KANTHOUNA 47

Jacobei Bommaini Goshen'ra Paalkur

1Heirouri Joseph'ne hungchangbi Pharaoh'nung pao hungtambi kyun, “Kai pawale, keiyei teinao rapne yaiyei yaorul-halrul rapkhi, heirou yaiyei klei putchei-lalthum nammakhi kyaoni, Canaan ram'rouwei shaalthutdurbi, Goshen ramra yu'tlungbini leiyura.” 2Heitoubi ani aiyei teinao rapya, ya napung phanga ruilhakloubi, Pharaoh'yei maibongra wachangkur. 3Heirouri Pharaoh'ne Josephbei teinao rapnung loukngai, “Nari koulhou tou thimiyo?” Heirouri yani loumallangbi kyun, “Kari kaiyei patar rapbei chaanrouwei waiyoubi yaosil-halsil thimirap hoiyabini, neiyei shokrap kakhi yaosil thimi rapme.” 4Heiyakhi duinara yani Pharaoh'nung shun, “Kari ramtaang thimirap khoini ram arou yuchangkura, ngamri Canaan ramra butamni thuithini norwurnei, neiyei shok rapbei yaorul-halrul rapbei shainungei namhkhi makkura; ngam heineri, asinungri neiyei shok kani neinungei bucha'kniri, kaya Goshen ramra yul dayerbi paalyerpilaklo.” 5Heitounei Pharaoh'ne Josephya ungbi shun, “Nei pawale, neiyei teinao rapri neileinara yuchangura; 6heineri Egyptbei ram awari neihutra klei heiriya; ram aei yerrouwei lhangaina bi khatra nai pawale heirou neiyei teinao rapya leiyerlaka, yayari Goshenra yul dayerlaka; heirou nangni thilhakbini yaihangra lhangai heirou krakthimi yaowanungri khalthutbi keiyei yaorul-halrul rapya silyerlaka.”

7Heirouri Joseph'ne aiyei pawa Jacobya Pharaohyei maibongra heiruilhakbi, aya rikrai khrumyerkur, heitoubi Jacobne Pharaohnung phor pikur. 8Heirouri Pharaoh'ne Jacobnung loukngai, “Nangri neimshaei kum kounak tlungurawo?” 9Heirou Jacobne Pharaohnung loukyun, “Keiyei tlaipang chaan awari ramtaangbi yenpuichakuri kum machale somthumbil tlungura; keichaan awari kum chungmakhui, kai pawa rapne puichabi ramtaangbini yenpaalkhounei chaanyei kum mshingyari kaphamakhui, heiyanungkhi klah-mrimneri bil thimmura.” 10Heirou Jacob'ne heisi yenyunbi, Pharaoh'ya phor pikur, heitoubi aiyei maibongrouei wathukbi shaalkur. 11Heisitoubi Joseph'ne aiyei pawaya, heirou aiyei teinao rapya Egyptbei ramra bichani leinanungei toubi bikhat silpikur; heirou Pharaohyei chay hilthungni Egyptbei rilla yerrouwei lhangaina ram Rameses khukarthillei pongra ani yaya yuldayerbi paalyerkur. 12Heisitoubi Joseph'ne aiyei pawayale, aiyei teinao rapyakhi heirou aiyei pawaei cheemmai-bommairei thimi rapbei thimi mshing hilthungni, ya nammaei chanung-mainungei kroni marshikbi thulpikur.

13Kheen heirouri tlaipangpal ram bi kantangrou chanung-mainungei tsai-ankhi phamakurchiya, ngamri trum heiyei butam thukkur heiri yunnungei makni thuithikur khat hoikur. Heingammei Egypt'rakhi heirou Canaan ramrakhi tsai-an yenluilhakurla. 14Heirouri Joseph'ne Egyptbei thimi rapreikhi heirou Canaan ramrei thimi rapreikhi cha yornei tuy rapya markumbaangbi, heitoubi Pharaoh'yei Krungbomra ani katpibaangkur. 15Heirou Egypt ramreikhi heirou Canaan ramreikhi thimi rapne yaiyei tuy luilhakkur heirouri, Egyptrei thimirap nammani Josephnung wachangbi kyun, “Kanungei tsai-an pilaklo, kani koutoubi neimaibongra chamak-maimakni hirouwo? Ngamri kaiyei tuykhi luilhakurchila.” 16Heirou Joseph'ne loushun, “Nane naiyei tuy makkanungri, naiyei hal rapya keinung pilaka, heiyanungri keine nai chanungei cha pirou.” 17Heitounei yani yaiyei halrap heirou yao rapya Josephnung heipilhakkur, heirou Joseph'nekhi yanungei sapuk rapbei manle, hal rapbei manle, yao rapbei manle heirou gadha rapbei man khoini cha'le tsai-anya loukartlengkur, heisitoubi heiyei kumrouri ani yanungei ui-waa rapbei manya cha khoini kartlengrilbini yaya chak-an lhakpikur. 18Heirouri heiyei kumri yenluilhakur hillouri thangei kum heiroukhi yani Josephnung wachangbi shunchakur, “Upawa kani neiyei maibongra koukhatkhi yulkhoumakni yunthutdeise, touri kaiyei tuykhi heirou ui-waa rapkhi makthammura, neihutra namma leiwurchiya; upawaei kmu heiriya; heirou kaiyei kleiyo touri kai sharungle, kaiyei ram heitomngeiya. 19Koutoubi kale, kai ramri neiyei maibongra maangrouwo? Heirou kai'mshale kaiyei ramkhi Pharaoh'yei shok khoini loulhakpilaka; heitoubi kaya himaknanungei trunwai lungya pilaklo, heiyanungri kairam awakhi purvi-purcham#47.19: purvi-purcham: Chaktaang thukbi chamu-maimumakur. khoini leimakarou.”

