MATTHEW 5

Lhungdourei Marnopi Pao Lhangai

1 # Lk 6.1,20-23; Mk 3.13; Jn 6.3. Thimi chungne kartilbi loukleiya mubi Jesu'ne lhungdoura kakakur, heitoubi Ane bi khatra ombi leiyeinang Aiyei ruishik rapne Aiyei leinara karhilni wakar'umkur, 2heirou Ane yanung loushunmtupikur.

Chim Nungkngai

(Lk 6.20-23)

3 # Mk 10.14; Lk 22.29. “Lhawaira kanring thimi rapri likarsui lhangai; ngamri Thangmunyei Krungram heiri yaiyei hoirou!”

4 # Isa 61.2; Jn 16.20; Kre 7.17. “Klah kanrel thimi rapri likarsui lhangai; ngamri Dunpune yaiyei malung damyerpirou!”

5 # Laa 37.11. “Ukning marnim thimirap heiri likarsui lhangai; ngamri yane Dunpuei tlou kantompiya pharou.”

6 # Isa 55.1-2; Jn 4.14; 6.48-51. “Dunpuei kningya touknine ukningra tangne madu thimirap heiri likarsui lhangai; ngamri Dunpune yai kning heiwaya tlungyerpirou!”

7“Thimi deiya kringpikhei thimirap heiri likarsui lhangai; ngamri Dunpune yaya kringpirou!”

8 # Laa 24.4; Heb 12.14; 1 Jn 3.2; Kre 22.4. “Ukning khying thimirap heiri likarsui lhangai; heiyei ngamne yane Dunpuya mupharou!”

9“Kyingnung'tlim lhoutou thimirap heiri likarsui lhangai; ngam heine yaya Dunpune Aiyei chanaorap toubi ungpirou!”

10 # 1 Pt 3.14; 4.14. “Tharmu chimnung'tlim marhotdurbi klah-knang phakur thimirap heiri likarsui lhangai; ngamri Thangmunyei Krungram heiri yaiyei hoirou!”

11“Thimi rapne naya sammurbi, heirou marhotbine klah-knang piyanungri, heirou Keiyei ngamrou naidoura thimi deine mandallei tlou yunbi klal theibaanglanungri likarsui lhangai.” 12#2 Ch 36.16; Mt 23.37; Pao 7.52; 1 Th 2.15; Jas 5.10. Nane nungkngai houklum hoiyalo, ngamri nanungei Thangmun ramra klahman tangne marshikbine khoulei. Heinakrimne nai maibongra louklei Thimkhui rapyakhi mine kalthi marhotbi klah-knang piwurkhou.

Mitti Heirou Kwaar

(Mk 9.50; Lk 14.34-35)

13 # Mk 9.49-50; Lk 14.34-35. Nari tlaipangpallei mitti. Heiya mitti heine aiyei mnik makkuranungri, koutoubi mitti heiwaya hanui mnikyerchangrou? Heiyanungri mitti heiri thleira khingsundabi thimine tatmnuikur nimakne koukhi karsukmakrou.

14 # Eph 5.8; Php 2.15; Jn 8.12. Nari tlaipangpallei kwaar. Lhungdoura phunbaangkur krungkul heiri kouniroukhi yulkhouchangmak. 15#Lk 11.33; Mk 4.21; 1 Pt 2.12. Hu khatnekhi shirek meisharya manshokbi shangphaine mkhupkhalbi khoumaklei; heinung'tlimri meishar dunna doura dunbaangbine, cheemwairei klei namyerwaya waarkaryoukyer. 16Heinakrimne naiyei kwaar heikhi miyei maibongra waaryerlak, heiyanungri yane naiyei lhangai lhou heiwaya mupharou, heitoubi nai Thangmunra klei Pawaya mathangrou.

Chaylamyei Ngamrou Shunmatupi

17“Keiyei kyong awari Moses'yei chaylamya, heirou Thimkhui rapbei shunmatupikhou rapya maangyernanungei kyongme toubi ningchapimak; heinung'tlimri heirapya chimne tlungyernanungei kyong. 18#Lk 16.17; Mk 13.31. Keine nanung tanghakne yunlei, ‘Thangmun-tlaipangne trimbongyenri, chaytlourap heiwaya namma tlungyerbongyenri, yerrouwei mandidui myek khatchakhi maangmakrou. 19#Jas 2.10. Heiya hoiyanungri hukounak khatne chaylamyei tlou rapya lhouhoimakne, minungkhi heinakrim lhouhoimakne shunpilanungri, aya Thangmunyei Krungramra mandi thimi hoiyerrou. Heiya hu khatne chaylamya hilthungbine minungkhi heinakrim shunmtupilanungri, heirou ayari Thangmunyei Krungramra tangyerpirou. 20Heiyanungri Keine nanung yunlei touri nane tloulamei uparap heirou lhangai karsa thimi rapya duine Dunpuei kningya malungam kya khat khoine hilthungbi lhou toulanungri Thangmunyei Krungramra changchangrou.’”

