MATTHEW 15

Nutar-Patar Rapbei Shunmatupi'rap

(Mk 7.1-13)

1Heirouri lhangai karsa raple chaylamyei uparap thale pulne Jerusalem'rouwei wabi yane Jesu'nung wakngai; 2“Neiyei ruishik rapne koutounei bongei kaiyei nutar-patar rapbei shunmatupikhou youkna rapya hilthungmakne toubaikuro? Yane chabong-maibongnung yaiyei hut rapri lhangaine chikmathaimaklei.” 3Heirouri Jesu'ne yanung loumallangkur. “Heiya nari Dunpuei kyunya chanthungmakne, nai nutar-patar rapbei youkna heiyatom hilthungbi kleiri koutounei? 4#Hoy 20.12; Khn 5.16; Hoy 21.17; Lev 20.9. Ngamri Dunpune asitoubi yunlei, ‘Neipui-neipaya chi-rikrainiya; heitoubi hu khatne aiyei pui-paya mancho thimi heiri hibom thuk.’ 5Heiya naiyei shunmaturi thimi napung khatne aiyei manicha heiwaya aiyei pui-panung churtrungpila'nungri, ‘a heiri Dunpuei thimi khatme’ toubine yunlei, heiya a heini aiyei pui-paya chi-rikraiyei lhouri koukhatkhi toumaklei. 6Heisi toubine, nane naiyei nutar-patar rapbei youkna heiwaya hil chanthungnarou, nane Dunpuei tlou rapyari koukhi lhouhoipimaklei. 7Lhangai karsa thimirap nari; heinakrimne naingamrou Isaiah Thimkhuini shunthutkhou heiwari chimne hungthuklei.” 8#Isa 29.13. Dunpune shunlei, “Thimi rapne yaimurrei lhangai tloulhang'tomni keiya rikrai-khrumrillei, heiya yaiyei malungri Keirouwei tlatni leilei. 9Ya rapne Keiya rikrai-khrumnei karsukri koukhatkhi maklei, heiyei ngamri yane tlaipang thimiyei sheemthutkur youkna tlou rapya Keiyeime toubine shunmatupilei.”

Thimiya Borhkyer

(Mk 7.14-23)

10Heirou Jesu'ne thimi chungya ungkartilbine Ane yanungei kyun, “Nane muidane louninglhaklak; 11#Pao 10.14-15; 1 Tm 4.3. ‘Thimi napung khatya aiyei takarei yongchangkur heiwane aya borhkyer nimak; heinung'tlimri aiyei ukningrei kathuk tlourap heiwane aya borhkyer.’ ” 12Heirouri Aiyei ruishik rapne wabi Anungei kyun, “Neiyei yunthutkur heini lhangai karsa thimi rapbei ukningra malungkhayerkur heiwari Nangne mumako?” 13#Isa 60.21; Jn 15.2. Heitounei Jesu'ne loumallangkur, “Thangmunra klei Keiyei Pawane lingpukhoumak heengtrungrap heiri phuihatrou. 14#Lk 6.39; Mt 23.16,24; Rom 2.19. Nane yanung'tlimri koukhatkhi lhawai lahpimak. Heitoubi yari mitdeo thimi rapya lamruipi mitdeo thimirap; heirou ani khur yuknara dalhakyeinung, yakhuntarekpa dalhakrouri leiyura.” 15Heirouri Peter'ne kanthoubine, “Neiyei yunkur yailimtlou heiri kanungei beicha yunkarshangpilaklo,” toubi buchakur. 16Heirou Jesu'ne yanung loukyun, “Nari mitdeo thimi rapya duine muheimak thimirap hoileintu! 17Nari asilumphane phab damakhuiko? Thimi khatdei takara lhakkur chamaiput heiri aiyei ukthepra leikhoubi heirou aiyei mayura kalleithutkur. 18#Mt 12.34. Heiya aiyei murrei kathukkur tlourap heiri aiyei ukningrei kleiya kathuk, heitoubi tlou heirapne thimi heiya tharmuei lhoura borhyerlei. 19#Gal 5.19-21; 1 Co 6.9-10; Rom 14.14. Ngamri, aiyei ukningrei lhangaimakya kathuknei ane thimi hatkni, minu-micha klal, heitoubi aiyei chaanrou borhyei lhouyatom toukni; mucha'kni, mandal tlou kyun, heirou miya karkhal. 20Anakei put rapne thimi rapya borhkyer. Heiya yai kyunnakne, nane naihut chikmathaimakei cha'kmai heiwane thimi khatya borhkyer nimakme.”

