KANTHOUNA 32

Jacob'ne Esau'ya Chikur

1Heirouri Jacob'ne heisi shaalwurbi chanarou, heirou Dunpuei Thangring rapne lamrakra aya rorilkur. 2Heirou Jacobne yaya munarouri ani kyun, “Awari Dunpuei raallui rapleime.” Heingammei ani bi heiya min Mahanaim touri Raallui napung'khni toubine thulpikur.

3Heirouri Edomyei ram Seir'ra klei aiyei 'tei Esau'nung lamkrini pao loushunyernungei toubi Jacobne thimi tha loumalhetkur. 4Heirouri ani yanungei chay pibi shun, “Nane keiyei 'tei Esau'nungei asitoubi pao shunpilaka: Neiyei shok Jacobne asitoubi shunthungleime. ‘Keine Labanyei cheemra nu trunbini asilumpha leileihui. 5Heirou keiyei halpa rapkhi, gadha'rap heirou yaorul rapkhi, heirou shok-napuiya rapkhi heirou shok napawa rapkhi chungni leilei. Heirou keine thimi malhetbi keiyei tei neileinara paokhi shunyerla; heineri keiyari beicha kringpinanungei toubi buchanileime!’ ”

6Heirouri pao-ur thimi rapne yenkallengbini Jacobnung hungshunkur, “Kane neiyei tei Esau'nungei pao watamwurla, heirou anikhi neiya murilloume toubine aiyei thimi napung macha-phali'le kalhonni neiyei leinaranung waleime.” 7Heisi tounei ngamrou Jacobri beimakni chikur, heirou aiyei lhawai lahwurbi leichimchangmakura, heitounei ani aiyei thimi rapya yerchekwurbi, rulkhni thukni, heirou yao rulrap, heirou halrul rapkhi heirou ut rapkhi rulkhni thukni khaithutbini khoukur. 8Heitoubi ani kyun, “Kounakpi Esaune rul khatdei doura raal dabi hatlanungkhi, rul khatri tlatni trukwurbi hatthungphamakni kartleirouwa.”

9Heirouri Jacobne shunchakur, “Keiyei pawa Isaac'yei Dunpu, Umpune keinung pikurri, ‘Nangni neiyei ramra, heirou neiyei teinao rapbei hangra kallengeinung Keine neiya lhangaini tangbaang-choubaangyerrou.’ 10Neishok keinungei mutpikur Neiyei malungshi-kringpikhei heirou Neiyei malungamkna heiya phanei mtikkhi keinungei mak; heiya keine keiyei shungkrokya#32.10: cheishu. shuchabini Jordan kungya ralthutkur; heirou asinungri keiyei thimi rapri rulkhni thukkura. 11Neishok keine Neinungei shunchakurri, keiyei 'tei Esauwei hutrouwei keiya bei kalpilaklo; kouweiyo toulanungri, ani wabini keiyakhi heirou keiyei nu-cha rapyakhi namma hatdurleiko toubi keiri aya chiwurame. 12Heiya Nangni shunpikhou, ‘Keine neiyari lhangaini toupirou, heitoubi neiyei yu-cha rapya samadrurei shitnruinakni chungyerbi, sherchichangmakni thimi chungyerpiroume.’ ”

