KANTHOUNA 48

Jacob'ne Ephraim'le, Manasseh Yakhu'teinaoya Phor Pikur

1Heihillouri asitoubi hungthukkura, touri thimi napung khatni Joseph'nung paotamkur, “Thilak, nai pawari nawura.” Heisi tounarouri ani aiyei chanapawa napung'khni, Manasseh'le Ephraim yakhuntaya ruilouheibi aiyei pawaei leinara wachangkur. 2Heirouri thimi napung khatni Jacob'nungei pao loushunpikur, “Thilak, neiyei chanapawa Josephri neileinara wachanglei.” Heirouri Israel'ne kyun heiya mayeknarouri ai'mshara mantranglhakbi ipnarei loukanthoubi rkhum doura ka'omkur. 3Heirouri Jacob'ne Joseph'nung loukyun, “Canaan ramrei Luz'ra leiyeinung Toumani Dunpune keinungei kar'anyerbi, heitoubi keiya phor piwurkhou. 4Heirou keinungei asitoubi shunpikhou klei, ‘Thilak, Keine neiya lungpunyerrou, heitoubi neiyei yu-cha rapkhi chungni pung'shaanyerrou, heitoubi neiyei Bommairei thimi Lim chungni thukyerrou; heitoubi ram ahakpaya neihillei hungrou kyou yu-cha rapne klui naimakni paalnanungei pirouwa.’ 5Heineri asinungri keine neiyei leina Egyptra yuchangbongei loupukkur neiyei chanapawa napung'khni, Ephraim'le, Manasseh yakhunta heiri, Reuben'le, Simeon yakhuteinaoni keiyei hoinaksini, yakhuteinaokhi keiyei hoirouwaso! 6Heitoubi yaihillei pukrou kyou neiyei shullamrei chanao rapri neiyei hoikya, heirou yaiyei minlamkhi yaiyei shullam yenraanna, yaiyei teinao rapbei minlam hilthungni thullou da. 7Heitoubi keiyeiri, keine Padan'rouwei hoyoubi chayeinang, Canaan rammei Ephrath bi wa'tlungbong'chekrou, keiyei lhawai lah'knaei shakrung khoini lamrakra Rachel hilhakurbi, heirou keine aya Ephrathyei lamruira phumwurkhou; (bi heiwari Bethlehemya mu'kna).”

8Heirouri Israel'ne Josephbei chanapawa napung'khniya louthibi loukngai, “Yakhunta heiri huhuwo?” 9Heirou Joseph'ne aiyei pawanung louyunpi, “Yakhunta heiri bi arouwei Dunpune keinungei pikur keiyei chanapawa rapme.” Heirou ani shun, “Heiyanungri, kringpibi, yakhu'teinao heiri keinungei yenruilhaklak, keine yakhuntaya phor piyeise.” 10Kheen heirouri Israelri tarwurnei ngamrou mitkhi mehwura; heitounei ngammei aiyei mitri kandangni muchangmakura. Heingammei Joseph'ne yakhu'teinaoya aiyei pawaei pongra yenruilhakpikur; heirouri yasiya loukui'rkolbi machuppikur. 11Heitoubi Israel'ne Josephnung shun, “Keineri neiyei mairungya mukhoumarousame toubi ningchakhou, heiya thilak, Dunpune neiyei chanao rapyakhi keinungei mutpiwurla.” 12Heirouri Joseph'ne yasiya aiyei pheikhnang tlakrouwei khangtheiwurbi, heitoubi ani thleira aiyei mai sikhuplhakbi khrumkur. 13Heitoubi Joseph'ne yakhuntaya taanglouheikur, heitoubi aiyei thyarei hutni Ephraim'ya churbini Israellei thyoi lhangra khoubi, heirou Manasseh'yari aiyei thyoirei hutni churbi, Israellei thya lhangra khoubini ai'maibongra yenruilhakpikur. 14Heirouri Israel'ne aiyei hutbangrap heiri thyoi-thya khingmarlhakbi loulamthutbini, thyarei hutbangni naowa Ephraimyei lura, heirou thyoirei hutbangni Manassehyei ludoura, Manasseh heiri cha samranme toubi murerikhi loukhoupikur. 15Heirou ani Josephya phor pibini asitoubi kyun, “Keiyei parap Abraham'le Isaacne uklumkhou Pu Dunpune, heirou keiyei chaan khatrekrou angtu rampha yukpibi klei Dunpune; 16heirou keiyei chaanrou klah'knang kounakrei kalthutpikur Thangringni, napawa douwa napung'khniya phor pipilaksu; heitoubi yai'ngamrou keiyei minkhi mitmakniyasu; heirou keiyei parap Abraham heirou Isaacyei minkhi mitmakni yaidoura leiniyasu; heirou tlaipangpalla yaiyei yu-chakhi chungwani shunniyasu.”

17Heirouri Joseph'ne aiyei pawaei thyarei hutbang heini Ephraimei lura churbi klei heiwaya mulhakkur heirouri, aiyei ukningra nungwaimakura; heitounei ani aiyei pawaei hutya Ephraimei lurouwei heiloubi Manassehyei lura churyernanungei marshikkur. 18Heitoubi Joseph'ne aiyei pawanung shun, “Pawa, heiri lehwurame; awane upame; neiyei thyarei hut heiso aiyei lura khoupilaklo.” 19Heiya aiyei pawani heishun heiwaya yanimakni ani loukyun, “Keine muleime, keichawa; keine mulei touri akhi thimichung rulkhat kathukheirou; heirou aiyeikhi thimi lim tangkhat thukheirouhui; heiya tanghakneri aiyei naowani ayari duini tang'thimi hoirou; heirou aiyei yu-cha rapri thimi mshing sherchichangmakni lim tangkhat khoini kathukrou.” 20Tlaini heirou ani yaya phor pibini kyun, “Naingamrou Israel rapne phor piyeinang asitoubine yunrou, ‘Dunpune neiyari Ephraim'le Manasseh'nakni hoiyerlaksu.’ ” Heisi toubi Israel'ne Ephraimyari Manassehyei maibongra mayungyerkur. 21Heitoubi Israel'ne Josephnung shun, “Thilak, keiri hirouyouwa; heiya Dunpune neiya kalhonpirou; heitoubi neiyari Ane neiyei patar rapbei ramra hanui yenruilhakpithurou. 22Heiyakhi duinara, keine neiyei teinaorap deinungei silnakhoumakni, Amoria rapbei doura keine raalshon'le malaa shinbini raal maniwurbi loulhakwurkhou ramya keine neinungei silnakhou awariya.”

Currently Selected:

KANTHOUNA 48: MARIBSI

Highlight

Copy