KANTHOUNA 18

Kantompikur Isaacya Hungpukkur

1 Umpune Mamreyei phaikarra bok'heengyao haangra Abraham'nung shak'rungrungni muyerpikur; heirou ani nunghang-tlaikal shalutyei kheenrou aiyei khuiluphi cheem mangkhallei daikallimbi ombini leiyeinung; 2heirou ani aiyei mitni loumangalbi thiyeinungri, napawa napung'khyum aiyei maibongra kanthrinrap mayungbini heiklei; heirou ani yaya mulhakkur heirouri, ani aiyei shumtrum'rouwei yaya murilnanungei louchanrokur, heitoubi thleira khuklu kanthrunchani kanel'lhakbi, mai sikhuplhakbi khrumchakur. 3Heirou ani kyun, “Keiyei Pu Dunpu, Nangni keiya kringpiyanungri, neiyei shok keiya raalwurkhoubi shaalpimaklo. 4Yuiding thillanungkhi thacha heithutpilaksu, keiyei nanungei shuncha'kniri, naiyei hut'ho choumathaibini, heitoubi heeng'daikallimra beicha mathrildailaklo. 5Heirou naishok keicheemra wa'tlungura toubi, naiyei klah mathrilnanungei keinekhi murchak hutbor khatcha hoiyanungkhi marshikkeise, heihillou nani keirouwei shaalpiyalo.” Heirouri yani loukyun, “Neiyei lhangairoume toubi kyunya heisi toulaka.” 6Heirouri Abraham'ne cheemwaira khnotni hungchangurbi Sarahnung hungshun, “Khrang'toubi yamkun lhangai chinluk khyumtam holthutbini, heitoubi yui shungdokbi shatmnuibi mumtol katngoulak.” 7Heitoubi Abraham'ne halshangra wachangurbi, halshun lhangai'marnam khatcha yenmanthutbini aiyei shok khatnung yenpikur, heirou aiyei shoknikhi khrangni kambini thungmarshikkur. 8Heirou ani nushungyui kankhanle, nushung yuile, heirou aiyei kambini thungminkur halshun anle toubi heithutbini yai maibongra donthutpikur; heirouri yani heeng holira ombini chamaiyeinung Abraham'ne pongra heimayungkur.

9Heirouri yani anungei heikngai, “Neiyei nu Sarahri kouranga?” Heirou ani loumallang, “Ari cheemwaira leileime.” 10#Rom 9.9. Heirou Thangringni shun, “Ningkumma manthral-neilangni kumchaan tamyeinung, Keine neileinara hanui yenkallengthurou; heirouri thilak, kheen heinang neinu Sarah'ne chanapawa khat pukrou.” Heirouri Sarah'ne aihillei shumtrumra mayungbi heileinarou, kyun heiwaya mayekthungkur. 11Asinungri Abraham'le Sarah yarukhniri kum katchungurbi beimakni tarwura; heirou Sarahri napuiyaei parkhi khammura. 12#1 Pt 3.6. Heingammei Sarah'ne ukningra aitamtom laobini kyun, “Keikhi heirou keiyei shalkhi heinak tarkur hillouya, keine cha pombini nungkngaiya phaheirouko?” 13Heirouri Umpune Abraham'nung shun, “Koutounei Sarah'ne, ‘Keiya anak tarkur hillouya tanghakpani cha pomheirouko?’ toubi laobini yunkurrawo? 14#Mt 19.26; Mk 10.27; Lk 1.37; Rom 9.9. Umpuei touchangmak kluri kou kleiyo? Kartinrilkur ningkummaei asilumnung Keine neileinara yenkallengthurou; kheen heinang Sarah'ne chanapawa khat pukrouwa.” 15Heirouri Sarah'ne yanimakni loukyun, “Keiri laomakme.” (Heiri ani chiwurnei louyunwurnei tlou). Heirou Ane kyun, “Nimakme, nangri laokurme.”

