MATTHEW 20

Darkha Yekullei Lhouchur Thimirap

1 # Mt 21.28,33. “Thangmunyei Krungramri anaksilei. Bongnung napawa napung khatne aiyei darkha yekulra lhou churyernanung thimi tha shunpharou wathukkur. 2Heirou ane thimi rapnung tlainiserrei churneiman pinungei yunkril, heirou thimi napung khatnung nungkhatnuiyei lhou churneiman tuychui denari khatsol pinungei toubine aiyei yekulra yaya watyilkur. 3Heitoubi ani ningshunnung keithilla wathuknarouri, thimi thani koulhoukhi churmakne loumayung munarouri, 4Ane yayakhi chillouheibine kyun, ‘Nakhi keiyei yekulra lhou churlaklo, keine naiyei klahman lhangaine pirou’ toubi shunbine watyilkur. 5Heisi tounarou yanekhi chakur. Heirou hanuikhi ani nunghangnungkhi, heirou rawainungkhi heinakrim thimi raphabi watyilkur. 6Heitoubi rawai kinni yongchiprou waiyouweinungkhi ani keithilla wathukyeinung heinakrim koulhoukhi churmak thimirap tha loumayungbi klei munarouri, ani yanung kyun, ‘Nane koulhoukhi churmakne bi arou nunghangfchip leikuri koutouneiyo?’ 7Heirou yane loumallang, ‘Kayari hukhatnekhi lhou churnungei watyilmakme!’ ‘Heiyanungri lhangaiya, nane keiyei yekulra wabine lhou wachurlak’ toubi ane yayakhi watyilkur. 8#Lev 19.13; Khn 24.15. Heirou yenrawaikur heirouri, darkha yekulpu heini aiyei yekul thikul thimi rapya shun, ‘Nane yekulra lhouchur thimirap nammaya ungmarkumlaka, heitoubi ya napung khat-khatdei churnei klahman yerpilaka, lhou churnei klahman heiri rawaiyei hilto rapnung yeryourilak, heitoubi ningshunnei lamkri thimi rapnungri yerpitolak.’ 9Rawaiyei lhou churnarei yaoto thimi rapnungei churnei klahman heiri tuychui denari khatsol pilak. 10Heirouri ningshunnei lhou churyoukri thimi rapneri yanungei churnei klahmanri duine pirouwame toubi louningcha; heiya yanungeikhi tuychui denari khatsolcha yerpikur. 11Yane tuychui heiya louheibi yekul punungei tlou makatbi ngalkur. 12Heirou yane kyun, ‘Lhou churnara wayaoto thimi rapri kheen khattomcha wachurthung, heirou kari nunghangfchip nungshadourei louchurkur, heiya nangneri kanungei pinakrimne yanungkhi lhouchurnei klahman khatnakdik malknane pileinu!’ 13#Mt 22.12; 26.50. Heirou yekul pune napung khatnung, ‘Thilak, keipalui, keine naya thi'msitnei toukur nimak,’ toubi loukyun, ‘Awari na namyernungei nungkhatnuiyei lhou'churnei klah'manri tuychui denari khat hoiroume toubi yarilbine lhou churkyer. 14Heineri asinung nane churneiman awaya loubine cheemra shallaka. Keine hiltoei lhouchurkur thimi rapnungkhi nanungei pikur'naksibil pi'kni. 15#Mt 6.23; Mk 7.22; Khn 15.9. Keiyei tuyri keine pi'kni heisibil pikurri chimmakrouko? Nimanungri keine mi deinung piduiwurnei ngamrou nane keiya karhalko?’ ” 16#Lk 13.30; Mt 19.30; Mk 10.31. Jesu'ne asitoubi yunbi luilhakur, “Heiniri hilto thimini lamkri hoirou, heitoubi lamkri thimini hiltorou.”

Jesu'ne Aiyei Hirou younei Ngamrou Khyumbui Tlungni Yunthutkhou

(Mk 1.32-34; Lk 18.31-34)

17 # Mt 16.21; 17.12,22-23; Mt 26.2. Jesu'ne Jerusalem'ra kayeinung Ane Aiyei ruishik napung chiple khniya ruilouheibi munne shunmatukur. 18“Louninglak, kani Jerusalem'ra karouwa, heitoubi bi heirou Thimiyei Chanapawaya Suipipu uparap heirou Chaylamyei upa rapbei hutra pilhakrouwa. Heirouri yane Aya hatdurnanungei koukouya theibaangpirou, 19heitoubi Gentile rapbei hutra malanthutdurbi, heirou yane Aya laonawurbi, umphitkhi touwurbine heirou yane heeng-karbakra manyarhatrou; heiya tlaini khyumniyei hillou ringthutdurthurou.”

