KANTHOUNA 13

Abram'le Lot Yakhunta Karkhaikur

1Heirouri Abram'ne Egypt'rouwei kathukkurbi, ale aiyei nule, heirou aiyei klei putchei-lalthumrap nammaya urlouheibi, heirou Lotkhi akou kalhonni khate ram Negeb'ra ka'tlungkur.

2Abramri hal-ui'waa dunnara, heirou sina-lapara chungni dunthimi khat hoikhou. 3Heirou ani khate ram Negebei kulrel'rouweini ram deideirakhi yenchaheibi, heitoubi Bethel'ra wa'tlungkur. Heitoubi ani haallei khuiluphi sheem sabini leikhouna bi Bethel'le heirou Ai khukarthilyei tlakra klei ram bi heitamrou wa'tlungkur. 4Heitoubi ani bi heitamrou haallei sabaangurkhou khrahpal pongra wachangbi, heitoubi bi heirou Abram'ne Umpuya minlhangbini khrumchakur. 5Heirou Abram'le kalhonbi chakur Lot'yeikhi yaorul, halrul, heirou cheem-keiyei lalthum chungwani leikhou. 6Asinungri ram heitamrou yakhuntari leikanthrin yamakura, ngamri yakhuntayei lalthum, putchei heirou ui-waarap heiri chungachaknei ngamrou ram heiri changmakura. 7Heingammei Abramei halsil thimi raple Lotyei halsil thimi rapbei tlakra karyomni karhaorilbi ngaal-okkhi thukrilkur; heirou kheen heinungri Canaan'yei thimi rapkhi heirou Perizzia rapkhi ram heitamrou louklei.

8Heirouri Abram'ne Lotnung shun, “Keiyei shuncha'kniri, nangle kakhuntayei tlakra karhaorilmakse, heirou neiyei halsil thimi raple keiyei halsil thimi rapbei tlakrakhi karhaorilmaksu; ngamri kasiri teinaothil. 9Ram namtoma heiri neimaibongra leiyura nimaka? Heineri asinung keiyei shuncha'kniri, neitamtom keirouwei laini karkhailaka; kounakpi nangni thyoi'lhangrei ramya loulanungri, keine thyoi'lhangra chaeise; nimanung nangni thya'lhangra shaallanungri, keine thyoi lhangra chaeise.” 10Heitounei Lot'ne mangalthikur, heirouri ani Jordan'yei phaikar namma heithrilmukur; phaikar heiri bi kantangrou yui-martheekhi lhangai, heirou Umpune Sodom'le Gomorrah maangyerbongei youbi louklei Umpuei yekulnaksi, heirou Egyptbei ramnaksi, thleiphu lhangai, heirou Zoar'yei phaikar wa'tlungni klei phaikar khat. 11Heisitoubi Lot'ne Jordan'yei phaikar namma anungei kalloubi, heitoubi ani kulkung lhangra lamtlabi chakur; heisitoubi yani khatle khat minung-minung karkhaikur. 12Heirou Abram'ne Canaan ramra paalthungkur, heirou Lotneri phaikarrei klei khukarthil rapra thang'knaini yenpaalheibi, heitoubi ani Sodom lhangra aiyei khuiluphiyei cheem sabaangkur. 13Heiya Sodomei thimi rapri beimakni khril lhangaimak heirou Umpuya karhani borhyei lhou toukhou.

14Heirou Lot'ne karkhaikur hillouri Umpune Abram'nung shun, “Asinungri neileina birouwei mangalbini khalu lhangra heirou khate lhangrakhi, kulkung lhangra heirou kulrel lhangrakhi neimitni thril'thilaka. 15#Pao 7.5; Gal 3.16. Ngamri neiyei thrilmuna ram namtoma heiri Keine neinungei pirouwa, heirou klui naimakni neiyei yu-cha rapnungei hoiyerrouwa, 16Heirou Keine neiyei yu-cha rapya thleirei rahuinaksi chungyerpirou; heineri hukounak khatni thleirei rahuiya mshing sherchichanganungri, neiyei yu-cha rapyakhi mshing sherchichangrou. 17Kanthoubi ram heiya dungrakhi heirou homrakhi karwaichabini thilaka; ngamri heiya Keine neinungei pirouwa.” 18Heisi tounarouri Abram'ne aiyei khuiluphiyei cheem heiya phuichutdurbi, heirou Hebronyei Mamre bok'heengyao phaikarra yuldakur, heitoubi ani bi heitamrou Umpunungei khrahpal khatkhi sabaangkur.

Currently Selected:

KANTHOUNA 13: MARIBSI

Highlight

Copy