MATTHEW 19

Nu Karkhainei Ngamrou Jesu'ne Shunmatupi

(Mk 10.1-12)

1 # Mt 7.28; 11.1; 13.53; 26.1; Eph 5.31; 1 Co 6.16. Jesu'ne tlourap heiwaya shunmatupi luiwurhillou, Ane Galilee ramya lakurkhoubi Jordan Kung seralla klei Judeayei ramranung wakur. 2Heirouri thimi chungwane Aihilla heichanthungnarou Ane kna thimirap kounakya raiyerkur. 3Heitoubi bi'heirou Lhangai karsa#19.3: Pharisee. thimirap thani wabi Jesu'ya yaiyei chaangra mannanungei tlou wakngai, “Napawa napung khatne aiyei nuya kounaksi tloubom khatrou aiyei kningei hilthungne karkhaikur heiri kaiyei Chaylamni yarouko?” 4#Kan 1.27. Jesu'ne loumallangkur, “Nane Khying Pu'tlouei lailikra asitoubi kyunri pabi mumakhuiko, touri, tlaipang kanretirnung Dunpune thimi rapya napawale napuiya sheemkhoupi nimako? 5#Kan 2.24. Heitoubi Dunpune shunkhou, ‘Heiyei ngamne, napawa heini aiyei pui-paya lakkhoubi heirou aiyei nule leimalnarou, heirouri ya napung-khni heiri sharung khat hoirou.’ 6Heisi toubi yakhuntan heiri napung-khni hoimakarou, heiya napung-khatnak hoirouwa. Heineri Dunpuei kartilyerkur heiya thimi rapne yakhuntaya toukarkhaimakneasu.” 7#Khn 24.1-4; Mt 5.31. Heirou Lhangai karsa rapne anungei tlou hanui ngaithu, “Heiyanungri kousitounei Moses'yei Chaylamni kyunri, napawa khatne nu karkhainei tloubom rapya yarilbine lailik myebine heirou aiyei nunungkhi pibine aya hilmallengbi karkhaikur kya touri koungammei?” 8Jesu'ne loumallang, “Moses'yei Chaylamni heisitoubi nanungei nu karkhainei yapikur heiyei ngamri, nari shunmatunungei beimakne lah'kna. Heiya bongnung tlaipang kanretirnungri heinakbil hoikhoumak. 9#Mt 5.32; Lk 16.18; 1 Co 7.10-13. Keine arou nanungei chimne yunpilei, touri, kounakne napawa khatne, aiyei nu heiwane mishal'le lalrilnei lhou toukur nimakne, ngam deinung'tlim karkhaiwurbi, heitoubi ani nudei lai khatya hanui louthulanungri, a heiri minu klallei lhou touwurla.” 10Heirou Aiyei ruishik rapne Anung kyun, “Heiyanungri nu-shal shangrammei tlakra heinaksi tlouthuk leiyanungri, yarap heiri lourilmakne lhangai.” 11#1 Co 7.7-9. Heirou Jesu'ne loumallangkur, “Anaksi shunmatunei tlourap awari thimi namyernungeiri nimak, heiya Dunpune hoiyerkur thimi rapnungtom hoirou. 12Heitoubi thimi rapne nu loumaknei ngamri chungwane leilei; thimi thani nu loumakei kleiri puknarei pukphobkhi kyao; thayari thimi rapne louyernimaknei sheemkurkhi klei; heitoubi thimi thaneri Thangmun Krungramra changrou toubine nu loumakei kleikhi kyao. Anaksi shunmatupi rapya loulhakni thimi rapne loulhakbine heinakrim toulaksu.” 13#Mk 10.13-16; Lk 18.15-17; Mt 18.2-3; 1 Co 14.20. Thimi thani douwa rapbei doura Jesu'ya hut tlangyerbi phor piyerninei ngamrou Aiyei pongra heiruilhaknarou, ruishik rapne thimi rapya kalthi lousamkur. 14Heisi tounarouri Jesu'ne loushun, “Douwarap heiri Keipongra wachangyerlak, yaya loumankanpimak, koungameiyo toulanungri, Thangmunyei Krungramri yarap heinungei hoirou.” 15Heitoubi yaidoura Ane aihut khoupibi phor pikur, heitoubi ya shaalkur.

