KANTHOUNA 49

Jacob'ne Aiyei Chanapawa Rapya Shunmatupikhou

1Heirou Jacob'ne aiyei chanapawa rapya ungmarkumbini shunmatukhou, “Na namma ungkartilbi keileinara hungchangalo; heirou keine nanungei hillou naidoura hungthukrou kyou lhou rapya shunpikhouweise. 2Hungkarnakbi ninglaklo, Oh Jacobei chanapawarap, heitoubi naipawa Jacobei shunpikhou tlou rapya nai ukrei tlou khoini louninglhaklak. 3Reuben, nangri keiyei chanapawa samranme, nangri keiyei mantrangrei yenwaikyou, keiyei watlhourei hutlha heime; heitoubi keiyei tangchana bom, keiyei hoikna thang'al heiri neinungei kleiso! 4Heiya nangri bi naimak yui tangnakni, nangri katduibaang touri naimakrou; ngamri nangni nai pawaei shangram rkhumra changbini, nangni keiyei rkhumya marmokyerwurla! 5Simeon'le Lev yakhuntari pukmalkna teinao; heirou yakhu teinaoweiri khril thuithi heini yaiyei hutshu khoini leilei. 6Oh keiyei lhawai#49.6: thang'al., yarukhniyei pongra tlou shunmaturilnara hungkarnakmak, heirou yaiyei kartilnarakhi yaothungmak; kouweiyo toulanungri yani malungkhayei kaalnangri thimikhi hatkur; heirou yaiyei kning hilthungni halpa rapbei hokhi umdeekkur. 7Yaiyei malungkha heiri manchokur hoiniyasu; ngamri heiri thuithiyachak; keine heiya Jacobei chanao rapbei rillei yerkhaipirou; heirou Israellei thimi rapbei hangra touchekrouwa. 8Judah nangri neiyei teinao rapbei mathangnabom hoirou; neihutni neiya yeekna thimi rapya ngakra khrakphopbi rkolcharou. Neiyei pawayei chanao rapne neimaibongra sikhuplhakbi khrumheirou. 9#Msh 24.9; Kre 5.5. Judah'ri yangkong shunnaksi, sraltang an maitekloubi rabura yenkallengbi, yangkong panakni aiho shungmherbi neikur, heirou ani yangkong tara'nakni neibi leiyeinangri huni ayari toukanthou'ngamrouwo? 10Krungei shungkrokri(cheishu) Judah'rouwei hunikhi louheichangmakrou; heirou aiyei ho khintamei tlakrei kaiphumbi khoukur pichar Puwei cheishu heikhi, heiyei Pu Shilohni yenkallengbi, heirou aiyei lim nammani kartilbongnung airouwei hunikhi louheichangmakrou. 11Aiyei gadha pui heiwiri darkha trungra msuiphopbi khoulei; heirou gadha shunchari yerrouwei lhangai darkha trungra msuiphopbi khoupilei; aiyei shamb heiri heenak maraokur darkha yuini shumathailei. 12Aiyei mitlung heiri darkhayui mongloubi heenakni mraorouwa; heirou aiyei ha heiri nushungyui mongloubi ngourouwa. 13Zebulunri Samadru ruira paalrouwa; heirou a heiri Samadru ruirei mali mathrumna bi hoirou; heirou aiyei ramri Sidonbil ri karchunrou. 14Issacharri putyum khintamyei tlakra neibi, put urkanthrambi klei mantrang lhangai gadha pa'naksi. 15Heirou ani mathrilna bi lhangai khat mulhakkur; heitoubi bi heiri nungkngaiyei ram hoilei; heitounei ngammei ani put khritya khangbaangbi loudounungei aiyei khlabaang yukunsundakur; heingammei ayari nambini miyei shok hoiyerkur. 16Danri Israellei limkhat khoini aiyei thimi rapya pichar touthimi pu hoirou. 17Danri lamtlairei klei frulnaksi; rultuni lamtlaira neibi, sapuk hokhungra chikyeinang, sapuk tung thimini hil'lhangra kallaangsundakur heinaksi thimi hoirou. 18O Umpu! Keine Neiyei ralthutpiya ngaakbi leikurame. 19Gadri, yeekna raal'mucha thimi rulkhatni aidoura raal dabini luklouheirou, heiya hillouri ani hanui raal hunglukthurou. 20Asheryeiri chanung-mainungei watmakrou; heirou Krungei murchak mnik ramphayakhi airouwei thukrou. 21Naphtaliri, kulchalmakei klei rchao kalla'naksi; airouwei chanao lhangai shunrou. 22Heirou Josephri lhangaiyei hei'khei heengban'naksi; kungruirei pukbi klei heeng'naksi; aiyei ban lhangai heiwari chiekpalyakhi katduini yambaangeirou. 23Malaa shin thimi rapne aidoura raal dakur, heitoubi aya malaa'nekhi kaapkalleiyurpi, heirou thuithinekhi mreknawurpi. 24Heiya aiyei malaa-taak heiyari deekyerchangmak; heirou aiyei hutbang heikhi Jacobei Toumani Pu Dunpune mantrangyerkur(airouweine Israel rapbei Thlungtang, Yaosilpu khat hungthukheirou.) 25Neipayei Dunpune neiya trungpirou, Toumani Dunpune neinungei Thangmun ramrei phorle kalhonni, heirou Samadrurei phor pikurnaksini, shullam shunnarei nuyuini chanao rapnungei phor pikurnaksini pilaksu. 26Neipawayei phor heiri, keimaibongei patar rapbei piwurkhou phoryakhi duini, klui naimak lhunglim-daamlimyakhi duini, phor namyerwa heiri Josephbei doura yongdakur hoiniyasu; heirou phor heiri aiyei teinao rapbei khaithutkur napawaei lukhup doura yongdapilaksu. 27Benjaminri, chak'msulkur yekshang'naksi hoirou; ningshunnang ani murchak phacha-phamairou, heitoubi masanungri minungei lungbini yenlhakkur putchei rapya yani yerkhairillou.”

