KANTHOUNA 26

Isaac'ne Gerar'ra Yuldabi Paalkur

1Heirou Abrahamei chaanrou lamkriyei thukkur butaam heithil nimakni, kheen aroukhi ram heirouwei karyouni butam khatkhi thukkurthu. Kheen heirouri Isaacne Philistia'yei Krung Abimelech'yei leina ram Gerar'ra wakur. 2Heirouri Umpune anungei muyerbi loushunkur, “Nangri Egyptra yumakka, Keine neinungei shunpirou youna ramra nangni heisi yuleilaka. 3Heitoubi ram heirou ramtaangbini heisi yukleilaka, ngamri Keine neiya kalhonpirou, heitoubi neiya phor pirou, neinungeikhi heirou neiyei chanao rapnungeikhi phor pirou; heitoubi Keine ram awaya neinungei namma pirouwa; heitoubi Keine neipa Abraham'nungei kantompikur tlourap nammaya tlungyerpirou. 4Heirou Keine neiyei chanao rapya nungthourei sorwanaksi mshing chungyerpirou; heitoubi ram awaya namma neiyei yu-cha rapnungei hoiyerpirou; heirou neiyei yu-cha rapbei ngamrou tlaipangpallei Lim namyerwani phor pharouwa. 5Ngamri Abraham'ne Keihouya ninglhakbi, Keiyei kyun'kyunya chanthungkhou; heirou Keiyei chaytlou heirou ayil rapya baimakni chakhoubi, heirou Keiyei pichar rapya ani ninglhakbini lhou toukhou.”

6Isaacri kheen heinungri Gerar'ra paalbi leikhou. 7Heirou ram heiyei thimi rapne aiyei nu ngamrou anungei ngaithiyeinung heirou ani loumallangbi, “A heiri keiyei charme” toubine louyunpikur. Heirou ani, ‘Ari keiyei nume’ toubi yunlanungri, ram heiyei thimi rapne ayari hatdurleiko toubi ningchanei yun'ngammakkur. Ngamri Rebecahri thiyeinungri beimakni shakrung lhangai. 8Heirouri asitoubine hungthukkura, touri ani ram heirouwei kheen tlani yenleikur hillouri, Philistiayei Krung Abimelech'ne khamput cheemkharra ramthrilbi thiyei kheenrouri, Isaacne Rebecahya kui'rkolbi klei heiya mulhakkur. 9Heirouri Abimelech'ne Isaacya ungloubi kyun, “Thilak, tanghakpani napuiya heiri neiyei nuhaklei; heiya nangniri, ‘A heiri keicharme’ toubi kyunri koutounei?” Heirou Isaacne anungei loukyun, “Aiyei ngamrou keiya hatdurleiko toubi marbubi keine heinaksi yunwurkhou.” 10Heitounei Abimelech'ne shun, “Neiyei kanungei toukur awaya kouweiyo? Kai thimi hukounak khatni neinuya pangei ippiwurlanungri, heiwinung'tlim nangni kaidoura klal dayernanungei toukur nimaka!” 11Heirouri Abimelech'ne aiyei thimi rapnung mukheini tounanungei chaytlouni shunkur, “Thimi hukounak khatni napawa heiyale aiyei nuya palkur yaowanungri, ayari hatrou.”

12Heirouri Isaacne heiyei ramra trunwai lhabini, kum heihakrou ani trunwaiyei lung chungni luklhakkur. Heisitoubi ayari Umpune phor piwurkhou. 13Heirou Isaacyei lalthum duiduini hungchangbi, heirou hillouri a heiri beimakni laldun napawa khat hunghoikur. 14Ngamri aiyei yaorul heirou halrulrap, heirou thimi shok rapkhi chungni leiwurnei ngamrou, Philistia rapne aya mubini horthikur. 15(Heingamei asinungri aiyei pa Abrahamei chaanrou, aiyei pawaei shok rapne utkhou yuiphum rapkhi namma Philistia rapne thleini kutphilwurbi haphopburchi, heirou yuisokhi namma toutipburchi.) 16Heirouri Abimelech'ne Isaac'nung shun, “Nangri kairam arouwei shaallaka, ngamri nangri kayakhi duini toumani thimi khat hoiyura.”