Malungkhaei Ngamrou Shunpi

21 # Hoy 20.13; Khn 5.17; 16.18. “Bongei thimi rapnung shunmtupi heiri nanekhi mayekla, touri ‘thimi hatmak; hukounak khatne heinakya toulanungri aya chuiyernanung tlou darrou.’ 22Heiya asinung keine nanung yunlei, touri hu khatne aiyei teinaowei doura malungkhapilanungri aya chuiyernanung tlou darou; heitoubi huhuni aiyei teinao khatya ‘nangri koukhatroukhi karshukmak#5.22: manthamakne laokna. thimime!’ toubi khremnalanungri aya Yama kullei maibongra urthutrou; heirou huhuni aiyei teinao khatya ‘nangri yuntlungmak thimime’ toubi yunlanungri, a heiri khiya ramyei meikhurra changrou. 23Ngamri nangne Dunpu'nung khrumna put makatnung leiyanungri heirou neiyei teinaowani neidoura yanimakne karhoukril kleime toubi nangne ningmulanungri, 24neiyei khrumna put heiri khrahpal doura lakurkhoubine; heirou neiyei teinaowei bira hungbine aiyei malung damyerrilak, heitoubi nangne heikallengbine Dunpu'nungei khrumna put heiya makatlak. 25#Lk 12.57-59. Hukounak khatne neidoura klal theibaangbine pichar bomra urlanungri, heirou neiya pichar puei hutra pilhakbongnung neiya klal theibang thimi heile khrangne karnakbi palui hoinanungei tourilaka. Hei nimanungri neiya pichar puei hutra pibangurbi, heirou Ane sipaiyei hutra pithutbi, heirou yane neiya laine manlouheibi phatopra kul chalphoprou. 26Keine nanung kyunri, bi heirou nane chuibongyen leirouwa.”

Minu-Micha Thernei Ngamrou Shunmatupi

27 # Hoy 20.14; Khn 5.18. “Nane asitoubi yunkhoupi heiya mayeklarou, touri ‘minu-michaya thernung yamak.’” 28Heirou keine nanung yunpilei; hu khatne napuiya khatya aiyei mitni thibi, heirou Ane napuiya heiwiya aiyei ukningra madulanungri, aiyei ukningrei madu heini napuiya heiwiya minu klallei lhou touwurla. 29#Mk 9.43-48; Mt 18.8-9. Heinakrimne neiyei thyarei mitlungni neiya borh touyerlanungri, neiyei mitlung pangkhat heiya kholthutdurbi tlatnara khingurlaka! Heiwini neiyei sharung namyerwaya khiya ramra changyerkurnung tlimri, neiyei mitlung pangkhat heiya kholthutdurbi khingkurni dui lhangai. 30Heitoubi neiyei thyarei hut heine neiya borh touyerlanungri, neihut pangkhat heiya dintatdurbi khingurlaka! Neiyei sharung pulne khiya ramra changkurnung'tlimri neihut pangkhat dintatkurni dui lhangai.

Nu Karkhainei Ngamrou Shunmatupi

31 # Lk 16.18; Mk 10.11-12; Mt 19.9; 1 Co 7.10-11; Khn 24.1-4. “Asitoubikhi yunkhoulei, ‘hukounak khatne aiyei nu karkhaiyurou dawanungri, napawa heine aiyei nu heinungei karkhainei ya'kril tlou rapya mayebine nunungkhi pilaksu.’ 32#Mt 19.9; Mk 10.11-12; Lk 16.18; 1 Co 7.10-11. Heisiya hoiyanungkhi asinung keine nanung yunlei, napawa khatne aiyei nu heiwane mishalle lalrilnei lhou toukur nimakne karkhairou dawanungri, aishal heine napuiya heiya mishalle lalkrillei lhoura da'kyer. Heitoubi karkhaikur napuiya heiwiya klou napawa heikhi minu klal thimi hoirou.

