dourei khaangsha naksine hoiyerrou, heirou cha sphal hangrei albi klei meishar naksine hoiyerrou; heitoubi yaya karhillei klei lim rapbei thimirap nammaya, thya lhangrakhi heirou thyoi lhangrakhi yani kontlumchirou, heiya Jerusalem'rei thimi rapneri ai'aiyei leinabi Jerusalem'ra hanui kallengni yuldabi paalthurou.”
7“Umpune Judah'yei cheemkhurya lamkrini kalpirou, heitoubi David'yei cheemkhurrei thang lhangaile Jerusalem'ra yuldabi klei thimi rapbei thang lhangai heiwane Judah'ya duini tangrouri nimak. 8Tlaini heirouri Jerusalem'ra yuldabi klei thimi rapya Umpune lousoupibi kalpirou; heitoubi yaihangra yerrouwei shul thimiyakhi heiyei tlainirouri David naksine mantrang hoirou, heirou David'yei cheemkhur bommairi Dunpu naksine hoirouwa; heirou yai maibongra Umpuei Thangring naksine hoirouwa. 9Heitoubi heiyei tlainirouri asitoubi hungthukheirou, touri Jerusalem'ya karhane wathukkur limrap nammaya Keine raphathutbi maangyerrou.”
Thunhatkur Khatpanung'tlim Yane Kanrel Laasher
10 #
Jn 19.37. “Heirou Keine David'yei cheemkhurrei dourale Jerusalem'ra yuldabi klei thimi rapbei doura kringpikheile, khrumchanei lhawaiya shungsundapirou, heiyanungri yani Keiya thunhatkur heiwaya yaimit rungrungni muthungbi, heirou yani Anung'tlim kanrelbi, thimi khatne aiyei chanapawa samranya pukbi hikur heiwaya kanrelbi ukning klahne chapkur heinaksine chapbeirou. 11Heiyei tlainirouri Megiddo'yei phaikar Hadadrimmon rapne kanrelbi chapkur heinaksine, Jerusalem'rakhi kanrellei chapnei houni karlhinheirou. 12Heitoubi ram heirouri bommai kantangne mi-miyei khi kanrelni chapbi leichirouwa; David'yei cheemkhurei bommai rapkhi laini chaprou, heirou yaiyei nu-cha rapkhi laine chapbine leiheirou; heitoubi Nathan'yei cheemkhur bommai rapkhi laine, heirou yaiyei nu-cha rapkhi laine chapbi leirou. 13Levi'yei cheemkhur bommai rapkhi lailaine, heirou yaiyei nu-cha rapnekhi laine chapbi leirou; heirou Shimei'yei cheemkhur bommai rapnekhi laine, heirou yaiyei nu-cha rapnekhi laine chapbine leirou. 14Heitoubi maleithung cheemkhurei bommai'rap nammakhi, mi-miyei lailaine, yaiyei nu-cha rapkhi lailaini khi-kanrelbine chapbi leirou.”
Currently Selected:
ZECHARIAH 12: MARIBSI
Highlight
Share
Copy
Want to have your highlights saved across all your devices? Sign up or sign in
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.
