KANTHOUNA 50

Israel Hinei

1Heirouri Joseph'ne kunlhakbini aiyei pawaei maibungra machupbi chapkur. 2Heitoubi Joseph'ne aiyei thimkhui shok rapya shunbini, aiyei pawaei khilhungya chulmaknungei louh marchunyerkur; heisitoubi thimkhui rapne Israel'yei khi'lhungya louh#50.2: khi'lhung chulmakna hilhak. teiphaangbi khoupikur. 3Khi'lhungya louh marchunbi teiphaangnarou tlaini somlinibil changkur, ngamri heisibil tlaini changbom thukkur; heirou Egyptrei klei thimi rapne anung'tlim tlaini somretbil khi-kanrilnei chapkur.

4Heirou khi-kanrilnei tlaini somretni yenluikur heirouri, Joseph'ne Pharaoh'yei Krungbomrei lhou'urpu upawa heinungei shun, “Nangni kringpibi Pharaoh'nungei asitoubi pao tamlaka; 5Keiyei pawani hibongnung keiya tlou kantomyerbi yunkhou khat klei, touri ‘Ane hiyanungri Canaan ramra aya phumpilaklo’ toubine yunkhoulei; heineri asinung keine kai pawaya phumnanungei hungriyeise, heitoubi keine hanui heikallengthurou.” 6Heirouri Pharaoh'ne loushun, “Hungalo, heitoubi ani neiya tlou kantomyerkhou heinakni, hungbini aiyei khiya ruilaklo.” 7Heisitoubi Joseph'ne aiyei pawaya khi ruinanungei hungkur; heirou akou kalhonni Pharaohyei shokrap nammakhi, heirou aiyei cheemkhur pacha upa rapkhi, heirou Egyptbei uparap nammakhi khi ruinara kakur. 8Heirou Joseph'ne aiyei chanao mandicha raple, yaorul-halrul rapya Goshenra horkhouwurbi, ai'bommaiyei thimi raple, aiyei teinao raple, heirou upawayei bommaiyei thimirap nammakhi; 9heirou sapuk kaari rapkhi, heirou sapuk rapkhi chungni akou kalhonbi kakur. 10Heirouri yani Jordanyei khatlhang mnakrei klei Atadyei cha'umna ruitlaira ka'tlungbi, bi heitamrou yani lhawai klahni kanril laa sakur; heisitoubi ani upawa heinungtlim tlaini enibil kanrilnei laa sakur. 11Heirouri bi heitamrou louklei Canaania rapne Atadyei ruitlaira kanrilnei laa sakurya munarouri, yani kyun, “Egypt thimi rapbei yerrouwei lhawai klah kanrilkuro touri awariya.” Heingammei bi heiwaya “Abel-mizraim,”#50.11: Egyptbei khi kanrilna bi. toubi min thulbini asilumphani Jordan'yei khatlhang mnakra leileihui. 12Heisitoubi aiyei chanapawa rapne aiyei shunmatukhou hilthungni ayari khi ruikur. 13#Pao 7.16. Aiyei chanapawa rapne aya Canaan ram channi kakur, heitoubi lhan hoinanungei toubi Abraham'ne Hittia'yei napawa Ephron'rei lokhoukur Mamre'yei kulkung lhangrei klei Machpela'yei phaikarrei klei thlungpur lhanra aya phumkur. 14Heirou Joseph'ne, aiyei pawaya khi ruikhou hillou, ale aiyei teinao raple akou kalhonni aiyei pawaya khi ruirou kakur thimirap namma Egyptra hanui yenkallengthu. 15Heirou Josephbei teinao rapne yaipawa hikur munarouri, yaitamni yunkril, “Kane Josephbei doura touwurkhou lhangaimak lhou rapya machinthutbi, heinung'tlim ani kaidoura khlang lhakkurkhi yalei.” 16Heingammei yani Josephnung pao-ur thimirap heimalhetbi shun, “Neiyei pawani hibongnung kanungei chaytlouni shunpikhou, 17‘Nane Joseph'nung rochabi yunlak: Neiyei teinao rapbei lalkurya kukpilak, ngamri yani neinungei lhangaimak lhouya touwurkhoula.’ Heineri kani neinungei bucha'kniri nai pawayei Pu Dunpuei shokrap kaiyei klalya kukpilaklo.” Heirouri yani heisitoubi yunnarouri Joseph'ne kalthi louchapkur. 18Heitoubi aiyei teinao rapnekhi aiyei maibongra hungchangbi kanellhakbini khrumkur; heirou yani kyun, “Thilak, kari neiyei shok hoirouwame.” 19Heirouri Joseph'ne yanungei loushun, “Nari chimaklo, keineya Pu Dunpuei rung'khlangsil kyako? 20Heiya nani keiya karhani lhangaimak lhouya touwurkhoulame toubine khallanungkhi, Dunpuneri heirouwei lhangaiya hoiyerbini angturi thimi anak chungwani keingamrou ringyernanungei silpikur hoiroume. 21Ngam heineri, asinungri nani koukhi chimak, keine nayakhi, heirou naiyei chanao rapyakhi chak-an thulpirou.” Heisi toubine ani yaiyei malungamnanungei tlouya yunpibini yaya ukning toutomkur.

22Heisitoubi Joseph'ne aiyei bommaile, upawayei bommaile kalhonni Egyptra paalkur. Joseph'ne aiyei chaanrou kum macha'le chipbil pulchini paalwurkhou. 23Joseph'ne Ephraim'yei chanao rapbei yuthun khyumtam tlungni mukhou. Manasseh'yei chanao, Machir'yei chanao rapkhi Joseph'ne hibongei kheenrouthil pukbini aiyei yu-cha rapya mukhou. 24Heirou Joseph'ne aiyei teinao rapnungei shunpikhou, “Keiri hinei kheen roshuk hungtlungura, heiya Dunpune nayari lakkhoumakrou; heitoubi Ane naya bi arouwei ruithutloubi Abraham, Isaac heirou Jacob'nungei piroume toubi kantompikhou ramra hanui ruilhakpithurou.” 25Heitoubi Joseph'ne Israellei chanapawa rapya tlou kantomyerbi kyun, “Dunpune nayari lakkhoumakrou, heitoubi nani keiyei thru rapya bi arouwei urloubini shaallou da.” 26Heisitoubi Joseph'ne kum machale chip leikhoubi hikur; heirou yani aiyei khilhungya chulmaknanungei louh manuiphaangbi, Egyptra khamh#50.26: khamh: khilhung lhakna theengkung. sabi heiyei rilla lhakbini khoukur.

Currently Selected:

KANTHOUNA 50: MARIBSI

Highlight

Copy