MATTHEW 16
16
Jesu'ya Kngakei Lhou Touyerninei Buchakur
(Mk 8.11-13; Lk 12.54-56)
1 #
Lk 11.16,29; Mt 12.38-39; Jn 2.18; 6.30. Lhangai karsarap thale heirou Sadducee thani Jesu'ya yaiyei chaangra dayerninei ngamrou yane Aiyei leinara wabine, Thangmunyei Dunpune yapi thimi hoi-hoimaklei toubi munanungei kngakei lhouya touyernanung wakngai. 2Heiya Jesu'ne loukyun, “Kinnine yongchipyeinung nane kyun, ‘Angturi wangsan lhangaine katmraolei, heineri lherei lhangairou waiyoulei.’ 3Heitoubi ningshun manmaroukhi, ‘angturi nungmarthee thuithirou waiyoulei, ngamri nungthouri chi'knaei shakrung khoine katmraolei, heirou mehkhi katmehwura’ toubikhi nane yunlei. Heinakrimne nane nungthoura louthibi nungmartheeyei ngamrari yunthut manilei, heiya nane kouniroukhi kumchaanyei hutlharap heiri kouweiyo touri nane mumakrou. 4#Jon 3.4-5; Mt 12.39; Lk 11.29. Achaanyei thimirap awari kounakei lhangaimakurawo, heirou tharmukhi maklei. Naneri Keiyari kngakei lhouya touyernilei. Heiya keineri asinung nanungei kngakei lhouri mutpimakrou, heiyanungkhi nanungei mutpinung kngakei lhou khatri Jonah'nungei thukkurkhou kngakei lhou heitomngei.” Heirouri Ane yaya lakurkhoubine shaalkur.
Lhangai Karsa Thimirap Heirou Sadducee Rapri Phrinaksi
(Mk 8.14-21)
5Ruishik rapne samadru khatlhang mnakra wayeinung, yane chamainungei mumtol khatchakhi urmakne malummurkhou. 6#Lk 12.1. Heirouri Jesu'ne yaya shunmatupi, “Nane mukheine leiyalo, lhangai karsarap heirou Sadducee rapbei phriya mukheine silchalak.” 7Heirouri yaitam yunkaril, “Kane mumtol urmakurnei ngammei Ane heisi kyun.” 8#Mt 6.30; 8.26; 14.31. Heirou Jesu'ne, yaitamei yunkril heiya muwurnarouri Ane yanung kyun, “Nane shainung mumtol urmakurnei ngamrou koutounei heisi yunrilkurro? Naiyei uklumri koungammei heinak mandikurrawo? 9#Mt 14.17-21. Nari asilumphane muheimakhuiko? Keine thimi lishing-phanganung mumtol tum phanga threlchaalbi pishaikurya nane ningmalummurlako? Heirou maleikur heiri nane lukshangphai kounakchung markumkur? 10#Mt 15.34-38. Heitoubi mumtol tum enitam heichaya thimi lishing phalinung pishaikurri kouwei? Heirouwei malei rapri nane lukshangphai kounak chungne markumthungkur? 11Arou Keine nanungei kyunri mumtollei ngamrou nimakme touri nane koutounei mumakurawo? Nane Lhangai karsarap heirou Sadducee rapbei phriya mukheine silchalak tounei.” 12Heirouri ruishikrap heini yaiyei mumtollei phriya kyun nimakme touri yane loumuheikur, heiya lhangai karsa thimi raple Sadducee rapbei chimmakei shunmatupikur heirapya mukheine leiyalo tounei tloume toubi yane mulhakur.