Butaam Thukkurnei Klah-mrimkur

20Heisitoubi Joseph'ne Egyptbei ram namma lobini Pharaohyei hoiyerkur; ram heirouei butam thukkur heini thuithiyachaknei ngamrou Egyptbei thimi kantangni ai'aiyei ram heirou loubomrap nammakhi yorwurbi, heitoubi loubomrap heiri Pharaohyei hoiyurchikur. 21Heisi toubine Egyptbei ram mnak lhangkhat'rouweini mnak lhang'khat wa'tlungni paalbini klei thimi rapya Pharaohyei Krungbomra ungbaangbini shok hoiyerkur. 22Heiya suipipu rapbei ramyari ani loloumakni horkhou, ngamri suipipu rapyari Pharaoh'ne yuwal'tuy sheempikhou; heitounei ngamrou yani heiya chamaibini, yaiyei ramri yormakkur. 23Heirouri Joseph'ne thimi rapnung shun, “Thilak, angturi keine nayakhi heirou naiyei ramkhi Pharaohyei hutrouwei lopiwurla; asinungri nanungei trunwai lungrap marshikbini khoupiwurlame, nani loulaka heitoubi naiyei loubomra tuklhaklaka. 24Heitoubi nani trunwai lukyei kheenrou siruk phanga thuknarei siruk khatri Pharaoh'nungei hoiyerrou da; heitoubi heiyei siruk phaliri nainungei hoinalaka; heitoubi nai loubomra tuknungeikhi, heirou nai bommaiyei heirou nai chanao rapbei chanung-mainungeikhi hoiyerlaka.” 25Heirouri yani loukyun, “Upawa nangni kaiyei rongchanya kalpiwurla, heineri neiya malung pilkyer khoini kani Pharaohyei shok khoini leirouwame.” 26Heisitoubi Joseph'ne Egyptra chaylam khat sheemthutkhoubi angtu ramphani chaleihui, touri ram heiyei putthuk trunwaiyei lung siruk phangaei siruk khatri Pharaoh'ne pharou, heiya suipipu rapbei ramri Pharaohyei hoimaklei.

27Heisitoubi Israel'ne Egyptbei ram Goshenra yuldabini paalkur. Yane bi heirouwei ramkhi yaisiruk khoini phabini, trunwaikhi marthumni looklhakbi, heirou thimi pung-shaanni paalyoukur. 28Heirou Jacob'ne Egyptra kum chiple-eni yupaalwurthu; heisitoubi Jacobei chaanrou kum machale somlile'eni paallurkhou.

29Heirouri Israel(awari, Jacobya kyun) hilum hungphawurnarou, ani aiyei chanapawa Josephya ungbini shun, “Kounakpi nangni keiya malungshipiyanungri, asinunghak keiyei pheikhnang doura neihut heikhoupilak, heitoubi keiyei shunya hilthungni baimakni chabi, heirou rikrai khrumknale kalhonni chanthungroume toubine tlou kantomlak. Heitoubi keiyari Egyptra phumpimak. 30Heiya keiyari keiyei patar rapbei bira pulni phumpilak; heirou nangni keiyari Egyptrouwei urthutloubi, heitoubi yaya phumna bira phumpilaklo.” Heirouri Joseph'ne loumallang, “Neiyei shunpikur heinakrim keine toupirou.” 31Heirouri ani shun, “Heiyanungri keinungei tlou kantomlak.” Heisi tounarouri Joseph'ne anungei tlou kantomkur. Heirouri Israel'ne aiyei ipna rkhum doura mai sikhuplhakkur.

Currently Selected:

KANTHOUNA 47: MARIBSI

Highlight

Copy