KANTHOUNA 19

Sodom'le Gomorrah Maangyerkur

1Heirouri Thangring khintamni rawainung Sodomra wa'tlungeinung, Lot'ne Sodomei palshungra ombini louklei. Heirouri Lot'ne yakhuntaya loumukurle tallengni loukanthoubi louchanrokur, heitoubi yai maibongra thleira mai sikhuplhakbi loukhrumkur. 2Heitoubi ani kyun, “Keiyei teinaorap, narukhniya keiyei bucha'kniri, kringpibi angtu masari naishok keiyei cheemra polhakbini, naiyei hut-hokhi choumathaibi yarekhoulaklo; heitoubi ninga ningshun manmani kanthoubi naiyei lamtla chasundathulaklo.” Heiya yani loumallangkur, “Nimakme, kakhuntari angtu masa khullam ruira chakrouwa.” 3Heiya ani yanungei kalthi buchanarouri, yarukhnine yapiwurbi aicheemra wachangbini yarekwurkhou; heitoubi ani phri sikmak mumtol lhangaidui ngoumarshikbini chak-an marshikthutpikur, heirou yani chamaikur. 4Heiya yani masa ipbongnungri, khukarthil heiyei thimi rapne, touri Sodomei napawarap nammani, heirou douwakhi, tarakhi lhuimakni ya nammani pothutbi cheem heiya kuikoolbini marubphopkur; 5heitoubi yani Lotya ungbi heikyun, “Angtu masa neicheemra chaknungei wachangkur thimi rapri kouranga? Yaya heiurthutlak, heitoubi yarap heiri kani ippirouwa.” 6Heirouri Lot'ne yaya murilnanungei shumtrumra wathukkur, heitoubi aihilla cheemkhar thungthungkur; 7heitoubi ani wa'kyun, “Keiyei teinaorap, keine nanungei bucha'kniri, heinaksi chorit naimak lhouri toupimaklo. 8Thilak, keicha nangaka shal dunmakpi napung'khni leilei, yakhu teinaoya keine naiyei maibongra ungthutpieise; heirou naiyei toukniya yanungei toulaka, heiya keiyei mal napung'khniyari heisihakri toupimaklo, ngamri yakhuri keicheemra mal khoini wachangkurame.” 9Heiya yani kyun, “Lam louchaiya, kai maibongra loumayungmak!” Heirou yani asitoubikhi kyun, “Napawa heiri ramtaang thimi khat khoini wachangbi, heirou ani kaidoura pichar touthuleino! Arouri kani neiyari yayakhi duini thuithini klah pirouwa.” Heisi yunbi yani Lotya kalthi ilmathumwurbi, cheemkhar nambainung wachangkur. 10Heiya napawa napung'khnine yaihut malamthutbi Lotya cheemwaira taanglhakkur, heitoubi cheemkhar louthungkur. 11Heitoubi yani cheemkhar purei heimayung thimirap, upakhi heirou douwakhi lhuimakni nammaya mit deoyerkur. Heitounei ngamrou yani cheemkhar rmalphanarou ya namma lahwurchiya.

12Heirou napawa rapne Lotnung shun, “Neiyei thimi deiri huhu leileihui? Neiyei kmakrap, neicha napawarap, neiyei cha nyulrap, nimanung khukarthillei rilla neiyei thimi dei huhu leiyanungri, yaya khrangni bi arouwei tlatnara ruithutloulaka. 13Ngamri kani bi awaya maangyerrouwa; koungameiyo toulanungri, khukarthil heiyei thimi rapbei doura makatrou tlourap heiri Umpuei khnara tangni loumayekurla; heingammei bi awaya maangyernanungei Umpune kakhuntaya yenmalhetkura.” 14Heisi tounarouri Lot'ne kanthoubi aiyei kmak hoirou kyou kartlanga napung'khniya shun, “Kanthouwa, bi arouwei wathukkurlaka; ngamri Umpune khukarthil awaya maangyerrou marshikkurame.” Heiya aiyei kmak rapneri yaya heengbaokna manthabini aiyei tlouya loupimakkur.

