KANTHOUNA 17

Tlou Kantomnei Hutlha Khoini Sermurdan

1Heirou Abram'ne kum somkole tako hungtlungeinung Umpune anungei muyerbini loushunpi, “Keiri Mane-Mantrangei Pu Dunpu#17.1: El Shaddai., Keiyei maibongra tharmu chimni chabi lhou toulak. 2Heirou Keine nangle, kasiyei tlakra Keiyei tloukantom khat khoupirou; heitoubi heiyei ngamni neiya pungshanyerbi, yu-chakhi mshing naimakni chungyerpirou.” 3Heirouri Abram'ne thleira lu sikhuplhakbi khuklu kanthrunchani khrumbi leiyeinung Umpune anungei loushun; 4“Thilak, Keine neinungei Keiyei tloukantom khat khoupiwurla; heineri nangri lim namyerrei pa khat hoirouwa. 5#Rom 4.17. Heirou neiyei minri Abram#17.5: mathangpikur pa toubi mu'kna. toubine ungmakarou, heiya Abraham#17.5: Lim rapbei pa. toubine ungrouwa; ngamri Keine neiyari lim nammaei pa hoiyerwurla. 6Heitoubi Keine neiya pung-shanyerbi yu-cha rapkhi chungwani shunyerrouwa; heitoubi neirouwei Keine Lim kounakhi thukyerrou, heirou neiyei shullam'rouwei Krung rapkhi pukyerrouwa. 7#Lk 1.55; Gal 3.16. Heirou Keiyei tloukantom awari nangle Kasiyei tlakrakhi heirou neihillei hungrou kyou neiyei yu-cha rapbei chaanrou ramphani kmit naimakni leirouwa; heirou Keiri neiyeikhi heirou neiyei yu-cha rapbeikhi Dunpu hoirouwa. 8#Pao 7.5. Heitoubi Keine neinungeikhi heirou neihillei hungrou kyou yu-cha rapnungeikhi, heirou neiyei yenchaheina Canaan'yei ram namma heiya nanungei klui naimakni paalnaram hoinanungei pirouwa; heitoubi Keiri neiyei Dunpu hoirouwa.”

9Heirou Dunpune Abraham'nung shun, “Asitoubi Kasiyei tlakra khoupikur tloukantom awaya nangkhi heirou neiyei hillei hungrou kyou yu-cha rapnekhi chaanserrou baiyermakni khourou da.” 10#Pao 7.8. Keile, nangle heirou neiyei hillei hungrou kyou yu-cha rapbei tlakra khounungei tlou kantomri awari: “Naihangrei chanao napawa toueimkheiri sermur danrou da. 11#Kan 17.24; 21.4. Heirou murdan heiri naiyei sermurrei unya danrou da; heirou murdan heini Keile, naiyei tlakra khourilkur tlou kantomrilnei hutlha hoirou. 12Heirou neiyei shullamrei pukkurya hoiyanungkhi, nimanung miramrei tuyni lobi khou thimine pukkurya hoiyanungkhi, chanapawa kantangri tlaini chotni tlunganungri, aya sermur danpirou da. 13Heineri neiyei shullamrei pukkur chanapawa, heirou miram-mithrilrei tuyni lokur thimi rapne pukkur chanapawa hoiyanungkhi, ayari sermur un danpirou da. Heisitoubi naiyei chanapawa rapbei sermur un dinkur heini Keiyei tloukantom heiri naidoura klui naimakni leiyerrouwa. 14Heirou napawa hukounak khatni aiyei sermurrei un dinmak napawacha heiri, aiyei thimi raprouwei hulthutlourou, ngamri a heiri Keiyei tlou kantomya toubaiwurla.”

15Heirou Dunpune Abraham'nung shun, “Heirou nangni neiyei nu Saraiya aiyei minri Sarai toubi ungmarou, heiya Sarah'tou heini aiyei min hoirouwa. 16Heitoubi Keine aya phor pirouwa, heiyakhi duinara Keine airouwei neinungei chanapawa khatkhi pirouwa; moi, Keine ayari phor pibini, heirou a heiwiri Lim rapbei pui khat hoirouwa; heitoubi airouwei thimi rapbei Krung rapkhi pukkeirou.” 17Heirouri Abraham'ne sikhuplhakbi, aiyei ukningra laoniwurbi aitamtom ningchakur, “Kum macha khat ka'tlungkur tarawa anungeiya chanapawa khat pukkeirouko? Heirou kum somko ka'tlungkur Sarah'neya cha pomheirouko?” 18Heirou Abraham'ne Dunpunung shun, “Oh, heiyanungri, Ishmaelri Neiyei mit'thrilna maibongra pulchini paalniyasu!” 19Heirou Dunpune shun, “Neiyei nu Sarah'ne neinungei shuimakni chanapawa khat pukkeirouhui; heitoubi nangni aiyei min Isaac#17.19: ani laolei. toubi ungrou; heirou Keine anungei klui naimakni tlou kantom khat khoupirou; heini aihillei yu-cha rapnungeikhi hoiyerrou. 20Heirou Ishmaelyei ngamrou neiyei kyunya Keine loumayekla. Thilak, ayari Keine phor piwurla; heirou Keine ayari pung-shanyerrou; heitoubi yu-chakhi chungduiyerrou; a heiri Krungcha napung chiple khniyei pu hoiyeirou; heitoubi aya Lim tangkhat hoiyerrou. 21Heiya ningkumma asilumnung Sarah'ne neinungei pukrou kyou chanapawa Isaac'nungei Keiyei tlou kantomya Keine khoupiwurla.”

22Heirou Ane Abrahamkou tlou kallangril luiwurbi, Dunpune Abrahamya lakurkhoubi kanthumkur. 23Heirouri Dunpune anungei shunpikur heinakrimni, Abraham'ne aiyei chanapawa Ishmaelle heirou aicheemra puklhakkur thimi raple, touri ani tuyni lobi khoukur shok rapbei chanapawa kantangyakhi Abraham'ne heiyei tlainihakrou yaya sermurrei un danpikur. 24Heirou Abrahamri aiyei sermurrei un murdanyei kaalnungri ai'mshaei kum somkole tako tlungura. 25Heirou aiyei chanapawa Ishmaelkhi aiyei sermur un danyei kaalnungri ai'mshaei kum chiple khyum tlungura. 26Heiyei tlainihakrou Abraham'le, aiyei chanapawa Ishmaelkhi murdankur. 27Heirou aicheemrei klei napawa nammakhi, heirou aicheemrei puklhakkur thimirap, heirou tuyni lobi khoukur miram-mithrillei thimi rapkhi Abrahamkou kalhonni sermur un danmalnakur.

Currently Selected:

KANTHOUNA 17: MARIBSI

Highlight

Copy