KANTHOUNA 31

Jacob'ne Munni Canaan'ranung Shaalkur

1Heirouri Jacob'ne Laban'yei chanao rapne, “Jacob'ne kai pawaei dunkhou lalthum rapya namma louheibi, heirou kai pawaei lalthum rapne aiyei lal dunnei thang hoinakurame,” toubi yunkrilya mayeklhakurla. 2Heirouri Jacob'nekhi thinarou Laban'ne ayari tirreinakni lhangaini toupimakura touri ani mulhakurla. 3Heirouri Umpune Jacob'nung shunkur, “Nangri neiya pukna ram, neiyei teinao rapbei leinara kallenglaka, heirou Keine neiya kalhonpirou.” 4Heitounei Jacob'ne thimi malhetbini louyaora aiyei nurap Rachel'le Leah yakhuntaya wa'ungyerkur. 5Heitoubi ani yanungei shun, “Keine nai pawayei mairungya thinarouri, ani keiyari haalleinaksi lhangaini toupimakura touri keine muwurla; heisiyanungkhi kai pawaei Dunpune keiyari kalhonpilei. 6Heirou nanikhi kmu touri keine nai'pawaya keiyei mantrang kleiyei'mkhei urthutbini watlhou toukhoupila. 7Heiya nai pawaneri keiya mandalpiwurla, heirou keiyei lhouchurnei klah-mankhi chipbui duini marlheiwurla; heiya ani keiya mangnanungei toukurri Dunpune yakhoupimak.” 8Heirou ani, asitoubi, “Yao bungrang rapri neiyei klahman hoiyerrou,” toubi yunlanungri, yaoshun pukyeinungri namma bungrang khoini pukthutkur, heitoubi ani, “Trik'trak mankhan puklanungri neiyei klahman hoiyerrou,” toubi yunlanungri, yaoshun pukyeinungri nammani trik'trak mankhan khoini pukkur. 9Heisitoubi Dunpune nai pawayei yaorul rapya louthutdurbini, heirapya keinungei pilhakkur. 10Heirouri yaorul rapne puikhingbi cha urlanung, keimitni thrilthiyei kaalnung keiyei rmong khat loukman, heirouri thilak, yaopa phutkap trik'trak, bungrangrap heirou khmongdup rapri pui khingyoukur. 11Heirouri Dunpuei Thangringni keinungei rmongra, ‘Jacob,’ toubi ungbini loushunpinarou, keinekhi, “Kouweiyo, kouya shunkniyo?” toubi keine loumallangkur. 12Heirou ani shun, “Asinungri neiyei mitni mangalthilaka, touri puikhingbi klei yaoparap heiri namma trik'trak, bungrang, heirou khmongthilme, ngamri Laban'ne neinungei toupikur heiri Keine muwurla. 13Keiri nangni Bethel'ra Lilshutlai bunbine shirek teiphangbi, heirou tlou kantombini mardingrilkur Dunpume; heineri asinung nangni kanthoubi ram arouwei shaalthutlak, heitoubi neiya pukna ramra kallenglakalo.” 14Heirouri Rachel'le Leah yakhuntani loumallangbi, anungei loushun, “Kai pawayei cheemra kaiyei siruk nimanung kaiyei phabom'thukya kou leileihuiyo? 15Kayari ani miram-mithrillei thimirap hoiyerkur nimakka? Ngamri ani kaya yorchawurbini, heitoubi kanungei pikur sina-lapakhi namyerwa ani louheikur. 16Ngamri Dunpune kai pawarouwei louthutloukur lalthum namma heiri asinungri kaiyei heirou kaichawa rapbei lalthum hoirouwa; heiyanungri asinung Dunpune neinungei koukouya toulaklo toubi shunpikur heirapya nangni loutoulaklo.”

17Heirouri Jacobne kanthoubi aiyei chanao rapya heirou aiyei nu rapya ut rapbei doura tungbaangyerkur. 18Heisitoubi ani Padan-aram'ra leiyei kaallei puklhakkur aiyei ui-waarap, halrul-yaorulrap heirou aiyei phawurkhou lalthum nammakhi marshikbini urlouheibi aiyei pa Isaacyei ram Canaan'ranungei shaalthutkur. 19Heirou Laban'ne aiyei yao'khmul ngounungei chakur hillouri, Rachelni aiyei pawaei cheem thrailha rapya namma muloubini loushaalkur. 20Heisitoubi Jacob'ne Syria'yei Laban'nung shunkhoumakni muni loushaalkur. 21Heisitoubi ani aiyei putchei-lalthum namma kleiyei'mkhei urlouheibi loutrukkur. Heirou ani shaallurbi, Euphrate Kung khatlhang mnakra heirallurbi, heitoubi ani mai khreibini Gilead lhungdou lhangranungei chakur.

