HOYOUNA 31

Hutsakhei Thimi Bezalel Heirou Ohaliab:

1 # Hoy 35.30—36.1. Heirouri Umpune Moses'nung shunbi asitoubi kyun: 2“Thilak, Judah cheemkhurrei pukkur Uriyei chanapawa Huryei chanapawa Bezalelya Keine mintlangbi ungpiwurla. 3Heirou Keine ayari Dunpuei Lhawaini thimyerwurbi phab danara, khyal-roushingrakhi, heirou lhouchur-lhoupangna lim namyerwara shingkhei thimi khat hoiyerwurla. 4Heirou ani sina sanara, kulshan sanarakhi heirou lapathir sanarakhi hutsa limlim sathutkhei lhangsa khat khoini bom lhakpiwurla. 5Heirou thlung yemkhakbini marchalnarakhi, heirou heeng chalnarakhi, heirou hutsa kheiyei lhoulim namroukhi ani mansambangbi pangeirou. 6Heirou thilak, Keimsha'hakpani Dan cheemkhurrei Ahisamachyei chanapawa Oholiabyakhi lhoubom lhakpiwurla; heitoubi hutsakhei thimi nammaei ukningrakhi lhouchur-lhoupangnara hutsa heinei roushing-khyalkhi Keine lhakpiwurla. Heirouri yani neinungei Keine chay pibi shunpikur lhourap nammaya yani sheemthutpirou. 7Heirou yani Khulbung kartilna khuiluphiyei cheemkhi, heirou Mardingrilna Theengkungkhi, heirou heiyei doura dunkhounanungei Kringpi kheiyei Omnakhi, heitoubi khuiluphi cheemrillei Omna heengrap nammakhi; 8heirou heiyei turngdoukhi, heirou heiyei phuwan raple chukhrung-anthlei rapkhi, heirou sina khyingei meitharlkhi, heirou heiyei phuwan-shungyangrap nammakhi, heirou mrohkun ikna khrahpalkhi; 9malan put hongna khrahpalle heiyei phuwan-shungyangrap nammakhi, heirou heiyei kullhingle, heirou heiwaya dunkhouna thiryungphukhi; 10heirou Puwatlhouwei shamb raple, heirou Suipipu Aaron'le aiyei chanapawa rapni suipipu khoini watlhou touyei knaa shamb rapkhi; 11heitoubi teiphangnungei shirekle, heirou khyingei bomra iknungei khrim muiknam mrohkun rapkhi namma Keine neinungei chay piwurkhou hilthungni yani sheemthutpirou.”

Mathrilnei Hutlha:

12 # Hoy 20.8; 23.12; 35.2; Khn 5.12-15. Heirouri Umpune Mosesnung shunbi asitoubi kyun: 13“Heineri nangni Israellei thimi rapya asitoubi shunpilak: ‘Nane Keiyei Sabbathya toubaimakni ngaklak; kouweiyo toulanungri, heiwani Keile naiyei tlakra hillei hungrou kyou naiyei yu-cha rapbei chaanrou ramphani mu'kna hutlha khat khoini leirouwa; heineri nani mulaklo touri Keiri naya khaithutdurbi marthingpikur Pu Umpume.’ 14Ngam heineri nani Sabbath ngaakbom thukme; kouweiyo toulanungri, heiwari nanungei khying thimi hukounakni heiwaya karhayerkur hoiyanungri, ari shuimakni hirou da; kouweiyo toulanungri, hukounak khatni heiyei tlaininung koukou lhouya churpaangkur hoiyanungri, heinaksi thimiyari aiyei thimi raprouwei louthutdurou da. 15Kouweiyo toulanungri, tlaini thrukni heirouri lhouchur-lhoupangri yarou, heiya tlaini eninirouri lhouchur-lhoupang namma karngabi, Umpuei bomra khyingni mathrillou da. Hukounak khatni Sabbath tlainirou lhouchur-lhoupaangkur yaowanungri, ari shuimakni hirou da. 16Heisi toubine Israellei thimi rapni Sabbath ngakbini, hillei hungrou kyou yu-cha rapbei chaanrou ramphani lakkhounungei yamak tlou kantom khat khoini yani Sabbath heiwaya ngakrou da.” 17Awari Keile Israellei chanao rapbei tlakra klui naimakei klei mu'kna hutlha khat, kouweiyo toulanungri, tlaini thrukniyei rilla Umpune Thangwan heirou Shimleiya sheempikhou, heiya enini tlung tlainirouri Ane lhou churnarei karngawurbi klah mathrilkur.

18Heirou Umpune Sinai Lhungdoura Moses'le tlou kallangril luikur heirouri, Ane Moses'nung Mardingrilnei Tloulam thlungpak khintam malanpikur; thlungpakrap heiri Dunpuei hutmayungni mayekur.

Currently Selected:

HOYOUNA 31: MARIBSI

Highlight

Copy