Laldun Kartlanga Khat

(Mk 10.17-31; Lk 18.18-30)

16 # Lk 10.25; Lev 18.5. Nungkhatnui napawa napung khatne Jesu'nung wabine tlou kngai, “Upawa, khringei chaanya phananungei keine kounaksi lhangai lhouya touserouwo?”

17“Nangne Keinungei kounaksi lhangaiyei ngamrou kngaiyo,” toubi Jesu'ne anung loumallangkur, “Lhangaiyo touri Khat nimakne dei hukhatkhi maklei. Nangne khringei chaanya pharou toulanungri Dunpuei Chaytlou rapya karkulmakne hilthunglak.” 18#Hoy 20.12-16; Khn 5.16-20; Rom 13.9; Jas 2.11. Heirou ane loukngai, “Kounaksi Chaytlou rapya keine hil chanthungserouwo?” Heirou Jesu'ne shunpikur, “Thimi hatmak; minu-micha lalmak; muchamak; thimi hukhatyakhi klallei tloune theibaangmak; 19#Lev 19.18; Mt 22.39; Hoy 20.12; Khn 5.16. neipui-neipaya chi-rikrailak; heitoubi nangle cheemlhun khoi thimi rapya neitamya malungshinakne malungshilak.” 20Heirou kartlanga heini loukyun, “Heinaksi Chaytlou namyerwa heiri keine douchaei waiyoubine ngakurkhoula. Heiya duinara keine ngaknungei deiri kou leileihui?” 21Jesu'ne anungei loushun, “Nangne heirapyakhi duine ngakniyanungri, neiyei cheemra kallengbine, neiyei klei putchei namyerya yorwurbine, heiyei tuy heiwari kanring thimi rapnung yerpilak, heisi toulanungri nangne Thangmun ramra lal pharou, heitoubi wawa Keihilla chanthunglak.” 22#Lk 12.33; Pao 2.45; 4.34; Mt 6.20. Heirou kartlanga heini heinaksi tlou rapya mayeknarouri, aiyei lhawai beimak klah'ne shaalkur, ngamri a heiwari beimakne dun napawa khat. 23#Mk 10.23-27; Lk 18.24-27. Heirouri Jesu'ne Aiyei ruishik rapnung kyun, “Keine nanungei chimne yunpilei. Dun thimi rapne Thangmunyei Krungramra changrouri beimakne klu. 24Keine hanui kallengne yunthulei, dun thimini Dunpuei Krungramra changrouri Utni phantrim khnara tulraalkurni dui klai.” 25Heitoubi kyun heiwaya ruishik rapne mayeknarouri beimakne ngakur. Heitounei ngamrou yaitam khatle-khat ngaikril, “Heiyanungri huni kalpi pharouwo?” 26#Kan 18.14; Job 42.2. Heirou Jesu'ne yaya thimanthrambine kyun, “Tlaipang thimi rapnungri koukhi hoimanemakrou, heiya Dunpu'nungri hoimakrouri koukhatkhi mak.” 27#Mk 10.28-31; Lk 18.28-30; Mt 4.18-22. Heisi tounarouri Peter'ne kanthoubi kyun, “Thilak, kani kaiyei klei namyerwaya lakurkhoubine Neihilla chanthungkurra. Heini arouri kani ayakhi duinara kouya touserouwo?” 28#Lk 22.30; Mt 20.21; Mt 25.31; Kre 3.21. Heirouri Jesu'ne yanung kyun, “Nane tanghakne muheirou touri Thimiyei Chanapawane rannei chaan hungeinung Aiyei thang'alkur Krungbomyei omna doura omyeinung, heitoubi Keihil chanthung thimi napung chiple-khni nakhi Krungbomyei omna doura omheirou, heitoubi nane Israellei phungh chiple-khniyei doura Picharpu upa khoine thrungeirou. 29Heirou Keinung'tlim nainaiyei cheem-kei, nu-cha, teinaorap, pui-pa heirou lou-yekul horkhouwurbi Keihil chanthungkur thimi rapne nai siruk macha duine phayerrou, heitoubi khringei chaankhi phayerrou. 30#Mt 20.16; Lk 13.30. Heiya asiyei lamkri thimi rapne hiltoheirou, heitoubi hilto thimi rapne lamriheirou.”

Currently Selected:

MATTHEW 19: MARIBSI

Highlight

Copy