28Yarap namma heiri Israellei phunghlam chiple khni yenraanna thimirap. Heisitoubi yai pawani yaiyaiyei touwurkhou lhourap hilthungni, heirou yai ukning hilthungni thibi thimi kantangnung shunpibi phor piwurkhou.

Jacob'ne Hiyanungri Aya Khiruinei Ngamrou Shunmatupikur

29Heirouri Jacob'ne aiyei chanao rapya chaytlou'le kalhonni yanungei shunkhou: “Asinungri keiri hirouyouwa, keiyei patar rapbei bira charouwa; heirou keine hiyanungri Hittia ramrei Ephron'ra keiyei pawa rapbei lhanra phumpilak. 30Canaan ramrei klei Mamre'yei kulkung lhangra Abraham'ne aya khi-ruinanungei toubi ram bi khat Hittiayei napawa Ephron'yei hutrei lokhoukur Machpela'yei phaikara klei thlungpur lhan heihakrou keiya phumpilak. 31Bi heitamrou yani Abraham'le aiyei nu Sarahya phumwurkhou; bi heihakrou yani Isaacle aiyei nu Rebecahyakhi phumkhou; heirou bi heihakrou keine Leahyakhi phumwurkhou. 32Heiyei phaikar heile, heirou thlungpur lhanbomrap leina ram bi heiri Hethyei chanapawa rapbei hutrei tuy pibini lowurkhou ramthil.” 33Heitoubi Jacobne aiyei chanapawa rapya chaytlouni shunmatupiya luiwurbi, heirou aiyei horap heiri ipnadoura khangbaangurbi heisi kat'hikur, heitoubi aiyei lhawaini aiyei patar rapbei biranung chakur.

Currently Selected:

KANTHOUNA 49: MARIBSI

Highlight

Copy