15Heirou ningshun nungwarkur heirouri, Thangring napung'khni heini Lotya khnotni shun, “Kanthouwalo, neiyei nu, heirou neiyei cha nangaka napung'khniya ruithutloulaka. Nimanungri nakhi khukarthil awaya maangyernara maangchokrouwa.” 16Heiya ani ukningra khalchanabi leikur; heingammei napawa napung khni heini Lotle aiyei nu heirou aiyei cha'nangaka napung'khniyakhi hutrumra churloubi taangthutkur, ngamri Umpune Lotya heisibil kringpibi khukarthillei pura yaya ruithutloubi khoupikur. 17Heirouri Thangring rapne yaya pura ruithutloukur hillouri, yani “Nai lhawai ringnanungei truklaka; hillhangra kallekthikhoumak, nimanung nani phaitlai arou koubi khatroukhi karngeikhoumakni, lhungdoura trukbaanglaka, nimanungri nakhi hirouwa.” 18Heirouri Lot'ne yanungei loushun, “Nimakme, keiyei teinaorap, heisi tourimakhuilo; 19thilak, naiyei shok keiri nai mit'thrilnara kringpikhei phawurla; heitoubi keiyari nani malungshipibi keiyei rongchankhi kalpiwurla; heiya keiri lhungdoura trukbaangbi yulchangmakrou, ngamri lhangaimak thimi rapne keiya chanphalanungri keikhi hirou. 20Thilak, naknara truklhak kya khukarthil mandicha khat leilei. Keiri bi heitamrou trukyulrouwa, khukarthil heichari mandiyanungkhi, keiri heitamrou trukyullanungri himakrou.” 21Heirou Thangringni anung shun, “Thilak, Keine heikhi neinungei yapiwurla, touri neiyei mintlangkur khukarthil heikhi Keine maangyerpimarou. 22Khrangtoubi, bi heirou trukyullaka, ngamri nangni bi heitamrou wa'tlungbongyen Keiri koukhatkhi tou yamakura.” Heisi tounei ngamrou khukarthil heiri Zoar toubi min thulkur. 23Heirou Lot'ne Zoar khukarthilla wa'tlungei kaalnungri ningshun kinni kathukkura.

24 # Lk 17.29. Heirouri Umpune Sodom'le Gomorrahyei doura nungthourei meichokkur sinnuyei thlungkunya nungheinakni Umpu Airouwei rosundayerkur. 25Heisitoubi khukarthil khintam heile kalhonni, heiyei phaikar rapyale, khukarthil heiyei rilla paalbi klei thimirap nammayakhi, heirou bi heirou pukbi klei ramna, heenglim-rolim nammakhi kaangtumyerkur. 26#Lk 17.32. Heiya Lotyei nuwini aiyei hilla chanthungbi chanarouri, ani hil'hhangra heikallekbi thrilthinarou mittiyei shutlai holkur. 27Heirouri thangei ningshun manma Abraham'ne ipnarei kanthoubi, heitoubi ani haallei mayungkhouna Umpuei bira wamayungthu. 28#Kre 9.2. Heitoubi ani Sodom'le Gomorrahyei khukarthil rapya, heirou phaitlai namyakhi thrilthiyeinung, heirouri thilak, ram bi heirouei karyouni meithlan dourei meikhuni karhukphopkur heinakni yukthrilmukur.

29Heisitoubi Umpune Lotyei paalkhouna phaitlairei klei khukarthil rapya maangyeryei kheenrou, Ane Abrahamya ningthutbi, heirou Lotya hichokyermakni bi heirouwei hilthutdurbi kalpikur.

30Kheen heirouri Lot'ne aiyei cha nangaka napung'khniya ruilouheibi Zoar khukarthilrouei shaalthutkur; heitoubi aiyei chanapuiya napung'khnile kalhonni molshaang rammei thlungkhur rilla leikur; ngamri yani chiwurbi Zoar'ra leingammakur. 31Heirouri chanapuiya upawine aiyei naowinung shun, “Asinungri kai pawakhi tarwura; heineri tlaipangpallei youkna khoini kakhu teinaoya waloubi paalpinungei hu'napawa khatkhi makkura. 32Heineri soh! Kasini kai pawaya tul pimong'mlipbini, heitoubi kasini akou kalhonni iplakase, heitoubi kai pawa'rouwei chanao pomthungbi yu-cha raanyerrase.” 33Heisi toubine yani heiniyei masanung yai pawaya tul pimongbi mlipyerkur, heitoubi chanapuiya upawine aiyei pawaei ipnara changbini ipkur, heiya pawaneri aiyei ipkhoubi shaalthutkurkhi mayekthungmakura. 34Heitoubi heithangei tlainiroukhi, cha napuiya upawine aiyei naowinung shun, “Thilak, angi masanungri keine pawale ipmalnakur, heineri angtu masakhi aya tul pimongbi malipyerlakase; heitoubi nangni anungei changbi ipmalnalaka; heiyanungri kani kai pawarei chanao pukthungrou.” 35Heisitoubi yani heiniyei masanungkhi yaiyei pawaya tul pimong'mlipkur; heitoubi cha napuiya dongwine aiyei pawaei ipnara hungchangbi akou ipmalnakur, heiya pawaneri aiyei chawine aipongra hung'ipkhoubi kanthoukur heiri loumyekthungmakur. 36Heisi toubine Lotyei chanapuiya khintamrekni yaiyei pawarei nao urthungkur. 37Heirouri chanapuiya upawine chanapawa khat pukbini, heirou aiyei min Moab toubi thulkur; heirou angtu rampha klei Moab limri airouwei yenrankur. 38Heirou chanapuiya dongwikhi chanapawa khat pukkur, heirou aiyei minri Ben-ammi toubine ungkur; heirou angtuei klei Ammonia'rap heiri airouwei yenraankur.

Currently Selected:

KANTHOUNA 19: MARIBSI

Highlight

Copy