KANTHOUNA 23

Sarah Hikur Heirou Abraham'ne Khi Ruinanungei Ram Klo

1Sarah'ne kum machale somnile eni paalkhoubi hikur. Sarahyei ringkhounei kum mshingri thakrei kyunsibil ringkhou. 2Sarah'ne Canaan ramrei klei Hebronyei Kiriath-Arba bira hikur; ram heitamrou Abraham'ne wabi Sarah hikurya kanrilbi chapkur. 3Heitoubi Abraham'ne bi heirouwei aiyei nuwiyei khilhungya lakurkhoubi, heirou ani Hittia rapnung wabini buchakur; 4“Keiri naihangra ramtaangbi klei miram-mithrillei thimi khatme; keine keiyei nuwiyei khilhungya phumnanungei keinungei ram bikhat yorpilaklo.” 5Heirouri Hittia rapne Abraham'nung loushun, 6“Upawa, kai kyunya louningpilak; nangri kaihangra Toumani Krung khatme. Kai utdurkhou lhan rapbei hangrei neiyei pamya khat loubini nei nuwiyei khilhungya phumlaklo. Hukhatnikhi kaihangra ai'aiyei lhanya pinimakri yaomakrou, heirou hukhatnikhi neiyei khiya ruiyermakhi yaomakrou.” 7Heirouri Abraham'ne kanthoubi, heitoubi ram heiyei thimi Hittia rapbei maibongra lu shikhuplhakbi khrumkur. 8Heitoubi ani yanungei kyun, “Nane keiya kringpibi keiyei hikur keinuyei khilhungya nairamra phumyerroume toulanungri, keiyei kyunya louningpilak, heitoubi nani Zoharyei chanapawa Ephronya keinung'tlim loushunpilaka; 9touri aiyei ramme toubi klei Machpelara thlungkhur khat klei heiya keinungei pilakasu. Bi heiri aiyei ramruiyei ri'karchunnara klei. Bi heiwari anikhi nai maibongra heiyei man yarillanungri keinungei yorpilaksu, heirou keinekhi bi heiya khi ruina ram khoini lobini khouweise.” 10Kheen heirouri Ephronkhi Hittia rapbei hangra ombini heiklei; heirou Ephron'nekhi khukarthil heiyei mangkhalra wakartilkur Hittia'rap nammaei maibongra Abraham'nung asitoubi loukyun, 11“Nimakme, keiyei upawa, keiyei kyunya louningpilaklo; keiyei ram heiri keine neinungei pikurrame; phailou heiyei rillei klei thlungkhur heikhi pichokkurame; keiyei thimi rapbei maibongra ram heiya keine neinungei pikurrame; neiyei khilhungya bi heitamrou phumlakalo.” 12Heirouri Abraham'ne ram heiyei yama kullei maibongra lu shikhuplhakbi rikrai khrumkna mutkur. 13Heirou Abraham'ne ram heirouwei thimi rapkhi mayekyerbi Ephronnung shun, “Heiya nangni ram heiya keinungei pilanungri, keiyei kyunya louningpilak, ram heiyei manri kei piyeise, heirou nangnikhi heiya loulhakpilak; heiyanungri keine bi heitamrou keinuyei khilhungya phummeise.” 14Heirouri Ephron'ne Abraham'nung loukyun; 15“Keiyei upawa, keiyei kyunya louningpilak; ram heiyei manri tuypik macha-phali tomngei; heiya kasini yarillanungri heiyari keine loupimakurkhi kya, kou heitounarou? Neiyei nuwiyei khilhungyatom ruilakalo!” 16Heirou Abraham'le Ephron yarukhnine yunkril heiwaya yakantlangrilbi, kheen heikallei lalhol thimi rapbei yrengcharilkhou hilthungni khrit holbini tuypik shekel machaphali heiri Hittia rapbei maibongra Ephronyei yunkur hilthungni Abraham'ne anungei holpikur. 17Heisi toubine Mamre'yei kulkung lhangrei klei Ephron'yei phaikar Machpela heiya, heirou heiyei rilla klei thlungkhur heithilkhi nimakni, heiyei rillei pukbi klei heengtrungrap nammakhi yakantlangrilbi; 18angturouei waiyoubi namyerwa heiri Abrahamei hoiyurame toubine, khukarthil heiyei mangkhalla wakartilkur Heth'yei chanaorap heirou bi heirou klei yama-krungrap nammaei maibongra Ephron'ne malanthutbi anungei silnakur. 19Heitoubi heihillouri Abraham'ne aiyei nu Sarah'ya Mamre touri Hebron'le mai kallukrilbi klei Machpelayei phailoura klei thlungpur lhanra phumwurkhou. 20Heisitoubi phailou heile heirou bi heitamrou klei thlungpur lhan heiri Hethyei chanao rapne Abraham'ya phumnanungei lhanbi khoini makatdurkhou.

Currently Selected:

KANTHOUNA 23: MARIBSI

Highlight

Copy