JOHN 12

Bethany'ra Jesu'ya Shirek Teipikur

(Mt 26.6-13; Mk 14.3-9)

1Ralthutpinei Kumtlun tlaini thrukniyei maibongrou, Jesu'ne Bethany'ra khirouwei ringthutyerpikur Lazarus'yei cheemra wachangkur. 2Bi heirou yane Anungei chamai marshikpiyeinung, Martha'ne watlhou toupikur. Heitoubi bi heirou Jesukou omkalhon rapbei hangra Lazarus'khi kyao. 3Heirou Maryne ‘nard’ toubi ung heengnaiyei sheemthut manklu-muiknam shirek tungka thimkhlangni loubi Jesuei hora shungphangbi fnalpikur, heitoubi aiyei lurei shamne rutmathaipikur. Muiknam shirek khrim heine cheemwai thimkur. 4#Jn 6.71; 13.26. Heirou Jesuei ruishik rapbei hangrei Aya yorroukyou napawa-Judas Iscariot'ne kyun, 5“Koungammei muiknam shirek heiya Denari macha-khyumnung yorrubine, heitoubi tuy heiri kanring thimi rapnung yerpikurri yamako?” 6#Lk 8.3. Ane heishi kyunri kanring thimi rapya kringpineikhi nimak, heiya ari mucha thimi. Heitoubi ari tuykao urchabine, kao heirou haallhakkur tuy rapya louthutbi aitamtom yrengchabidik klei thimi. 7#Jn 19.40. Heiya Jesu'ne kyun, “Aiyei kningya heisi toulaksu! Heirou aiyei klei heiso Keiya khiruiyeinung teiphaangpinung khouyerlak. 8#Lk 7.37-38. Nane kanring thimi rapya karyomne leimalnaeirou, heiya Keileri karyomne leimalnamakarou.”

Lazarus'yakhi Hatnanungei Wairangkur

9Thimi kulyom rapne Jesu'ya Bethany'ra leiyurame toubi pao mayeknarouri, yane bi heirounung wakur, heitoubi yane Jesu'yatom nimakne, bi heirou Jesu'ne khirouwei lamkrine ringthutyerkur Lazaruskhi leileime tounei ngamrou yane wathikur. 10#Mk 14.1. Heirouri Suipipu rapne Lazarusyakhi hatnanungei wairaangkur. 11Heingammei Jehudiyei thimirap chungne Suipi Pu rapne aidoura toukur lhou rapbei ngamrou yaya yanimakurbi shaalkur, heirou yane Jesu'ya uklumkur.

Maneyei Mantrangle Kalhonni Jerusalem'ra Wachang

(Mt 21.1-11; Mk 11.1-11; Lk 19.28-40)

12Heithangei tlainirou Jesu'ne Jerusalem'ra wachangroume tounei pao heiri, Ralthutpinei Kumtlun yaonanungei wachangkur thimi rapne mayekurla. 13#Laa 118.26; Jn 1.49. Heingammei yane kangwoina deekloubi, yane Aya murilnanungei wathukbi, “Hosanna! Upawaei minra wachangbi klei Israel rapbei Krung heiri likarsui lhangai hoiyasu!” toubi yane loupaokur. 14Heirou Jesu'ne gadha shuncha khat loubi yentungkhei, arouri Khyingei Lailikni atoubi yunkhounakrimni hungthukkura: 15#Zec 9.9. “Zionyei khukarthil, nari chimaklo! Louthilak, hungleime naiyei Krungni sapuk doura tungbine!” 16#Mk 9.32; Jn 2.22. Haalnungri Aiyei ruishik rapne thukkur lhoubomrap heiyei ngamrou koukhi phab dakhoumak; heiya hillouri Jesu'ne thang'alle kalhonne ringthutkur heirouri, yane Khyingei Lailikrei yunkhou heiri ariyalei, heirou lhou ari Aiyei ngammeilei toubi hungningmukur. 17Jesu'ne Lazarus'ya lhanrilrei ungbine ringthutyerkur kheen heirou Akou kalhonkhou thimi rapne thukkur lhoubomrap heiyei ngamrou pao tamkur. 18Heisi tounarouri thimirap chungne Aya murilkur, ngamri yane Aiyei touthutkur lhou rapbei ngamrou mayekkur. 19Heirouri Lhangai karsa thimi rapne ya khatle khat yunrilkur, “Nane yukhalthilak, kai waikrang awari koukhatkhi karsukmaklei. Thilak, tlaipang thimi namyerwane Aihilla chanthungurchiya!”

