MATTHEW 6

Kringrilbi Pirilnei Ngamrou Shunmatupi

1 # Mt 23.5. “Thimi rapbei maibongra yane mulaksu toubi nane lhawaiyei lhangai lhouya toukarsamak; heirou nane toukarsalanungri Thangmunrei klei naiyei Pawane klahman koukhi pimakrou. 2Heinakne nane kanring thimi khatnung koukhat malanyeinung, lhangai karsa thimi rapne Pukhrumna Cheemra Dunpu'nung makatdeinung mideine mulaksu toubine mitdowei makatnakne, heitoubi khullamrakhi heirou thimichung kartilnabi keithil tlailamkhi yaiyei put malan heiwaya muthungbi yaya mathanglaksu tounakrimne mantrongmak. Keine nanungei tanghakne yunlei, yanaksi heirapri yai touwurnei klahman namyerwa phawurchila. 3Heiya nangne minungei putchei malanyeinung neiyei thyarei hutni kouya malanleiyo tou heiri thyoirei hutya muthungyermak. 4#Col 3.23-24. Heinakrimne naiyei put malan heiso mitdomakei pi'kril hoilak; heirou naiyei Pawane munne thithungbi nanungei klahman pieirou.”

Dunpunung Shunchanei Ngamrou Shunmatupi

(Lk 11.2-4)

5 # Mk 1.25; Lk 18.10-14. “Nane Dunpunung shunyeinung toukarsa thimi rapnakne hoiyermak! Yari Pukhrumna Cheem rilwaira thimichung maibongra, heitoubi khullam ruira mayungbine thimi nammane mulaksu toubi shuncha'kniso. Heine keine nanungei tanghakne shunlei. Yari yai churnei klah-manri phawurla. 6Heiya nane shunchayeinung cheemwaira hungchangbine cheem thungphopbi, mitdei muphamakei klei Pawanung shunchalak; heine naiyei Pawane munne leibi nanungei buchanei manya pirou. 7#1 Kr 18.25-29. Nane Dunpunung shunyeinung, Gentile rapbei naksine tlouchuiya karhol-karhol yunmakne shunchalak; ngamri yane karhol-karhol ungraochabi shunchakur heiwaya yaiyei thrai rapne loumayekrou nakrimne uklumlei. 8#Mt 6.32; Lk 12.30. Heiya nari yaiyei'nakne toumak. Nane buchabongnung lamkrine naiyei Pawane namyerwa loumulei. 9#Lk 11.2-4. Heiyanungri nane buchayeinung asitoubi buchalak. ‘Thangmunra klei kaiyei Pawa. Neiyei khyingei min heiri thang aldui hoiniyasu; 10Neiyei Krungram yongasu; Neiyei kning heini Thangmun ramrei'nakne tlaipangrakhi hoiyasu. 11Kanungei tlainiserrei chaanung-mainungkhi yukpilak. 12Heirou kanung klallei lhou toukur rapya kani kukpikur'nakne, kaiyei klal touwurkhou namyerwakhi kukpilak. 13#2 Th 3.3; Jn 17.15; Jas 1.13. Heitoubi kaya malhimnara dayerpimak, heirou kaya lhangaimak hutshui-hoshuinarei ralthutpilak. 14#Mt 18.35; Mk 11.25-26; Eph 4.32; Col 3.13. Nanungei klal toukur thimi rapya kukpilanungri, Thangmunra klei nai Pawanekhi naya kukpirou. 15Heiya nane mideiyei klalya kukpimakanungri, nai Pawanekhi naiyei klalya kukpimakrou.’ ”

Cha'kmai Ngeinei Ngamrou Shunmatupi

16 # Isa 58.5. “Heirou nane cha'kmai ngeiyeinung, lhangai karsa thimi rapbei naksine naiyei mairung heiri klahyei lhimya mutmak. Heiyei ngamri yaiyei cha'kmai ngeibi klei heiwaya mideine mulaksu toubine yaiyei mairungrap heiwaya mu'kyer. Keine nanungei tanghakne yunpilei, touri yai heinaksi touwurnei klahmanri phawurla. 17Nane cha'kmai ngeiyeinung naiyei mairung rapya lhamathaibi, naiyei lurakhi shirek teibine karbilne leila toubi; 18#Mt 6.4,6. naiyei cha'kmai kngei heiwari thimi deiya muyermak-heiya mitne muphamak nai Pawa'tomni heinakya mupibi, heirou Ane nanungei klahman pirou.”