Peter'ne Jesuei Ngamrou Yunthut
(Mk 8.27-30; Lk 9.18-21)
13Jesu'ne Caesarea khokulra wawurbine, bi heirou Ane Aiyei ruishik rapnung tlou kngai, “Thimi rapne Thimiyei Chanapawa heiyari huwo toubi yunrillei?” 14#Mt 14.10; Mk 6.14-15; Lk 9.7-8; Jn 1.21. Heirou yane loumallang, “Thimirap thaneri Nangri Yuiluppi Johnme toubikhi yunrillei, heitoubi deineri Elijahme toubine yunkril, heiya thaneri Jeremiahme toubikhi yunlei, heitoubi dei thaneri Thimkhui khatme toubikhi yunrillei.” 15“Heiyanungri naneri Kei ari huwo toubi yunnilei?” Jesu'ne yanung loukngai. 16#Mt 1.16; Jn 11.27; 1.49; 6.68,69. “Nangri Messiah, heitoubi Khring Dunpuei Chanapawa,” toubine Simon Peter'ne loumallangkur. 17#1 Co 15.50; Gal 1.16; Eph 6.12; Heb 2.14. “John'yei chanapawa, neiyei kyun heiri chimlei, beimakne lhangaiyura. Nangne heinakei chimya yunthutkur heiri tlaipang thimirei nimak, heiya Thangmunra klei Kei Pawarei yunthutpime,” toubi Jesu'ne loukyun. 18#Jn 1.40-42; 21.15-17; 1 Co 15.5. Heine Peter, Keine neinung kyunri, “Nangri thlung khat, heitoubi thlungei cheemmun doura Keine Keiyei Church phunkanthourou, heirouri khiyei mantrangne heiwaya kul chalchangmarou. 19#Isa 22.22; Kre 1.18; Mt 18.18; Jn 20.23. Keine neinungei Thangmunyei shumtrum hangcheikhi malanpirou, heitoubi tlaipangra neiyei yapimakur heiri Thangmunrakhi yamakrou, heirou nangne tlaipang doura malhetkur heiri Thangmunrakhi malhetrou.” 20#Mt 8.4; Mk 3.12; Mt 5.43; 9.30. Heisi toubi Ane Aiyei ruishik rapnung, A heiri Messiah'me toubi thimi hu khatnungkhi yunthutmaknung rekrek shunmatukur.
Jesu'ne Klah-knang Doubi Hirou'younei Ngamrou Yunthutkhou
(Mk 8.31—9.1; Lk 9.22-27)
21 #
Mt 17.22-23; 20.17-19; Lk 17.25; Mt 17.12; 26.2. Heirouwei waiyoubi Jesu'ne aiyei ruishik rapnung yertleng yunthutyoukur, touri, “Keine Jerusalem'ra kabine, upa rapbei maibongrakhi, Suipipu upa rapbei maibongrakhi heitoubi Chaylam upa rapbei hutra Keiya pilhakurbi beimakne klah-mrimnang dounanungei waiyoukura. Keiyari yane hatdurou, heitoubi tlaini khyumnirou hanui ringthutthurou.” 22Heisi tounarouri Peter'ne Aya ruimartleiloubi kyun, “Upawa, Nangri heinakya tounungei yamakme, heinakei lhou rapya Neinungri kouniroukhi thukmakneyasu.” 23#Mt 4.10. Heirouri Jesu'ne Peter'nung kalleklhakbine shunkur, “Keipongra leimaka, wathukkura, Satan. Nangri Keiyei lhoutouna lamra markholnalei, ngamri neiyei ukning heiri Dunpurei nimak, heiya tlaipang thimirei.” 24#Mt 10.38; Lk 14.27. Heirou Jesu'ne Aiyei ruishik rapnung kyun, “Hu khatne Keile kalhonne chaniyanungri, aitamya yanimak hoiyasu, heitoubi aiyei ruiya urbi Keihilla chanthungasu. 25#Mt 10.39; Lk 17.33; Jn 12.23. Hu khatne aitamei chaanya kalnanungei toulanungri, shuimakne mangrou; heiya hu khatne Keinung'tlim aichaanya hormangkur yaowanungri, a heiri khring pharou. 26Thimi napung khatne tlaipangpal namtomya kul chalbinekhi, heiya aiyei chaanya hormanglanungri, anungei kouya tungcharou? Nimanungri, aiyei lhawaiya koule kartlengrilbi mallengthurouwo? 27#Mt 25.31; 10.33; Lk 12.9; 1 Jn 2.28; Rom 2.6; Kre 22.12; Laa 62.12. Thimiyei Chanapawane Aiyei Pawaei thang'alle Aiyei Thangring raple kalhonne yongeinung, heirouri thimi napung khatkhatdei churnei klahman heiya yongyerpirou. 28#Mt 10.23; 1 Co 16.22; 1 Th 4.15-18. Keine nanungei chimne yunpilei, touri, Thimiyei Chanapawane Krung khoine yongpaalbongyenri, arou klei thimi thani khiya martamkhoumak yaoweirou.”
Currently Selected:
MATTHEW 16: MARIBSI
Highlight
Share
Copy
Want to have your highlights saved across all your devices? Sign up or sign in
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.