Abraham'ne Sodomnung'tlim Shunchakur

16Heirouri thimi rapne kanthoubi shaalnanungei wathukkur, heitoubi Sodom lhangra yaimit yukthrilthikur; heirouri Abrahamkhi yaya lam ruikmut khoini heithulthutkur. 17Heirouri Umpune kyun, “Keiyei tourou kyou lhouya Abraham'rouei yulkhouserouko? 18#Kan 12.3; Pao 3.25; Gal 3.8. Ane kmu touri, Abrahamri beimak mantrang, heirou tang Lim khat hunghoiyeirou; heitoubi tlaipangpallei Limrap nammaya ani phor phayerheirou. 19Ngamri ani aiyei chanao rapya heirou aihillei hungrou kyou yu-cha rapya Umpuei kning hilthungni lhangaiya heirou tharmu chimmei lhouya tounanung shunpinanungei heirou Abraham'nung mardingpikur tloukantom heiya tlungyernanungei Keine aya khalthutdurla.” 20Heirouri Umpune kyun, “Sodomle Gomorrahyei doura beimak yanimakni yunrilwura, heirou yani beimak thuithiyei borh lhoukhi touwurla. 21Heineri asinungri yaidourei yunrilkur heiri Keinungei ka'tlungkur heinaksi yani tanghakpani toubi leileiko toubine Keine yongthirouwa; kounakpi yani toumakni louleiyanungkhi yongthilanungtom murouwa.”

22Heisitoubi thimi rapne bi heirouwei mai khreibi Sodomranung chakur, heiya kheen heinang rampha Abraham'ne Umpuei maibongra mayungbi heileikur. 23Heirouri Abraham'ne Aiyei pongra karnaklhakbi kngai, “Tharmu chim thimi rapyakhi lhangaimak thimi raple kalhonni maangyerouwako? 24Kounakpi khukarthil heiyei rilla tharmu chim thimi napung somngacha leiyanungri, khukarthil heiyei rillei klei tharmu chim thimi napung somnga heinung'tlim khukarthil heiya kalpimakni maangyerrouko? 25Lhangai lhoutou thimi rapya lhangaimak thimi raple khatnakdik khoini loubine maangchok'yerkurtou heiri kouniroukhi Neirouwei thukmakniyasu. Heihakpari toumakniyasu. Tlaipangpallei Pichar Puni chimya toupimakrouko?” 26Heirouri Umpune kyun, “Khukarthillei rilla Keine tharmu chim thimirap napung somngatom phalanungri, yaingamrou Keine khukarthil heiya kalpirou.” 27Heirouri Abraham'ne hanuikhi loukyun, “Thilak, Umpuei maibongra tlou yunnanungei putkhrit khoini keitam urchakura, heiya keiri koukhi mtik'mak thimi khat; heirou keiri rahuinaksi heirou mei'mkarei udnaksi tomngei. 28Kounakpi tharmu chim thimirap napung somnga'rouwei napung phanga watdanungkhi, napung phanga watnarou Nangni khukarthil heiya maangyerroko?” Heirouri Ane loukyun, “Kounakpi Keine thimi napung somlile phangatom phalanungkhi khukarthil heiya Keine maangyermakrou.” 29Heirouri Abraham'ne hanuikhi Anungei loungaithu, “Kounakpi bi heirou napung somlitom louleiyanungri kousitourou?” Heirou Ane loumallang, “Napung somlitom leiyanungkhi Keine heiwaya maangyermakrou.” 30Heihillou Abraham'ne hanuikhi buchathu, “Oh Umpu, malungkharimakhuilo, keine hanuikhi shunchathueise. Kounakpi bi heirou thimi napung somthumtom phalanungri kousitourou?” Heirouri Ane loukyun, “Kounakpi Keine bi heirou thimi napung somthum'tomya phalanungkhi heiwaya Keine maangyermakrou.” 31Heirouri Abraham'ne hanuikhi shunchathu, “Thilak, keine Umpuei maibongra mayungbini buchakura. Kounakpi bi heirou thimi napung somnitom phalanungri koutouserou?” Heirouri Ane kyun, “Thimi napung somnitom leiyanungkhi yainung'tlim bi heiya Keine maangyerpimakrou.” 32Heirouri hanuikhi ani shunchathu, “Malungkharimakhuilo Oh Umpu, keine khatdikchaya hanui buchathueise. Kounakpi thimi napung chipchatom leiyanungri kousitouserou?” Heirouri Ane loumallangbi kyun, “Thimi napung chipchatom leiyanungkhi Keine heiya maangyerpimakrou.” 33Heisitoubi Umpune Abrahamle tlou kallangril luikur hillouri shaalkur, heitoubi Abrahamkhi aiyei cheemranung kallengkur.

Currently Selected:

KANTHOUNA 18: MARIBSI

Highlight

Copy