Thangmunrei Laldun

(Lk 12.33-34)

19 # Mk 10.21; 1 Tm 6.17-19; Jas 5.1-3. “Rikwaine heirou khlungne shaitumwur'nungei, heirou thirdine souphopburnung, heitoubi mucha thimi rapne thleipur phorputbi muloukur kya tlaipangdoura neiyei lal marpeibi khoumak, 20heinung'tlimri rikwaile khlungnikhi shaitlumchangmak, thirdee'nekhi souphopchangmak, heirou mucha thimi rapnekhi mulouheichangmakna ram Thangmunra naiyei lalya marpeikhounanung toulak. 21Kouweiyo toulanungri, naiyei ukning-solung heiri naiyei lal marpeikhouna bira kardonbi leikaryomrou.”

Sharungei Kwaar

22 # Lk 11.34-36; Mt 20.15; Mk 7.22. “Mitlung heiri sharungei meishar, heine ngam hoibine neiyei mit-thi heine chimmanungri sharung namne waaryerrou; 23Heitoubi neiyei mit'thril heine chimmakanungri, neiyei sharung pulne warmakne mehnara leirou. Heinakrimne neinungei klei kwaar heiri mehwuranungri, kmeh heiri kounakbil hoirou!”

Dunpule Tlaipang Khintamyei Lhoubom Rapbei Pu

24“Hu'khatnekhi pu khintamyei rui-ur shok hoichangmak. Ane pu khatya malungshiyeinung khatyari machinrou; heirou ane napung khatdei shunya chanthungeinung napung khatyari yorcharou. Heinakrimne nane Dunpule tlaipangei lal khintamyei rui-ur shok hoichangmakrou. 25#Lk 12.22-31; 10.41; 12.11; Php 4.6; 1 Pt 5.7. Heiyei ngamrou keine nanungei kyunri, nane ringnanungei kouya chamaiserou, heirou nai sharungra kouya upbine ringserouwo toubi lhawai klahne kardonmak. Naiyei lhawai heiri ukchakya duine manklu, heirou naiyei sharung heiri phirulya duine manchungme touri mumako? 26#Mt 10.29. Nungthourei traichabi klei ramwaa thralya thilak, yane lung tuklhakhi naimaklei, trunwai luklhak toukhi naimak, heitoubi chapongkhi dunmaklei; heiyanungkhi naiyei Thangmunrei Pawane yaya dunpilei. Heini nari ramwaa rapya duine manklu thimi hoimaka? 27#Laa 39.5. Heirou nane heinungei'tlim lhawai lahbine naiyei chaanya hutchu-engkhatnak shaangduiyer manirouko? 28Heitoubi nane phirul'nungtlim kouya uksanung leirou? Thilak koutoubi ramhangrei par rapne katpukbi parleiyo. Yane koulhoukhi churmaklei, muiphai shinbine yai upnungei phi kyek toukhi naimaklei, 29#1 Kr 10.4-7; 1 Ch 9.3-6. Heiya Keine yunlei, touri Krung Solomon'hakniakhi aiyei lalthum klei heiwane phirul-phishamb lhangaiya lobinekhi ramhangrei par khatdei lhangainakne kansamkhoumak. 30#Mt 8.26; 14.31; 16.8. Angtuei tlainirou ringbine, ningatou tlainirou meimkara iklhakbine hongkur kya ramhangrei heengna-rona rapyakhi Dunpune heinakbil lhangaiyerlari; Hey! malungamnamak thimirap, kousiyabi Dunpune nayari phirul mansambaangmakrou?

31“Heirou nane: ‘kouya chaserou? Mongnungri koura louserrou? Upnungri koura raphaserou?’ toubine naiyei lhawai kanwangmak. 32(Heinakei lhoura Gentile rapri lhawai lahcheklei.) Heiya naiyei Thangmunrei Pawane nai ukningrei kanwang namyerwa yukmupilei. 33#Mt 19.28; Mk 10.29-30; Lk 18.29-30. Heinung'tlimri, nane Upawaei Krungramya, heirou Aiyei chimya rapharilak, heirou Aiyei kningya touribine, naiyei kanwangei kanchekcha namyerwa heiso Upawane pirou. 34Ngam heineri nane ningaeinung toubine koukhi ukningra plangmak; touri, ninganungri ningayei tlainirou heisi louleirou. Kouweiyo toulanungri nung-khatnuiyei churnei klahman heiwane tlaini heiyei kro hoirou.”

Currently Selected:

MATTHEW 6: MARIBSI

Highlight

Copy