Puiwi Khatdei Bucha

(Mk 10.35-45)

20 # Mt 8.2; 9.18; 15.25; 18.26; Jn 9.38. Heirouri Zebedee'yei nuni aiyei chawarap napung-khnile kalhonne Jesuei leinara wabine, Aiyei maibongra khuklu kanthrunchabi tloubom khatnung'tlim buchakur. 21#Mt 19.28. “Kouya touyerkniyo?” toubi Jesu'ne anungei loukngai. Heirou ani loumallangkur, “Nangne Krung hoiyeinung keiyei chawa ya teinao-khni aya, khatya neiyei thya lhangra heitoubi khatne thyoi lhangra omyerpinanung keiyei maibongra tlou bei kantomkhoupilak.” 22#Mt 26.39; Jn 18.11. Heiya Jesu'ne anung loukyun, “Neiyei buchakur heiri kouwo touri nangne mumaklei.” Jesu'ne napuiya heiyei chawarap napung-khni heirapnung kyun, “Keiyei mongrou kyou klah-knangei daarkok awaya nakhu-teinaone mongchangrouwa?” “Moi, kakhu teinaokhi mongchangrou,” toubi yane loumallang. 23#Pao 12.2; Kre 1.9; Mt 13.11. Heirou Jesu'ne shun, “Moi, nane mongchangkhi kya, heiya nakhunta teinaoya khatya Keiyei thya lhangra, heitoubi khatyane thyoi lhangra omyerrouri Keiyei toubom thukri koukhi mak. Heiya bomrap heiri Keiyei Pawane Aiyei khalthutkur thimi rapnungei marshikbi khoukurra.” 24Heirouri ruishik napung chipni heitoubi kyunya mayeknarouri, yane teinao napung-khniyei doura malungkhakur. 25#Mk 10.42-45; Lk 22.25-27; Mt 26.28. Heitounei Jesu'ne ya namyerya ungmartilbi shunkur, “Nane kmu touri Gentile rapbei upa rapne yaidoura pu kansabi klei, heirou yaiyei ruipipu rapne yaidoura manibi klei. 26#Mt 23.11; Mk 9.35; Lk 9.48. Heisiya hoiyanungkhi, naihangrari heinaksi hoimakneasu. Heirou na hukounak khatne tang thimi hoiniyanungri, a heiri namyerrei shok hoiriyasu; 27heitoubi na hukounakne lamkri thimi hoiniyanungri, a heiri naiyei shok hoiriyasu. 28Thimiyei Chanapawa heini, thimi deine Aya watlhou touyernanungei kyong nimak, heiya Ane minungei watlhou toupinanungei, heitoubi miya kalpinanungei Aiyei rongchanya malhetpinanungei kyongme.”

Jesu'ne Mitdeo Thimi Napung-khniya Lhangaiyerpi

(Mk 10.46-52; Lk 18.35-43)

29 # Mt 9.27-31. Jesu'ne Aiyei ruishik rapkou Jericho Khokulya lakurkhoubi shaalkur heirouri, thimi chungwane yaihilla heichanthungkur. 30Heitoubi mitdeo thimi napawa napung-khnine lamruira ombi louleinarou, Jesu'ne yenralkur heiwaya yakhuntane loumayekthungkur, heisi tounarouri yakhuntane lou'ungraochakur, “David'yei Chanapawa, kaya bei kringpilo, Upawa!” 31Heitounei thimi rapne yakhuntaya mulleiyalo toubi shunkur. Heiya yakhuntane loudongnung'tlimri duiduine lou'ungraobi kyun, “David'yei Chanapawa, kaya bei kringpilaklo!” 32Heirou Jesu'ne yai ungraochaya toudongurbi, Ane yaya ungbi, “Nane Keiya nainungei kou touyerkniyo?” toubi kngai. 33“Upawa,” yakhuntane loukyun, “Kane neiya kaiyei mitdeokur awaya lhangaiyerknime.” 34Heirouri Jesu'ne yakhuntaya kringurbi yai mitlungra palpibine lhangaiyerpikur; heirouri yai mitlungrap heiwari mingbi mu manikur, heirouri yane Aiyei hilla chanthungkur.

Currently Selected:

MATTHEW 20: MARIBSI

Highlight

Copy