KANTHOUNA 46

Jacob'ne Aiyei Bommai'yei Thimirap Kyaoni Egypt'ra Yukur:

1Heirouri Israel'ne aiyei klei putcheirap nammale kalhonni lamtlabi, Beer-sheba'ra yu'tlungkur, heitoubi ani bi heirou aiyei pa Isaacyei Dunpunung Puwatlhou makatbi khrumchakur. 2Heirouri Dunpune Israel'ya kar'anyerbi masanung anungei loushunpikur, “Jacob, Jacob,” heirou ani loumallangkur, “Kouweiyo, keinungei bei shunpilaklo.” 3Heirou Ane loushunpi, “Keiri Dunpu, neiyei Umpume; Egyptra chimakni yuchangalo; kouweiyo toulanungri, bi heirouwei Keine neiyari tang limkhat khoini katshunyerrou. 4Nangni Egyptra yuweinungkhi Keine kalhonpirou, heirou hanuikhi bi heirouwei Keine neiya shuimakni yenruimallengpithurou. Heirou Joseph'ne neiya khi'ramphani watlhou toupirou.” 5Heitounei Jacobne Beer-sheba'rouwei kanthoubi chayoukur; heitoubi Israelyei chanao rapne yai pawa Jacobyale, yaiyei nu-cha rapya, Pharaoh'ne aya urnanungei toubi pithungkur sapuk kaarira tungyerbi yukruiheikur. 6#Pao 7.14,15. Heirouri yani Canaanra dunkhou yaiyei yaorul-halrul rapkhi, heirou yaiyei putchei-lalthum rapkhi urlouheibi yani Egyptra yukur, Jacobkhi heirou aiyei yu-charap nammakhi kyaoni yukur. 7Aiyei chanapawa rapkhi heirou aiyei chanapawa rapbei chanao rapkhi; aiyei chanapuiya rapkhi heirou aiyei chanapawa rapbei chanapuiya rapkhi; heirou aiyei yu-charap nammakhi akou kalhonni Egyptra yukur.

Egyptra Yutlungkur Thimirap

8 # Hoy 1.1-4; Msh 26.4-50. Heirou Egyptra yudakur Israellei chanao rapbei minlamri asitoubi klei: Jacoble heirou aiyei chanapawa rapri: Reuben, Jacobei chanapawa samran. 9Heirou Reubenyei chanao rapri: Hanochle, Phallu heirou Hezron'le, Carni. 10Heirou Simeonyei chanao rapri: Jemuel, Jamin, Ohad, Jachin, Zohar, heirou Canaania napuiyaei chanapawa Shaul. 11Heirou Leviyei chanapawa rapri: Gershon, Kohath heirou Merari. 12Heirou Judahyei chanapawa rapri: Er, Onan, Shela, Pharez heirou Zerah (heiya Er'le Onan'ri Canaan ramra hiyura). Heirou Pharez'yei chanapawa rapri: Hezron heirou Hamul. 13Heirou Issacharyei chanapawa rapri: Tola, Phuvah, Job heirou Shimron. 14Heirou Zebulunyei chanao rapri: Sered, Elon heirou Jahleel. 15(Padan-aramra leiyeinung Leahni Jacobnung pukkhou chanapuiya Dinah kyaoni aiyei chanapawa raple, chanapuiya rapri napung somthum'le khyumbil tlung). 16Heirou Gadyei chanapawa rapri: Ziphion, Haggi, Shuni, Ezbon, Eri, Arodi heirou Areli. 17Heirou Asheryei chanapawa rapri: Jimnah, Ishuah, Ishvi heirou Beriah, heirou yai charwi Serah; heirou Beriahyei chanapawa rapri: Heber heirou Malchiel. 18Yarap heiri Laban'ne aiyei chanapuiya Leahnung shok khoini pithungkur napuiya Zilpahni Jacobnung pukkhou chari napawathil, yarap heiri pulni napung chiple thruk tlung. 19Heirou Jacobei nu Rachelyei chanapawa rapri: Joseph heirou Benjamin yakhu teinao heiriya. 20Heitoubi Egyptbei ramra leikhouyeinung On yultlaiyei suipipu Potiphera'yei chanapuiya Asenath'ne Joseph'nungei Manasseh'le, Ephraim yakhu teinao pukkhou. 21Heirou Benjaminyei chanao rapri: Bela, Becher heirou Ashbel, Gera, Naaman, Ehi heirou Rosh, Muppim, Huppim heirou Ard. 22(Yarap heiri Rachelni Jacob'nungei pukkhou cha napawathil; Yarap heiri nammani napung chiple phali tlung). 23Heirou Danyei chanapawari: Hushim. 24Heirou Naphtaliyei chanapawa rapri: Jahzed, Guni, Jezer heirou Shillem. 25(Yarap heiri Laban'ne aiyei chanapuiya Rachelnung shok khoiyei pithungkur napuiya Bilhahyei chanapawathil: heirou ani Jacob'nungei pukkhou chanapawa'thilkhi pulni napung'eni tlung). 26Jacobne Egyptra yuyei kaalnangri aiyei chanapawa rapbei nu rapya mshing sherchokmakni, aiyei pukkhou chanao thilkhi pulni napung somrukle thrukbil akou kalhonni yukur. 27#Pao 7.14. Heirou Joseph'ne Egyptra chanapawa napung'khni pukkhou: Jacobei bommairei thimi napung somret Egyptra yuchangkur.

28Heirou ani Goshen ramra Josephya maibong-lamkrini loumurilnanungei toubi Judahya louyilkur: heitoubi yani Goshenyei ramra yu'tlungkur. 29Heirouri Joseph'ne aiyei sapuk kaari rapya loumarshikbini, aiyei pawa Israelya murilnanungei toubi Goshenra kathukbi louklei; heitoubi ai'mshani aiyei pawaya loumurilbi, heirou aiyei ngakhungra loukui'rkolbi beimak tlani chapkur. 30Heirouri Israel'ne Josephnung shun, “Asinungri keiri hikur yawura, ngamri neiyei mairungya keine muphawurla, nangri himakhuilei.” 31Heirou Joseph'ne aiyei teinao rapnung'le, aiyei pawaei bommairei thimi rapnungei loukyun, “Keine Pharaoh'nung wachangbini, ‘keiyei teinao raple, heirou keiyei pawayei bommaikhi nammani Canaan ramroueini keiyei leinara yu'tlungurame, toubi pao tam'rouwa. 32Heitoubi keiyei teinaorap heiri halsil-yaosil thimithil; ngamri yani yao heirou ui-waa dunbini yenpaalkhei. Heineri yani yaiyei klei yaorul-halrulrap nammaya yukhulheibini yukura,’ toubikhi anungei yunpirouwa. 33Heirou kounakpi Pharaoh'ne naya lou'ungbi, ‘Naiyei lilkhoi watlhouri kouwo?’ toubine loungailanungri; 34heirou nani asitoubi loumallanglak, ‘Neiyei shokrap kaiyei lilkhoi watlhouri, douwei waiyoubini asilumpha hal silbini klei awariyame; kakhi heirou kaiyei pawa rapkhi halsil thimidikme’ toubine louyunlaka. Heiyanungri nari Goshenra yuldabi paalkur yarou. Ngamri Egyptrei thimi rapnungeiri, yaosil-halsil thimi rapyari machinkna.”

Currently Selected:

KANTHOUNA 46: MARIBSI

Highlight

Copy