Napuiya Khatpiyei Uklum

(Mk 7.24-30)

21Jesu'ne bi heiya lakurkhoubi, Tyre'le Sidon'yei krungkul rapbei pongra klei ramranung chakur. 22Heirouri lhungdou heitamrou klei Canaan ramrei napuiya khatpini Jesu'nung wabi shunchakur, “David'yei Chanapawa, keiya bei kringpilaklo; keiyei chanapuiya heiwiri lhangaimak lhim popburbi kalthi mrim knangne leiyurame.” 23Heiya Jesu'ne anungei koutlou khatkhi louyunmak. Heitounei Aiyei ruishik rapne Anung wachangbi buchakur, “Napuiya heiya hilthutlakalo, ani kaya louchanthungbine ungraochani plangyerkurame.” 24#Mt 10.6,23. Heirou Jesu'ne loukyun, “Keiyari Israellei mangkur yao rapnungtom yenmalhetpi.” 25#Mt 8.2; 18.26; 20.20; Jn 9.38. Heisi tounarouri napuiya heini aiyei hopongra chanlhakbi khuklu kanthrunchabi, “Keiya beicha trungpilo, Upawa,” toubi buchakur. 26Heirou Jesu'ne anung loushunkur, “Douwa rapbei cha'kmaiya khulloubine, ui rapnung khingpikurri chimmakrou.” 27“Heiyari chimbillou, Upawa,” toubi ane loukyun, “heisiya hoiyanungkhi ui rapnekhi aiyei cheempuei cha'malei rapya khulcha'ntu.” 28#Mt 9.22,28; Mk 10.52; Lk 7.50; 17.19. Heisi tounarouri Jesu'ne anung loushun, “Nangri beimakne uklumtang napuiya khatlei; heiniri neiyei maduri kouweiyo? Keine heiwaya hoiyerpirou.” Heirouri napuiya heiwiyei chanapuiya heiyei knakhi tallengne loudamkur.

Jesu'ne Kna Thimi Chungwaya Raiyerpikur

29 # Mk 7.31-37. Jesu'ne bi heiya lakurkhoubi Galilee'yei Samadru lhangranung wakur, heirou Ane lhungdoura kabine omkur. 30Heitoubi bi heiroukhi thimirap chungwane Aihilla katchanthungbi, heirou yale kalhoni hodeek thimi, mitdeo thimi, hut-ho chingkantum thimi, tlou thukmak thimi, heirou deidei limlimyei kna thimi rapyakhi chungwane Aiyei pongra katruilhakur heirouri, Ane ya namyerrei knaya raiyerpikur. 31Heirouri tlou thukmak thimi rapne tlou yunmanikur, hut-ho chingkantum thimi rapkhi lhangaikur, hodeek thimi rapya karwaicha maniyerkur, heirou mitdeo thimi rapbei mitkhi mumanikur, heinakei lhouthuk rapya thimi rapne mulhakur heirouri yane beimakne ngakkur, heirouri yane Israel rapbei Dunpuya mathangkur.

Jesu'ne Thimi Lishing Phaliya Pichaakur

(Mk 8.1-10)

32 # Mt 9.36. #Mt 14.13-21. Jesu'ne Aiyei ruishik rapya unglouheibi yanungei kyun, “Keine thimirap heiya thinarou yaya beimakne kringnawura, ngamri yakhi Keile kalhonne tlaini khyumnibil leiwurnarou asinungri yaiyei chanung-mainung koukhatkhi makkura. Heini Keine yaya koukhi pichamakne malhetnimaklei, ngamri yane cheemra shalyeinung lamrakra msullurbi kanelkurkhi kya.” 33Heirouri ruishik rapne Anung loukngai, “Kane thimirap heinak chungwaya ramhang arouri koura holphaloubi yaya ukthoni pichaserrouwo?” 34“Nanung mumtolri kounak chungne yaoleihui?” toubi Jesu'ne loukngai. “Mumtol tum-enitam'le, thanga mandicha thale yaoleihui,” toubi yane loumallang. 35Heirouri Jesu'ne thimi rapya tingtou doura tou'omyerkur. 36Heirouri Ane mumtol tum-eni heile thanga rapya loubine, Dunpuya mathangkur, heitoubi sheetchalbine thimi rapnung yerpinanungei Aiyei ruishik rapnung malanpikur. 37Heirouri ya namyerni ukthoni chamaikur. Heitoubi yai chamainarei maleikur mumtol kunle thanga kunrap heiri ruishik rapne lukshangphai enitam bilbil thimni markumthungkur. 38Bi heirou napuiya raple douwa naoshun-naopar rapyari sherchokmakne napawa'tomni thimi lishing phalibil tlunglei. 39Heitoubi Jesu'ne thimi rapya malhetdurbi heirou Ane malira wachangkur, heitoubi Magadanyei ramranung chakur.

Currently Selected:

MATTHEW 15: MARIBSI

Highlight

Copy