Greek'rap Thane Jesu'ya Murilninei Rapha

20 # Jn 7.35; Pao 11.20. Kumtlun heirou Jerusalem'ra khrumnungei wanarou yai hangra Greek rapkhi tha kyao. 21#Jn 1.44; 6.5. Yane Galilee'yei Bethsaida yulrei napawa Philipnung wabine kyun, “Marnopi pu, kane Jesu'ya murilnileime.” 22Heirou Philipni Andrewei leinara wabine heitoubi yakhuntane Jesu'nung washun. 23#Jn 13.1; 17.1; Mk 14.35,41. Heirouri Jesu'ne yakhuntanung loukyun, “Thimiyei Chanapawane Aiyei thang'alya tangni phananungei trum heiri hungtlungurame. 24#1 Co 15.36. Keine nanungei chim tlouya yunpilei: Gehulung khatchane thleira dalhakurbi pukthutdanungri, heirou ane heikhi chungne heirou. 25#Mt 10.39; Mk 8.35; Lk 9.24; 14.26. Hukhatne aiyei rongchanya malungshi thimi heiri maangrou; heiya hukhatne tlaipangpal arou aiyei rongchanya machin thimi heiri, klui naimak khringei chaanya pharou. 26Hukhatne Keiyei watlhou toupini thimi heiri Keihilla chanthungrou, heisi toubi Keiyei shik heiri Keiyei leina bi kantangrou leikalhonrou. Heitoubi Keiyei Pawane Keiya watlhou toupi thimirap namyerwaya rikrai khrumpirou.”

Jesu'ne Aiyei Hirou Younei Ngamrou Yunthutpikhou

27 # Jn 11.35; Mt 26.38; Mk 14.34. “Asinungri Keiyei lhawai beimak lahwura--heine Keiri kouya yunserou? Keine ‘Pawa, kheen heiri keidoura yenpirimakhuilo’ toubi yunserouko? Heiri nimak-heiya anaksi kheen arou klah-mrimya dounanungei Keine yongkurame. 28#Mk 1.11; 9.7. Pawa, Neiminra Keinungei thang alyerpilaklo!” Heirouri Thangmun lhangrei hou khatne yukshun, “Keine heinung'tlim thang'alya yenpiwurla, heirou hanuikhi Keine thang alyerpithurou.” 29Bi heirou mayungbi klei thimi rapne hou heiya mayeknarouri, ya thane ‘hou heiri marwanyei houleime’ toubi kyun, heiya ya thaneri ‘Hou heiri Thangringne anungei tlou yukshunnei houme’ toubinekhi kyun! 30Heiya Jesu'ne yanungei shun, “Hou heiri Keinung'tlim kyun nimakme, heiya nanung'tlim yukyunpime. 31#Jn 16.11; 2 Co 4.4; Eph 2.2. Tlaipangra pichar tourouri kheen ahakme; tlaipangpallei pu rapya khingsundawurbi manerouri kheen ariyame. 32#Jn 3.14; 8.28. Keiya tlaipangpal arouwei loubangkur kheen heirouri, Keine thimi nammaya ruilouheirou.” 33(Asi yunbi Ane Aiyei hirouyounei ngam heirou Aiyei klah-knang dourou kyou heiyei ngamroukhi shunthutpikur.) 34#Laa 110.4; Isa 9.7; Ezk 37.25; Dan 7.14. Heirou thimi rapne loukyun, “Kaiyei Chaylamyei kyunri Messiahne klui naimakne trungpirou touleime. Heiyanungri, nangneri koutoubi ‘Thimiyei Chanapawayari loubangrouwa’ toubi kyunno? Heitoubi Thimiyei Chanapawa heiri huwo?” 35#Jn 7.33; 9.4; Eph 5.8; 1 Jn 2.11. Heirou Jesu'ne loumallangkur, “Kwaar heine naihangra lepcha leikhourou. Nane kwaar leiyeinung naiyei lamtla heiri maibonglhangra mantonlak, heitoulanungri kmeh heine naidoura yukmakhup manemakrou; kouweiyo toulanungri mehnara karwaicha thimi heine aiyei chabi klei heiri koulhangrawo touri mumaklei. 36#Lk 16.8; Jn 8.59. Heiyanungri, nane kwaar leiyeinung, kwaar heiya malungampilak, heirouri nane kwaarrei thimirap hoipharou.”