13Heisitoubi ani shunchabi, heiniyei masanungri bi heitamrou yaarekkur; heirouri aiyei klei putchei raprouwei louthutbini aiyei teinao Esau'nung malannungei hutthul put rapkhi marshikkur. 14Hutthul putrap heiri: Tlangpui macha'khnile, tlangpa somni, heirou yaopui macha'khnile yaopa somni khatle; 15cha'krui ut puirap heirou heiyei shun rapkhi kyaoni somthum khatle, halpui somli heirou halpa chiptam khatkhi, heirou gadha pui somnile, heirou heiyei shun chiptam khatkhi kyao. 16Heitoubi heirapya ani aiyei shok rapnungei silnawurbi, ai'aiyei rul knaini hulyerkur, heitoubi ani yanungei shunmtukur, “Halrul yaorul rapya keimaibongra louhulheilaka, heitoubi rul khatle rul khatdei tlakra tlatni kaalrilyerbi hullaka.” 17Heitoubi maibong lamkriyei loucha shokpaya chay pibi ani shun, “Keiyei teinao Esaune neiya loumurilbi neinungei, ‘Nangya huiyei thimiyo? Heitoubi kouranungeiyo? Heirou neiyei maibongrei louhulkhei halrul-yaorulrap heiri huweiyo?’ toubine loungailanungri; 18heirou nangni, ‘Yarap heiri neiyei shok Jacobeime, heirapri keiyei pu Esaunung malannungei hutthul rapme, heirou thilak, akhi kaihilla waleihuime,’ toubine louyunlaka.” 19Heitoubi ani khintam'tlung, kyumtam'tlung, heirou yaorul-halrulrap nammaya heihulkhei shokrap nammanungkhi chay pibini shunmtukur: “Na nammanikhi Esauya rorillanungri keiyei shunmtukur heinaksini khatnakdikni yunlaka. 20Heiyakhi duinara nani, ‘Neiyei shok Jacobri kaihilla waleihuime,’ toubine yunpilaka.” Heirou aiyei ukningrari, “Keiyei maibongrei loumalhetkur hutthul putrap heini aya pilyerlanungri, heihillouri keine aya churungknani murillouwa, heisi toulanungri ani koukhi khalchanamakni keiya loulhakpirou,” toubine ningchakur. 21Heisitoubi malannungei hutthul putrap heiri aiyei maibongra louruiheikur; heirou ai'mshari thimichung rapbei hangra yarekthungkur.

22Heirou ani heiniyei masanung ipnarei kanthoubi, heirou aiyei nu khintamle, aiyei shok-napuiya khintamkhi, heirou aiyei chanapawa chiple khatya ruilouthubi Jabbok'rei raalpalya heiralthutkur. 23Heirou ani yaya ruilouthubini, kung ralthutyerkur; heisitoubi aiyei klei putchei-lalthumrap nammakhi loumalhetkur. 24Heiya Jacobri hilla aitamtom leithungkur, heirouri bi heitamrou napawa khatni wabini aya masantan nung waarbongyen karshulpikur. 25Heirouri napawa heini Jacobya manichangmakrou muwurbi, hillouri ani Jacobei pheikhnang balra aihut thunlhakbini katkhreikur heirouri Jacobei muishum'thru loukartleikur. 26Heirouri napawa heini kyun, “Keiri shaallouwa, ngamri nung katwaarura.” Heirouri Jacob'ne loukyun, “Keiya phor pikhoubongyenri keine neiyari shaalyermakrou.” 27Heirou ani Jacob'nung, “Neiminri kousi ung?” toubine loukngai. Heirouri ani, “Jacob toubi ungme,” toubi loumallang. 28Heirouri ani shun, “Neiminri Jacob toubi ungmarou, heiya Israel touri Dunpukou karshul thimi toubine ungrouwa, ngamri Dunpule tlaipang thimiyei tlakra karshulnarou nangni maniwurla.” 29Heirouri Jacobne anungei loukngai, “Keine buchalei, neiminri koutoubi ungo? Keinungei bei yunpilaklo.” Heiya ani loumallang, “Kouya tounanungei nangni keiminya loukngai?” Heisi yunkhoubi ani bi heitamrou Jacobya phor piwurkhou. 30Heingammei Jacobne bi heiya Peniel touri Dunpuei mairung toubine min thulkur; ngamri ani kyun, “Keine Dunpuei mairungya churungknani muwurlame, heiya hoiyanungkhi keiyari ringyerleihui.” 31Heirouri Jacob'ne phei yekyek chunni yenshaalbi Penuel yenralyei kaalnungri nunghang tlaikal hoiyura. 32Heisitoubi Israelyei yu-cha rapne angtu rampha muishum'thru hungsuina yra'an kmai yamak, ngamri Thangringni Jacobya karshulpiyei kaalnung aiyei pheikhnangra umnongurpi.

Currently Selected:

KANTHOUNA 32: MARIBSI

Highlight

Copy