JOHN 13

Jesu'ne Aiyei Ruishik Rapya Hochoupi

1 # Jn 11.55; 12.23; 16.28. Heirouri Ralthutpinei Kumtlun tlainiyei maibongrou, Jesu'ne tlaipangpal Aya lakurkhoubi Pawayei bomra kananungei trum hungtlungura touri muwurla. Tlaipang doura Anungei hoikur thimi rapya Ane karyom malungshipi, heirou kluiyei kheen heirampha Ane yaya malungshipikur. 2#Jn 6.71; Mk 14.10. Jesu'le Aiyei ruishik rapne Puwei Ralthutpinei Puluk markhulnara yaoweinung, heirou Satan'ne Simon Iscariot'yei chanapawa Judas'yei ukningra changurbi, Jesu'ya munne yorchawurnanung wairaangkur. 3Jesu'ne kmu touri Pawane Anungei mane-mantrang namma piwurkhoula; heirou Ari Pawa'rei kyong heitoubi Dunpuei bomra hanui kallengthurou touri Ane kmu. 4Heirouri Ane lukturng pongrei kanthouwurbi, heitoubi aiyei shamb rapya yaipongra khouwurbi, heirou aiyei shintlakra hutrutna punshel yitbine, 5#Lk 7.44; 22.27. heitoubi heenglhingra yuiding shungthutbi, Aiyei ruishik rapbei ho choupikur, heirou Aiyei shintlakrei yitbi klei hut rutna punshelni rutmathaipikur. 6Heitoubi Ane Simon Peter'yei lhangra hungchangeinung, ane loushun, “Upawa, Nangri keiyei hokhi choupirou touneiyako?” 7Heirou Jesu'ne anungei loumallang, “Nangne asinung Keiyei toubi klei ari kouweiyo touri mumakeirou, heiya nangne hillou hungmuheirou.” 8#Khn 12.12; Jn 3.5; 9.7. Heirou Peter'ne loukyun, “Upawa, kouniroukhi nangne Keiyei hoya choupibom thukmakroume!” “Keine neiyei hoya choupimakrou dawanungri, nangri Keiyei ruishik'hak nimaklei,” toubi Jesu'ne anungei shunkur. 9Heirou Simon Peter'ne loumallang, “Heiyanungri, Upawa, keiyei hothil nimakne, keiyei hutkhi chikmathaipilak, heirou lukhi shupilak!” 10Heirou Jesu'ne loukyun, “Hukhatne aiyei sharung namtomne choumathaikur thimi heiri aiyei hoyatom choupikur nimakneri deirari choumathaipinungei bomri mak, ngamri a heiri marthingura. Nari napung khatpatom nimakne deiri marthingura.” 11#Jn 13.2. Jesu'neri Aya hune yorrou youleiyo touri lamkrine muwurla, heitounei ngamrou Ane anaksiya yunthutkhou touri, “Thimi napung khatpatom nimakne deiri namma marthingura.” 12Heisitoubi Jesu'ne yaya ho choupikur hillouri, Ane Aiyei shambya hanui kansamloubi tirrei Aiyei omkhouna bi lukturng pongra hung'ommurthu. Heitoubi Ane yanungei kngai, “Asiyei kheen arou Keine nanungei toupikur heiri kouwo touri nane muleiko? 13Naneri Keiya Marnopipu, heirou Upawa toubi unglei. Moi, heiri chimhak touri nane heisihak ungpibom thuk, koungameiyo toulanungri nane heihakya ungpikur heiri Keihakpa hoilei. 14Naiyei upa heirou Marnopi pu Keihakpane naya ho choupiwurla. Heiyanungri, nanekhi khatne khatdei hoya choupirillou da. 15#1 Pt 2.21. Keineri naiyei mulounanung marnopiwurla, heineri nanekhi Keiyei nanungei toupikur heinakrimni toupirillak. 16#Mt 10.24; Lk 6.40. Keine nanung chimhakya yunpilei: shok hukhanekhi aiyei Cheempuya duiyei tangri younamak, heirou paocha thimi hukhatnekhi aya yenmalhetpi puya duiyei tangri younamak. 17#Lk 11.28; Jas 1.25. Asinungri nane chim heiya muwurla, heirou chim heiwaya lhou khoine touthutlanungri nanungei kounakei nungkngai hoirouwo! 18#Laa 41.9. Keine na nammaei ngamrou kyunri nimak; Keiyei khalthutkur thimi rapyari Keine muchilei. Heiya Khyingei lailikni atoubi yunkhou heihakya chimne hungthuknanung toume, ‘Keikou pulne omkanthrinbi chamai thimi heiwane Keinung hollhakbi Keile karhoukril hoiyeirou.’ 19#Jn 14.29; 8.28. Keine asinung heinakya hungthukbongnung nanungei yunpilei, heitoubi lhouhei hungthukeinung, ‘Keiri Keihakme’ toubi nane hungmubi uklumheirou. 20#Mk 10.40; Lk 10.16. Keine nanungei chimhakya yunpilei: hukhatne Keiyei yenmalhetpikur thimi hukounak khatya loulhakpi thimi heiri Keiyakhi loulhakpirou; heirou hukhatne Keiya loulhakpilanungri, Keiya yenmalhetpikur ayakhi loulhakrou.”

