KANTHOUNA 35

Jacob'ne Bethel'ra Heihungkur

1Heirou Dunpune Jacob'nung shun, “Kanthouwalo, heitoubi Bethel'ra kabini paallakalo; heirou nangni neiyei tei Esau'wei bom'rouwei trukkuryei kheenrou neinungei loumuyerpikur Dunpu'nungei nangni bi heitamrou khrahpal khat sabaanglaklo.” 2Heirouri Jacobne aiyei bommaiyei thimi rapnungle heirou akou leikalhon thimirap nammanungkhi shun, “Naihangrei khrumbi klei thrailha rapya khingurlaka; heitoubi naitamni marthingthutlaka, heirou naiyei phirul-phishambkhi martlenglaka. 3Heitoubi kani kanthoubi Bethel'ra kawase; heirou keine klah dayei kheenrou keinungei loushunpikur Pu, heirou keiyei yenchaheina bi kantangrou kalhonpikhou Pu Dunpu'nungei keine bi heirou khrahpal khat sabaangroume.” 4Heisitoubi yani yaiyei khrumkhou thrailha rapya namma heiri Jacobei hutra heipilhakkur, heitoubi yai khnarei nakhou sinapar rapkhi namma anungei silnakur. Heitoubi Jacobne heirapya Shechemei bok'heeng holira phorphumbi yulkhoukur.

5Heirouri Jacobne aiyei chanao raple hoyoubi lamtlayei kheenrou, yaya karhillei klei khukarthillei thimi rapbei doura Dunpurei chi'kna khat pukyerkur; heitounei ngamrou ya thimi hukhatnikhi Jacobei chanao rapya chanthungamakkur. 6Heisitoubi Jacobne aiyei thimirap nammale kalhonni Canaan'rei klei Bethel toubikhi ung Luzra wa'tlungkur. 7Bi heitamrou ani khrahpal khat sabaangkur, heitoubi heiyei minri El-Bethel#35.7: Bethel'yei Dunpu. toubine thulkur; ngamri ani aiyei tei Esau'wei bom'rouwei trukwuryei kheenrouri bi heitamrou Dunpune anungei churungknani murilkur. 8Heiya Rebecahyei shok-napuiya Deborah hiwurbi, Bethelyei khate lhangra bok'heeng trung khatdei holira phumwurkhou; heitoubi bi heiyei minri Allon-bacuth#35.8: Chapna bi Bok'heeng. touri ‘Khi kanrilbi chapna bi bok'heeng’ toubine ungkur.

9Heirou Jacobne Padan-aram'rouei yenkallengei kheenrou Dunpune hanuikhi anungei churungknani muyerbi, heirou anungei phor piwurkhouthu. 10Heirou Dunpune anungei shun, “Neiyei minri Jacob toubi unglei: heiya asinungri neiminri ‘Jacob’ toubi ungmakarou, heiya ‘Israel’ toubine neiyei min hoirouwa.” Heisitoubi Dunpune aiyei min Israel toubine ungkur. 11Heirou Dunpune anungei shun, “Keiri Yerrouwei Mane-Mantrang Dunpume; neiyei yu-cha shunbini pung-shaanlakasu; heitoubi neirouwei Lim khatpithil nimakni Lim deikhi thuklaksu, heirou Krung kounakkhi neiyei shullamrei hungthuklaksu. 12Heitoubi Keine Abraham'le Isaac'nungei piwurkhou ram heikhi neinungei Keine pirouwa, heitoubi ram heiya neihillei hungrou kyou neiyei yu-cha rapnungei Keine pirouwa.” 13Heirouri Dunpune aya tlou kallangrilna bi heiya lakurkhoubi shaalkur. 14Heirou Jacobne Dunpule tlou kallengrilna bi heihakrou thlungei shutlai khat bunkanthoukur; heitoubi ani heiyei darkha yuile, shirek shungphangbini Dunpuya makatbini khrumchakur. 15Heirouri Jacobne Dunpukou tlou kallangrilna bi heiya Bethel toubine min thulkur.

Rachel Hikur

16Heirouri Jacobne aiyei thimi rapne Bethel'rouwei shaalthutdurbi, heirou yani Ephrath wa'tlungbong-chekrou, lamrakra Rachelri naopuknei manshaan kna waiyouwurbi beimakni klah-mrimkur. 17Heirouri asitoubi thukkur, touri ani beimak mrimni manshaanchayei kheen heirouri aya naokal hoipi shok-napuiya heiwini anungei shun, “Nang chimak, napawa khat pukthurou youlei.” 18Heirouri asitoubi hungthukkur, touri Rachelni naopuk waishangkhoubi, heirou lhawai chipbongnung ani naochaei min Ben-Oni#35.18: keiyei lhawai klahyei pomkhou chanapawa. toubine thulkhou, heitoubi a hei kat'hikur; heiya aiyei pawaneri naomin heiri Benjamin#35.18: keiyei kanchangkna thyarei-mantrang hoikna chanapawa. toubine thulkur. 19Asitoubine Rachel hiwurbi, heirou aya Ephrath (touri, Bethlehem) wana lhangei lampalla phumkur. 20Heirou Jacobne Rachelyei lhan doura thlung shutlai khat bunbaangkhou, heitoubi thlung heiya angtu rampha Rachel'yei lhan'thlung toubine munaleihui. 21Heirouri Israel'ne heisi lamtlabini, heirou ani Edar'yei cheem shangkai chouya beicha yuktladuibini aiyei khuiluphiyei cheem khat sabaangkur.

22Heirouri asitoubine hungthukkur, touri Israel'ne ram heitamrou leikhouyeinung, Reuben'ne aiyei pawaei nukhu Bilhah'ya ippikur; heirou Israel'nekhi pao heiri mayekurla. Asinungri Jacobei chanapawari napung chiple khni tlung. 23Leah'yei chanapawa rapri: Reuben(Jacob'nungei pukkur samran), heirou Simeon, Levi, Judah, Issachar, heirou Zebulun. 24Rachelyei chanapawa rapri: Joseph'le Benjamin yakhuteinao heiria. 25Heirou Rachel'yei shokpuiya Bilhah'yei chanapawa rapri: Dan'le Naphtali. 26Heirou Leah'yei shokpuiya Zilpah'yei chanapawa rapri: Gad'le Asher. Yarap namma heiri Padan-aram'ra leiyeinung Jacob'nungei pukkhou cha napawathil.

27Heirou Jacobne aiyei pawa Abraham'le Isaacne yultangbi paalkhouna Kiriath-Arbah touri Hebron'yei khukarthil Mamre'ra aiyei pawa Isaac'ya wamurilkur. 28Kheen heinungri Isaac'yei kum machale somshri tlungura. 29Heirou Isaac'ri hilum phawurnei, aiyei roshukni tambini hiyura; heitoubi aiyei thimi rapbei bira kartillura. Heisitoubi aiyei chanapawarap Esaule Jacobne aya khi ruikur.

Currently Selected:

KANTHOUNA 35: MARIBSI

Highlight

Copy