Tlou Kantomrilnei Ngamrou Shunmatupi

33 # Mt 23.16-22; Jas 5.12; Lev 19.12; Msh 30.2; Khn 23.21. “Nane bongei thimi rapnung yunmatupiwurkhou heirapkhi mayeklarou, touri ‘nane klallei lhoubomrou kantomrilmak, koungameiyo toulanungri Dunpu'nung nai kantomrilkur namyerwa heiri heisi hoirou.’ 34Heirou keine nanungei asitoubi yunlei; Nane Thangmunya mintlangbine tlou kantomrilmak, koungameiyo toulanungri Thangmunram heiri Dunpuei Krungbom; 35#Isa 66.1; Pao 7.49; Laa 48.2. heitoubi tlaipang-thleiyakhi mintlangbine kantomrilmak, heiyei ngamri thleidou awari Dunpuei ho trumna bi; heitoubi Jerusalemyakhi mintlangbi kantomrilmak, ngamri bi heiwari Krung khatdei Krungkul khat. 36Neiyei lu churbine tlou kantomrilmak, kouweiyo toulanungri nangne neiyei lurei sam rapya khatchatomkhi ngouyerreise nimanung mongyerreise toubi manirou nimak. 37Heinung'tlimri neiyei tlou heini ‘moi’ toulanungkhi toulaka, nimanung ‘hoimakrou’ toulanungkhi toulaka-nimakne heiya duine kantomlanungri lhangaimak puei hoirou.”

Khlang Lhaknei Ngamrou Shunmatupi

(Lk 6.29-30)

38 # Hoy 21.24; Lev 24.20; Khn 19.21. “Atoubi kyunri nane mayekla, touri ‘Mitlungei khlangri mitlung, heitoubi haei khlangni ha.’ 39#Lk 6.29-30; 1 Co 6.7; Rom 12.17; 1 Pt 2.19; 3.9; Par 24.29. Heiya keine nanungei kyunri, hukounak khatne neinung klallei lhou toulanungkhi heinung'tlim nangne khlang lhakmak. Heinung'tlimri hukounak khatne neiya thyarei maibira umlanungri, neiyei thyoi lhangrakhi loukallekpilak; 40heitoubi hukounak khatne neiyei linglik lungninei ngamrou pichar bomra urnung leiyanungri, heirou nangne anungei neiyei phi'upkhi lhukpiwurlak; 41hukounak khatne neiya lamtup khat aiyei putyum urtrungpinanung watyillanungri, heirou nangne lamtup khni phane ale kalhonbi urtrungpilak; 42heitoubi neirouwei bucha'kni thimi heinungei loupichalak, heirou neiyei klei heiwaya pukloukni thimi heini wabuyeinung loukartleirmakne anungei loumlanpilak.

Karhoukril Thimiya Malungshipi

(Lk 6.27-28,32-36)

43 # Lk 6.27-28,32-36; Lev 19.18; Par 25.21-22. “Nane asitoubi yunkhoukhi mayekla, touri ‘naiyei palui rapya malungshilak, heitoubi neiyei karhoukril thimi rapya machinlak.’ 44Heiya arou keine nanung kyunri. ‘naiyei karhoukril thimi rapya malungshilak, heitoubi naya marhot thimi rapnung'tlim shunchapilak, 45heisi toulanungri nane Thangmunrei nai Pawaei chanaorap hoirou.’ Ngamri Ane lhangai thimi rapnung'le lhangaimak thimi rapnungkhi khatnakdik khoine yuk'alnanungei kinniya sheemkhoupi, heitoubi lhangai lhoutou thimi rapnung'le lhangaimak lhoutou thimi rapnungkhi nung rosundapinanung marshikpi. 46Neiya malungshi thimi rapyatom nangne malungshilanungri koutoubi Dunpune neinungei heiyei klahmanya pirou? Khulrui thou thimi rapnekhi heisibil toukhoumak! 47Heitoubi nane naiyei palui-teinao rapyatom rikrai khrumbine, deiyari nane kounakei lhangaiya toupirou? Heinakyari Gentile rapnekhi toukhou nimaka? 48#Lev 19.2. Ngamri naiyei Thangmunrei Pawaei rongtlungnakne nanekhi rongtlung thimirap hoiyalo.”

Currently Selected:

MATTHEW 5: MARIBSI

Highlight

Copy