22Heirouri khyumni tlung tlainirouri Jacob trukkurame toubi Laban'nungei pao shunpiwurla. 23Heirouri ani aiyei teinao rapya ruilouheibi, tlaini enini Jacobei hilyunbi chanthungkur; heitoubi yani Gilead lhungdoura aya heichanphakur. 24Heiya masanungri Dunpune Syriaei Labanya aiyei rmongra loushunpikur, “Mukheini toulaklo, touri nangni Jacobnung lhangaikhi lhangaimakhi yunmakniyalo.”

25Heisitoubi Laban'ne Jacobya heichanphayei kaalnung, Jacobri lhungdoura aiyei khuiluphiyei cheem khat sabangbini louleiyura; heirou Laban'nekhi aiyei teinao raple kalhonni Gilead lhungdou ramra khuiluphiyei cheem sabini yarekkur. 26Heirou Laban'ne Jacobya shun, “Neitoukur awaya kouwo? Keiyakhi muthungyermakni, keiyei chanao rapya putcheile raalbom'rouwei shonle cheile toubi manloukur heinakni muni urlouheibi shaalkurya koutouneiyo? 27Koungammei nangni keiya mandalbini, keinungei koukhatkhi shunkhoumakni, muni trukkurya koutouneiyo? Heisi nimanungri keine neiya phungle daarle marshikbini, heirou laa sale kalhonni houklumni thulthutpikurkhi kya heiwaya! 28Heirou asinungri keiyari nangni keiyei chanapawa rapya heirou keiyei chanapuiya rapyakhi machubpibi karyemthungkhi touyermakura. Neiyei toukur awari beimakni yuntlungmakei lhou khat hoiyurame. 29Heirou neiya klah dayerreise toulanungkhi keihutra klei, heiya masanung nai pawayei Dunpune keinungei, ‘Lhangai tlou nimanung lhangaimak tlou hoiyanungkhi nangni Jacobnung koukhatkhi yunnungei yamakroume touri nangni ningmulak,’ toubine loushunkur. 30Heirou asinungri, nangni nai pawayei ramra shaalniatchaknei ngamrou hoyoubi shaalkura, heisiya hoiyanungkhi nangni koutounei keiyei cheem thrailha rapya mulouheibi urloukuro?” 31Heirou Jacobne loumallangbi Laban'nung loukyun, “Neiyei chawi rapya keiyei hutrouwei lunglouheirou marbuni ningchawurbi keine heisi toukurame. 32Neiyei cheem thrailha rapya huhuwei hutra louklei yaowanungri, aya khiyei tanti pirou; heirou keiyei teinao rapbei maibongra neiyei putme toubi keihutra louklei karthanganungri, nangni heisi louheilak.” Jacobne heiyei tlouya yunyei kaalnungri, Rachelni thrailha rapya muloukheime touri ani mumakhui.

33Heirouri Laban'ne Jacobei khuiluphi cheemrale, Leahyei cheemrale, heirou yai shok-napuiya napung'khniyei cheemrakhi wachangbini khrokphakur, heiya thrai lharap heiri ani raphamumakura. Heirouri ani Leahyei cheem'rouwei wathukkurbi, heihillouri Rachelyei khuiluphi cheemrakhi wachangbini raphakur. 34Asinungri Rachelni thrailha rapya urthutloubi, heirou Ut rapbei namkal dourei omna daakra fletphumkur, heitoubi heirapbei doura ani omphopkur. Heirou Laban'ne cheem kantang raphabinikhi, thrailha rapya ani raphamumakura. 35Heirou Rachelni aiyei pawanung loushun, “Pawani neichawi keiya neimaibongra loukanthoumaklei toubi ningchabini malungkhamaklo, ngamri keiri napuiyaei youkna par chanei kheen hoiyurabini kanthou yamakurame.” Heisitoubi ani raphakur, heiya ani aiyei cheem'thrai lharap heiri rapha'mumakura. 36Heirouri Jacobne malungkhawurbi, Laban'le tlou mallangrilkur; heirou Jacobne Laban'nung shun, “Nangni heinak malungkhani keihilla heichanthungkur heiri, keinea kou klal touwurkhoulawo? Nimanung keine kounaksi borh lhouya touwurkhouwo? 37Ngamri keiyei putcheirap nammaei hangra waiknaini phelphanarou, neiyei putcheime toubi kou phelmuwurlawo? Neiyeime toubi yaowanungri, kei teinao rapbei maibongra, heirou neiyei teinao rapbei maibongrakhi heiurthutlaka, heirou yani kakhuntayei tlakra chim-chimmakya pichar toupilaksu. 38Keine neiyei cheemra yenleiheikur heiri awane kum somni tlungura; heiyei rillou neiyei yaopui rapne, heirou tlangpui rapne cha pukyeinung rulkur toukhi makkhui; heirou neiyei yaorul hangrei keine yaoshun khatcha hatmailoukur toukhi makkhui. 39Heirou ramhangra yaani mairom sraltang louleibikhi yenkhulheibini neinung mutpikur toukhi leikhoumak; ram-yaani mailoukur nimanung masanung mine muloukur leiyanungkhi heirapya keiyei siruk hoicha'kna. 40Heisitoubi keine klah-mrim kounakya yendouheikur, nunghangnangni nungshani phoukur, heirou masanungni thurni daakkurbi kreikhi kounak yendouheikur; heirou beimakni ipnibikhi keimit chipbini tekchakhi iplhakchangmakni mrim'knangkhi douwurkhou. 41Heisitoubi kum somnibil keine neicheemra watlhou yentouheikur; neiyei chanapuiya napung'khni heinung'tlim keine kum chiple phalibil nu trunwurkhou, heirou kum'thruk'khi keine neiyei halrul, yaorul rapya silpikhou; heiya nangniri keiyei klahman phabom thuknarei sirukchip kanthritni phayerkur. 42Heiya keiyei pawa Abrahamei Dunpu heirou Isaacne chi-rikraini khrumkhou Dunpune keiya kalhonpimanungri, nangni keiyari koukhi marshikpimakni hutdingni shaalyertlengrou. Heiya Dunpune keiyei klah-mrimkurya mupibi heirou keiyei lhou churnei klah manya Ane marshikpikur, heitounei ngamrou angtu masanung neiya lousamkur heirime.”

