KANTHOUNA 33

Jacob'ne Esau'ya Murilkur

1Heirouri Jacob'ne mangalthutbi aiyei mitni louthiyei kaallouri, thilak, Esau'ne aiyei thimi macha-phali'le kalhonni wakur heiya ani loumuwurla. Heingamei ani aiyei chanao rapya Leah'le, Rachel heirou aiyei shok napuiyarap napung'khniyei hangra yerkhaibi loukhoukur. 2Heitoubi shok-napuiya rapyale yaiyei chanao rapyari maibong lhangra loukhoukur; heitoubi yaihillari Leah'le aiyei chanao rapya louleiyerkur, heirou heiyei hil'hakrani Rachel'le Joseph'ya hiltoyerkur. 3Heirou aimsha'hakni yaiyei maibongra hungthukbini, heitoubi aiyei teinaowaei maibongra wa'tlungbongyen thleira enibuirek kanellhakbi khrumthotho wachangkur.

4Heirouri Esaune aya murilnanungei louchanrokur, heitoubi aiyei ngakkhungra kuirkolloubini machupkur; heirouri yani chapkur. 5Heitoubi Esaune mangalthutbi aiyei mitni thinarouri, napuiya raple yaiyei chanao rapya mulhakkur; heirouri ani loukngai, “Nangkou kalhonbi kleirap heiri huhuwo?” Heirouri Jacobne, “Yarap heiri neishok keinungei Dunpune kringpibi phayerkur keiyei chanao rapme,” toubine louyunpikur. 6Heirouri aiyei shok napuiya rapne yaiyei chanao raple kalhonni aiyei maibongra knakni hungchangbi yani khrumkur. 7Heithangrou Leahnekhi aiyei chanao raple kalhonni maibongra hungkarnakbi yaitamni aiyei maibongra khrumkur; heirou hilluirouri Josephle Rachelnikhi hungkarnakbi, yaitamni aiyei maibongra hungkhrumkur. 8Heirouri Esaune loukyun, “Nangni keinungei thral knaini murilyerkur awaya kouweiyo?” Heirou Jacobne loumallang, “Awari keiyei teinaowei maibong'rouwei kringpi'kheiya phananungei toukurame.” 9Heiya Esaune loushun, “Keinungeiri kroni leileime, keiyei teinaowa; heineri putcheirap heiri neinungei heisi yukkhoulaklo.” 10Heirou Jacobne kyun, “Nimakme, neishok keiyei shuncha'kniri, keiya kringpibi keihutrei malan putrap awaya bei loulhakpilaklo. Keine neiyei mairungya churungknani muphakurro touri Dunpuei mairungya muphakurnaksime; heirou heinakbil kringpikheile kalhonni keiya loulhakpikurme toubi muroume. 11Keine neinungei malannungei heilhakkur hutthulput rapya loulhakpinanungei buchaleime; ngamri Dunpune keiyari lhangaiyei phor pipinei ngamrou keiyeikhi lalthum kroni leiyurame.” Heisitoubi ani buchanarouri hutthulput rapya Esaune louloulhakkur.

12Heirouri Esau'ne kyun, “Kane kaiyei lamtla waiyoubi shaallakase, heirou keine neiyei maibongra loulamriyeise.” 13Heirou Jacob'ne anungei loushun, “Keitei nangni kmu heiriya, naoshun-naopar'rap heiri khyangni lamtla manimakhui, heirou yaorul, halrul rapbei hangrakhi nu'kmong shun thralkhi yaoleihui; heineri thimi rapne yaya nunghangfchip karyimmakni hullanungri yaorulrap namma heiri hiwurchiroume. 14Keiyei bucha'kniri, keitei nangni neiyei shok keiyei maibongra loulamrilaka, heiyanungri keine keiyei yaorul-halrul rapya hulbini, heirou keiyei chanao-shunpar rapbei lamtlaya karngeithotho tapni keiteiyei leina ram Seir'ra wa'tlungbongyen heiruiheiyeise.”

15Heirouri Esau'ne loushun, “Heiyanungri, asinung keine keiyei thimirap thayari nangkou kalhonnungei lakkhouweise.” Heiya Jacob'ne loukyun, “Keiyari nangni kringpiyanungri, nangkou shaalmalnamakhi kyame. Heineri yaya lakkhoupimaklo.” 16Heisi tounarouri Esau'ne heininungri shaallurbi Seir'ranungei kallengkur. 17Heitoubi Jacob'ne Succoth'ra wawurbini, heirou ani cheem khat sabaangkur; heitoubi aiyei halrul rapbei leinanungei halshangkhi sabaangkur, heingamei bi heiyei min Succoth toubine thulkur.

Jacob'ne Shechem'ra Yuldabi Paalkur

18Heirou Jacobne Padan-aramrei(awari Mesopotamia'yei Khalu-kulrel lhangra klei) hoyoubi koukhi shuikngam yaomakni Shalem'ra wa'tlungkur, heitoubi Canaan ramrei klei Shechem khukarthil rilla maishuk lhangra khuiluphiyei cheem sabaangbini leikur. 19Heirou ani khuiluphiyei cheem sabaangna ram heiri, Shechemyei pa Hamor'yei chanao rapbei hutrei lapa macha pibini loloukur ram khat. 20Heitoubi bi heitamrou ani khrahpal khat sabaangbini, bi heiyei min “El-Elohe-Israel”#33.20: Dunpu, Israellei Dunpu. toubine thulkur.

Currently Selected:

KANTHOUNA 33: MARIBSI

Highlight

Copy