Thimi Rapbei Malungam Mak

Jesu'ne heisi yunthutkur hillouri, Ane shaalwurbi heirou yaihangrouwei karlheiwurbi yulkur. 37Ane yai maibongra heinaksi kngakei lhou rapya touthutbikhi, yane Aya uklumpimak, 38#Isa 53.1; Rom 10.16. heisitoubi Thimkhui rapbei yunthutkhou tlourap heiri chimne hungthukkura: “Upawa, kai shunthutpikur lhangai paolaaya hune uklummurlawo? Puni Aiyei mantrangya hunungei kanrethutpiwurlawo?” 39Heitounei yane uklumkur manemak, ngamri Isaiah'ne asitoubikhi yunthutkhoulei, 40#Isa 6.10; Mt 13.14. “Dunpune yai mit muyermakura, heirou yai mulhakna ukningya tipburpila; heingammei yai mitne muchangmakrou, heirou yai ukningne muidane mulhakuri manemakrou, heirouri Keine yaya damyerpinanungei, yane Kei lhangra kalleklhakmaklei, toubi Dunpune yunlei.” 41#Isa 6.1; Lk 24.27. Isaiah'ne heisitoubi yunthutkhou ngamri, ane Jesuei thang'alya muwurkhounei ngamroukhi heitoubi Aingamroukhi yunthutkhoume. 42#Jn 9.22; Lk 6.22. Heiya hoiyanungkhi, Jehudiyei lhou'ur purap chungne Jesu'ya uklumkur, heiya Lhangai karsa thimi rapbei maibongrari yane khyingne yunthutyermak, hei nimanungri yayari Pukhrumna Cheemrei hulthutrou da. 43Ngamri yane Dunpuei mathangpi heiyari thimi rapbei mathangpiya madukhou.

Jesuei Tloulhang Rapni Pichar Toupi

44 # Mt 10.40; Jn 5.24. Jesu'ne hou chouni kyun, “Hukhatne Keiya malungam thimi heiri Keiyatom malungam nimak, heiya Keiya yenmalhetpi Pu Ayakhi uklum thimime. 45#Jn 14.9. Hukhatne Keiya mukur thimi heiri Keiya yenmalhetpikur Ayakhi mulei. 46#Jn 1.4; 8.12; 9.5. Keine tlaipangra kwaar khoine yongpiwurla, heine Keiya uklum thimi heiri kmehra leimakrou. 47#Jn 3.17. Hukhatne Keiyei paolaaya mayekloubi, heitoubi heiyei hilchanthung thimi heiyari, Keine aya pichar toumakrou. Heirou Keiyei kyong ari tlaipangpalya pichar tounanungei nimak, heiya kalpinanungei yongpime. 48#Mt 10.14-15. Hukhatne Keiya yapimakne, Keiyei Pao-laaya loulhakpimak thimiyari pichar toupirou pu khat leilei. Keiyei yunthutpikur tloulhangrap heine luiniyei tlainirou aya pichar toupiheirou! 49Kyun ari chimhakme, ngamri Keiyei yunthutkur ari Keitamyei kningya yunthutkur nimak, heiya Keiya yenmalhetpikur Pawane Keiyei yunnung, heirou shunthutnungei chay piwurkhou. 50Heirou Keine kmu touri Aiyei chaytlou heine klui naimak khringchaan yenpilei. Heiyanungri, Keiyei kyun ari Pawane Keiya yunthutpilaklo toubi shunpikur heirapya yunthutpime.”

Currently Selected:

JOHN 12: MARIBSI

Highlight

Copy