KANTHOUNA 12

Dunpune Abramya Ungkur

(Kan 12.1—Hoy 18.27)

1 # Pao 7.3; Heb 11.8. Kheen heirou Umpune Abram'nung shun, “Nangni neiya pukna ram'rouwei wathukkurlaka, heitoubi neiyei karnakril cheemkhur-rokhurya heirou neiyei nuwi-pawaei cheem-keiya lakurkhoubi, heirou Keine neinungei shunmandorou kyou ramranung channi chalaka. 2#Kan 15.5; 17.4,5; 18.18; 22.17; 28.14; 32.12; 35.11; 46.3. Heirou Keine neirouwei Lim tangkhat sheemrou, heitoubi neiya phor pirou; heitoubi Keine neiyei min tangyerpirou, heirou nangni phor yenshunna pu hoirouwa. 3#Kan 18.18; 22.17,18; 26.4; 28.14; Gal 3.8. Heirou nangni phor pikur thimiya Keinekhi phor pirou, heitoubi neiya mancho thimiya Keinekhi manchorou; heirou neingammei tlaipangpallei cheemmai-bommai namma yaitamni phor phanarou.”

4Heisitoubi Abram'ne Umpune anungei shunpikur tloubom hilthungni shaalthutdura; heirou Lot'ne akou kalhonni chakur; heirouri Abram'ne Haranya lakurkhoubi chakuryei kheenrouri ai'mshaei kum somretle phanga tlungura. 5Heirouri Abram'ne aiyei nu Saraile aiyei naowayei chanapawa Lot'yakhi ruiloukhei; heirou yani markumbi dunkhou lalthum nammakhi urlouheibi, heirou yani Haran'ra pukkhou chanaorap nammayakhi ruilouheibi yani Canaan ramranung chakur; heitoubi bi heirou yani wa'tlungkur. 6Heirou Abram'ne Shechem heirallurbi Moreh'yei bok'heengyao phaikara wa'tlungkur. Heitoubi kheen heinungri ram heirou Canaania rapne haallei waiyoubi paalbini louleiyura. 7#Kan 13.15; 15.18; 17.8; 24.7; 26.3; 28.4,13; 35.12; 48.4; Pao 7.5; Gal 3.16. Kheen heirou Umpune Abram'nungei muyerbi loushun, “Neiyei yu-cha rapnungei Keine ram awaya pirou.” Heirou ani ram heitamrou anungei muyerpikur Umpunungei khrahpal khat sabaangpikur. 8Heitoubi ani bi heirouwei chutdurbini Bethel'yei kulkung lhangei molshaang lhunthungni chawurbi, heirou Bethel'ni kulrel lhangra leithungurbi, heitoubi heiyei kulkung lhangrani Ai leina tlakra ani aiyei khuiluphiyei cheem sabaangbini leiwurkhou. Heitoubi ani Umpunungei khrahpal khat sabaangbini Umpuei minya ungbini khrumchakur. 9Heirou Abram'ne aiyei lamtla heisi yenchaheibi, heirou Kulrel lhangei Negeb'ra wa'tlungkur.

Abram'ne Egyptra Yu'tlungkur

10 # Kan 20.1-18; 26.7-11. Kheen heirouri Canaan'yei ramra butam thukkur. Heirouri Abram'ne Egyptbei ramra ramtaangbi leinanungei yukur; ngamri ram heirouwei butam thukkur heiri yunnungei makni klahyei bomkhat hoikur. 11Heirouri asitoubi hungthukkura, touri ani Egyptra yu'tlung waiyoueinung, Abram'ne aiyei nu Sarai'nung shun, “Asinungri, thilak, nangri shakrung lhangaime touri keine mulei. 12Ngam heineri Egyptbei thimi rapne neiya loumubi, ‘Napuiya heiwiri aiyei nuleime’ toubine yani yunrou; heitoubi yani keiyari hatkurkhi kya, heiya neiyari hatpimakrou. 13Heineri keine neinungei shuncha'kniri, nangri keiyei charme toubine yunlaka, heiyanungri neiyei ngamrou keiyari hatmakrou; heirou neingamrou keikhi ringpharou.” 14Heirouri asitoubi thukkura, touri Abram'ne Egyptra yutlungei kheenrouri, Egyptbei thimi rapne napuiya heiwiya shakrung beimak lhangaini loumuwurla. 15Heirou Pharaoh'yei lhou'urpu rapnekhi aya mulhakurla; heitoubi Pharaoh'yei maibongra aiyei shakrung lhangai heiyei ngamrou Krung'nungei paotamkur; heirouri napuiya heiwiya Pharaoh'yei Krungkulla ungbaangyerkur. 16Heirou Pharaoh'ne aiyei ngamrou Abramya lhangaini toupikur, heirou Pharaoh'ne aiyei yaorul, halparap, heirou gadha puikhi-pakhi, heirou shok napawale shok-napuiya rapkhi heirou ut rapkhi chungni Abram'nungei pikur.

17Heiya Abram'yei nu Sarai'yei ngamni Pharaoh'yakhi heirou aiyei bommai'yakhi Umpune phar knani shar'dayerkur. 18Heirouri Pharaoh'ne Abramya shunkur, “Nangni keinungei toukur awaya kouweiyo? Koutounei nangni keinungei napuiya heiwiri neinume toubi yunpimakko? 19Kounungei nangni, ‘A heiwiri keicharme’ toubi keinung kyun? Heingammei keineri aya keiyei nu khoini loukur; heini asinungri thilak, neinu heiri arou leiyura, aya ruilouheibi shaallaka.” 20Heirouri Pharaoh'ne aiyei thimi rapnung Abramyei ngamrou chay pibini shunkur, heitoubi yani aiyei nule heirou aiyei klei putchei-lalthum nammaya urbini thulthutpikur.

Currently Selected:

KANTHOUNA 12: MARIBSI

Highlight

Copy