KANTHOUNA 14

Abram'ne Lotya Kalpikur

1Kheen heirouri asitoubi hungthukkura, Shinar'yei Krung Amraphel, Ellasar'yei Krung Arioch, Elam'yei Krung Ched-or-laomer, heirou Goiim'yei Krung Tidal, ya'mkheini yakantlangrilbi hut'dangmalnabini; 2Sodomei Krung Bera, Gomorrahyei Krung Birsha, Admah'yei Krung Shinab, Zeboiim'yei Krung Shemeber, heirou Belayei Krung Zoar, ya rapbei doura raal youbi kardourilkur. 3Ya Krungrap napung-phangani hut dangrilbini Siddim (touri, Mitti'yei Samadru'rui) phaikara raallui rapya khumtilkur. 4Ched-or-laomer'yei kulchalna daakra yani kum chiple khnibil shok khoini leikhoubi, heitoubi kum chiple khyum tlungkur heirouri yani aidoura yanimaknei raal youkur. 5Heirou kum chiple phali tlungkur heirouri Ched-or-laomer'ne akou yakantlangbi hut dangrilbi klei Krung raple malnabi raal dakur; heitoubi yani Rephaimya Ashteroth-Karnaimra, heirou Zuzim rapya Hamra, heirou Emimya Shaveh-kiriathaimra; 6heirou Horia rapyakhi, yaiyei Seir Lhungdou rammei ri karchunna bi El-paran phaikar wa'tlungni yaya raal maniwurbi kulchalkur. 7Heirouri yani mai khreithutbi, Kadesh toubi ung En-mishpat'ra yenkallengkur, heitoubi Amalekia rapbei ramrei thimirap namyakhi hatkur, heitoubi Hazazon-tamar'ra klei Amoria rapyakhi raal maniwurbi namsundakur. 8Heirouri Sodomei Krungle, Gomorrahyei Krung, heirou Admahyei Krung, Zeboiimyei Krung, heirou Bela'yei (touri, Zoar) Krung ya nammani wathukbini, Siddim phaikara lokpani kartilbi raal dananungei marshikkur. 9Heirou Elamyei Krung Ched-or-laomer'le, Goiimyei Krung Tidal'le, heirou Shinaryei Krung Amraphel'le, Ellasaryei Krung Arioch, ya Krungrap napung-phalini, krungrap napung-phangakou raal kardourilkur. 10Siddimyei phaikar heiri bitumen touri kheh-khuinat khmong phorlouna khur'khyuk chungni klei; heirou Sodom'le Gomorrahyei Krungrap heiri raalchi truknarouri khur yuknara dalhakthungkur, heirou hithungmak deiri lhungdoura trukbaangkur. 11Heitoubi yani Sodom'le Gomorrahyei putchei-lalthumrap, heirou trunwai lungrap nammakhi markumloubi yairamra shaalkur. 12Heirou yani Sodomrei klei Lot, Abramyei naowayei chawayakhi manloubi, heirou aiyei putchei-lalthumrap nammakhi louheibi shaalkur.

13Heirouri raalbomrei kartleithutkur napawa khatni hungbini, Hebrewa Abram'nung pao hungtamkur, ngamri Abram heiri Amoria'yei bok'heengyao Mamre phaikarra Aner'le Eshcol yakhu-teinaokou yarilbini leimalnakur. 14Heirou Abram'ne aiyei naowayei chanapawaya raalla kulchalbi manlouheilame tounei paoya mayeknarouri, ani aicheemrei klei, raalla lhangaini sireikhei shok rapya napung macha-khyumle chiple chotya ruiloubini, heitoubi yani Dan waphani heichanthungkur. 15Heitoubi ani masanung aiyei raallui rapya rul'khni thukni yerkhaibi, yaidoura raal dakur; heitoubi ale heirou aiyei raallui rapne yani raal maniwurbi yaya hulloukur. 16Heitoubi ani aiyei naowayei chanapawa Lotyakhi heirou aiyei putchei-lalthum rap nammakhi, heirou aiyei nuwa-chawa rapkhi kyaoni heirou aiyei thimirap nammakhi kalpibini yenruimallengkur.

Melchizedekni Abramya Phor Pikur

17 # Heb 7.1-10. Heirou Abram'ne, Ched-or-laomer'le kalhonni hut dangrilbi raal kardourilkur Krung rapya raal maniwurbi yenkallengnarou, Sodomyei Krungni, ‘Krungei phaikar’ toubikhi mu'kna Shaveh phaikara wathukbini aya lourorilbi murilkur. 18Heirouri Sodomyei Krung Melchizedek wathukbini, mumtolle darkha yuile toubi heithutbini Abram'nungei loumalanpikur. Melchizedekri Yerrouwei Choudui Dunpuei suipipu khat. 19Heirou ani Abramya phor pibi asitoubi kyun, “Abramyari Yerrouwei Choudui, Thangmun-Shimlei khintammei Pu, Dunpune phorpi hoiniyasu. 20Heitoubi neiya yeekna thimi rapya neihutra pilhakkur Pu, Yerrouwei Choudui Dunpuei thang'alya chouni mathanglaksu!” Heisi toubine Abram'ne aiyei klei lal'thum nam'rouwei siruk chiptamei siruk khatri Melchizedeknung Umrui put#14.20: Umrui touri Dunpuei siruk. khoini pikur. 21Heirou Sodomei Krungni Abram'nung shun, “Keiyei thimi rapya keinungei pilaka, heitoubi putchei lalthum rapri neiyei hoilaka.” 22Heiya Abram'ne Sodomei Krungnung loushun, “Keine Thangmun-Shimleiyei Pu, Umpu, Yerrouwei Choudui Dunpunungei keihut khangbaangbini kantomwurla; 23touri, keine neiyeime toubi klei putchei lalthum rapya phaila'yengcha khatkhi, heirou khorkhangrui ramphaya loupimakrou. Kouweiyo toulanungri, ‘Abramya keine laldun thimi khat hoiyerkurme’ toubine nangni yunnarou. 24Keiyei thimi rapne yrengchakhou putcheirap nimakni deiri koucha'khatkhi keine louheimakrou. Heiya keiyei thimi rapne chamailoukur chak-anle heirou keikou chamalkna thimirap, Ener'le, Eshcol, heirou Mamre, yari yai siruk heiri heisi loulaksu.”

Currently Selected:

KANTHOUNA 14: MARIBSI

Highlight

Copy