Jesu'ne Aya Yorrou Younei Ngamrou Yunthutpikhou

(Mt 26.20-25; Mk 14.17-21; Lk 22.21-23)

21Jesu'ne tlou heiya yunchikur hillouri, aiyei lhawai heiri kalthi lahwura heirouri Ane khyingne yunthutpikur, “Keine nanungei tanghakni yunpilei naihangrei napung-khatne Keiya yorrou youlei.” 22Heirouri ruishik rapne ngakurbi, huya yunkurrawo toubi yane khatle khat thirilbi leikur. 23#Jn 19.26; 20.2; 21.7,20. Ruishik rapbei hangra Jesu'ne nam'rouwei malungshidui napawa heine Jesuei pongra ombi leinarou, 24Simon Peter'ne anungei mit heipiwurbi, “Aiyei kyun heiri huya yunkurrawo beicha heingaithilaklo,” toubi heishunkur. 25Heisi tounarouri ruishik heiwane Jesuei mnakra tonkarsilbi loukngai, “Neikyun heiya huyawo, Upawa?” 26#Jn 6.71. Heirou Jesu'ne loumallangkur, “Keine mumtol har bei loubi daarkepra lupdokbine malanpirou kyou napawa heihakrime.” Heisitoubi Ane mumtol har khatcha loubine, heitoubi lupdokbi Simon Iscariotyei chanapawa Judasnung malanpikur. 27Heirouri Judas'ne mumtol heiya louloukurle tallengne Satan'ne anungei changkur. Heirou Jesu'ne aya shunkur, “Neiyei tourou'kyou heiya khrangni toulaka.” 28Heirou Jesu'ne koungammei anungei heisi shunpikurro touri lukturng pongrei omkarhungbi klei ruishik dei hukhatnekhi mumakur. 29#Jn 12.6. Judasri tuykao pa'kna thimi hoinei ngamrou aya shunbi yai chanung-mainung lorou watyilkurko, nimanung kanring thimi rapnungei koukouya heipilaklo toubi Jesu'ne aya watyilkura marbuni ruishikrap deine ningchakur. 30#Lk 22.53. Heirouri Judas'ne mumtol heiwaya louloubi tallengne daangra wathukkur, kheen heinungri masa hoiyura. 31#Jn 17.1. Heirou Judas'ne wathukkur hillouri, Jesu'ne kyun, “Asinungri Thimiyei Chanapawaei thang'al heiri kanrethutdurla; heirou Dunpuei thang'al heikhi Aiyei ngamne kanrethutdurla. 32Heirou Dunpuei thang'al heiri anungei kanrethutpilari, Dunpune Thimiyei Chanapawayei thang'alkhi kanrethutyerrou, heitoubi Ane heiwaya tallengne hoiyerrou. 33#1 Jn 2.1; Jn 7.33. Keiyei chanaorap, Keiri nakou kalhonbi leikhourouri kheen tlamarou. Nane Keiya thipharou, heiya Keine Jehudiya lhou'urpu rapnung yunthutkhou heinakne Keine nanungkhi yunthutkhoupirou, ‘Keiyei charouyouna bi heirou nari chachangmakrou.’ 34#Jn 15.12,17; 1 Jn 3.23; 2 Jn 5; Lev 19.18; 1 Th 4.9; 1 Pt 1.22; Heb 13.1; Eph 5.2; 1 Jn 4.10. Heirou asinung Keine nanungei ran chaylam pikhoulei: nane khatle khat malungshirillak. Keine naya malungshipikur heinakne, nane khatle khat malungshirillou da. 35Heirou nane khatle khat malungshirillanungri, nane murou touri na namyerwari Keiyei ruishik rapme.”

Jesu'ne, Peter'ne Aya Yapimakrou Younei Ngamrou Yunthutkhou

(Mt 26.31-35; Mk 14.27-31; Lk 22.31-34)

36 # Jn 21.18; 2 Pt 1.14. Heirou Simon Peter'ne anungei kngai, “Upawa, Nangri koulhangra charou touneiyo?” “Keiyei charou youna bira nane chanthung manemakrou,” toubi Jesu'ne loumallangkur. “Heiya nane hillou chanthungeirou.” 37#Mt 26.33-35; Mk 14.29-31; Lk 22.33-34. “Upawa, keine koutounei neihilla chanthungkur manemakrouwo? Keiri neinung'tlim hirou toubi marshikkurame,” toubi Peter'ne loukyun. 38Heirou Jesu'ne loushunkur, “Nangri tanghakpane Keinung'tlim hirou'toubi wairaangkurako? Keine neinungei tanghakne shunpirou: Waapane khungbongnung nangne Keiyari mumakme toubi khyumbuirek yapimakne yunthutdeirou.”

Currently Selected:

JOHN 13: MARIBSI

Highlight

Copy