17Heirouri Isaac'ne bi heirouwei shaalthutkur, heitoubi ani Gerar phaikara khuiluphiyei cheem sabaangbini bi heirou paalkur. 18Heitoubi Isaacne aiyei pawa Abrahamei chaanrou utkhou yuiphumrap heiri Philistia rapne kutphilbi pingurkhou heirapya ani hanui kutthutbini utthu. Heitoubi yuiphumrap heiya aiyei pawani thulkhou min rapya hanui kallengni anikhi thulpithu. 19Heirou Isaacyei shok rapne phaikara yuiphum utnarouri, yani tuyshir kathukna yuipur khat karthangkur. 20Heirouri Gerar'yei halsil thimi rapne Isaac'yei halsil thimiya ngaallou daiphabini, “Yuiso awari kaiyeisoh!” toubi yunbini lungloukur; heitounei ngamrou yuiso heiya ani Esek#26.20: Kngaal nimanung rkalkril. toubine min thulpikur, ngamri yuiphum heiyei ngamrou yani akou ngaalkur. 21Heirou ani yuiphum laikhatkhi hanui utthu; heiroukhi hanui ngaalwurthu; heitounei yuiphum heiwiya min Sitnah#26.21: horthi'kril. toubi thulpikur. 22Heirouri bi heirouwei ani hanui chutdurthubi, yuiphum laikhatkhi touthutthu; heirou bi heiri yani ngaalnamakura; heitounei ngamrou yuiphum heiwiya ani Rehoboth#26.22: Maryana nimanung Waisalni palna bi. toubi min thulpikur; heirou ani kyun, “Asinungri Umpune kanungei bichana khat sheempiwurla; heineri kani ram arou leibini pung-shaan hoirouwa.”

23Heitoubi ani bi heirouweini Beer-shebara kakur. 24Heirouri Umpune heiniyei masanunghak anungei muyerpibi, asitoubine loushunkur, “Keiri neipawa Abrahamei Dunpume, nang chimaklo; ngamri Keine neiya kalhonpilei; heitoubi Keiyei shok Abrahamei ngamni Keine neiyari phor pirouwa, heirou neiyei yu-cha rapya mshing chungduiyerpirou.” 25Heisi tounarouri ani bi heitamrou khrahpal khat sabaangkur, heitoubi ani Umpuei minya ungbini khrumchakur; heitoubi bi heirouwei ani khuiluphiyei cheem khat sabaangkur; heirou Isaac'yei shok rapne bi heirou yuiphum khat utkur.

26Heirouri Abimelech'ne Gerar'rouweini aiyei palui Ahuzzath'le heirou aiyei raallui upawa Phicol'ya kalhonni aiyei leinaranung wakur. 27Heirouri Isaacne yanungei loushun, “Naneri keiya machinkname toubine, nairouwei keiya hulthutdurbi, angturi nani kouya tounungei keileinara wachangkurawo?” 28Heirouri yani loukyun, “Umpune neiya kalhonpileime touri kani tanghakpani muwurla; heirou kaiyei yunkniri, ‘Kai tlakra tlou kantomrilbi, nangle kale ya'kril khat khouwase.’ 29Heineri kani neiya koukhi klah dayerkhoumak heinaksini, heirou neiya maangnanungei toumakni, neiyei lhangaina'nungeitom silpibi, neiya shaalyerkur heinaksini, nangnikhi kanungei koukhi lhangaimak touyernimaklei; asinungri nangri Umpune phor piwurkhou thimi khat hoiyura.” 30Heirouri ani yanungei chak-an marshikthutpikur, heitoubi yani chamaikur. 31Heirouri yani ningshun manma kanthoubi, heitoubi ya khatle-khat tlou kantomrilkur; heihillou Isaacne yaya malhetdurbi, yani airouwei kyingni shaalkur. 32Heirou tlaini heihakrou Isaacyei shok rapne yuiphum utnarou, anungei hungbini, “Kane yui utphawurlame” toubine pao hungtamkur. 33#Kan 21.31. Heisi toubine bi heiya ani Sheba toubine min thulpikur. Heitounei ngammei bi heiyei khukarthil heiwaya “Beer-sheba” toubine angtu ramphani munaleihui.

34Heirou Esaune Hittia napawa Be-eri'yei chawi Judith'le, heirou Hittia napawa Elon'yei chawi Bashemath yarukhniya nu khoini louyei kaalnung ai'mshaei kum somli tlungura. 35Heirou yarukhni'rekni Isaac'le, heirou Rebecah yarukhniyei chaanrou lhawai lahyerwurkhou.

Currently Selected:

KANTHOUNA 26: MARIBSI

Highlight

Copy