43Heirou Laban'ne loumallangbi Jacobnung shun, “Yarap heiri keiyei chanapuiyathil, heirou chanao rapkhi keiyei chanaothil, heirou yaorulle halrulrap heikhi keiyeithil; heiyakhi duinara neiyei kmu putcheirap namma heikhi keiyeithil; heiya angtutou tlaini arouri keiyei chanapuiya rapnungei heirou yaiyei pukkur chanao rapnungei keine kouya toupichangeirou? 44Ngam heineri asinungri nangle kakhuntayei tlakra tlou kantomril khat khouwase; heirou tlou kantomril heini kasiyei tlakra tlou mayungpi hoilakasu.” 45Heirouri Jacobne thlung khat khulloubini, heitoubi ani shutlai khatnaksi bunkhoukur. 46Heirou Jacobne aiyei teinao rapya ungloubini kyun, “Thlung khulmallonglaka.” Heisitoubi yani thlung khulmallongbini bi khatrou lokpani marpeikur, heitoubi khulmanpungkur thlungpung pongra yani omkarhungbini chamaikur. 47Heitoubi bi heiya Laban'ne Jegar-Sahadutha#31.47: Aramaic-Shakhi hoikna thlungpung. toubine min thulkur, heiya Jacobneri bi heiya Gilead toubine min thulkur. 48Heirouri Laban'ne kyun, “Thlungpung awari angtu tlainirou nangle kasiyei tlakra tlou mayungpina bom hoiyura.” Ngam heine bi heiyei minri ‘Gilead’ toubine thulwurla; 49heirou thlung shutlai heiri Mizpah touri Raaldaang toubine min thulpikur; ngamri Laban'ne kyun, “Umpune nangle kasiyei tlakra Aiyei mit'thril khoupibi, kani tlatrilwurbikhi Ane kaya ngaaksilpirou. 50Kounakpi nangni keiyei chanapuiya rapya thuithini mareknapiyei kheenrou, nimanung keiyei chanapuiya rapyakhi duinara nangni nu deiya loulhakrou dawanungkhi, keinekhi heirou thimidei hunikhi mumakhi kya, heiya Pu Dunpune kasiyei tlakra tloumayung khoini kleime touri nangni ningmurou da.”

51Heirou Laban'ne Jacobnung shun, “Keine angtu kasiyei tlakra marpeibangkur thlungpung heirou bunmayungkur thlung shutlai heirapya thilak: 52Thlungpung awanekhi heirou thlung shutlai anikhi kasiyei tlakra tloumayung hoiyura. Heirou keine thlungpung awaya karraalbini neilhangra tonlhakpimakrou; heitoubi nangnekhi thlungpung awaya heirou thlung shutlai awaya karraalbini keiya maangyer-deekyerna'nungei keilhangra heitonlhakmakrou da. 53Abrahamei Dunpu, Nahoryei Dunpu, heirou yai pawa rapbei Dunpune kasiyei tlakra pichar toupilaksu.” Heisitoubi Jacobne aiyei pa Isaacne chi-rikraini khrumkhou Dunpuei minra tlou kantomkur. 54Heirouri Jacobne lhungdoura Dunpu'nungei malamthut khrumna put makatkur, heitoubi aiyei teinao rapya mumtol pishainungei ungmarkumkur, heitoubi yani mumtol shaibini masantan lhungdoura yarekkur.

55Heirou thangei ningshun manma Laban'ne kanthoubi aiyei chanapawa raple aiyei chanapuiya rapya machubpibi, heitoubi yaya phor pikur; heisitoubi Laban shaalwurbi, aiyei ramra kallengkur.

Currently Selected:

KANTHOUNA 31: MARIBSI

Highlight

Copy