HOYOUNA 30

Mrohkun Ikna Khrahpal:

1 # Hoy 37.25-29. “Heiyakhi duinara nangni mrohkun iknanungei khoini khrahpal khatkhi sarou da; khrahpal heiwari nangni acacia heengni sarou da. 2Khrahpal heiyei dungri thong khat shaangyerrou da; heitoubi heiyei homrakhi thong khat paakni sarou da; khrahpal heiri dungrakhi heirou homrakhi malnayerlak; heitoubi heiyei choulamri thong khni chouyerlak; heitoubi aiyei chee rapkhi khrahpallei heeng mshareini sheemrou da. 3Heirou nangni khrahpal heiyei dourakhi heirou heiyei mnak karhilnikhi, heirou heiyei chee rapkhi namma sina khyingni lupbangrou da; heitoubi heiyei pal karhilni lukhup naksini sinani kum khoini mansambangrou da. 4Heitoubi nangni heiyei pal kumna daakra lhaknungei sinayei hutshi khintam koollou da; heitoubi nangni heirapya khrahpallei kum thyoi-thyara mallukrilni khintamtam paalmandokrou da; heitoubi heirapni khrahpal heiwaya khangchana putpu ronlhaknanungei khnarap hoiyerrou da. 5Heirou nangni heiyei putpu rap heiri acacia heengni sarou da; heitoubi heirapya sina lupbangrou da. 6Heitoubi nangni khrahpal heiwari Keine neiya murilloume toubi shunna bi Mardingrilna Theengkung dourei, Kringpi kheiyei Omna maibongra, maikhalphi yarkhalna maibongra tombini khoulaklo. 7Heitoubi Aaron'ne heiyei doura muiknam mrohkun ikrou; ani heiwaya ningshunserrou shirek meishar manshokleiser ikrou da. 8Heitoubi Aaron'ne rawainang shirek meishar manshokyeinang mrohkun ikrou da; heisi toubine Umpuei maibongra naiyei yu-cha rapbei chaanrou ramphani trimkur-khamkur naimakni mroh kunya ikbi khrim muinamyerrou da. 9Nangni khrahpal heiyei doura hyingmak mroh kunri iknungei yamakrou; nimanung marmokur anchumkhi hongbini makatnungei yamakrou; heirou leraomak trunwai lung rapkhi makatnungei yamakrou; heirou nangni heiyei doura hyingmak darkha yuikhi shungphangbi makatnungkhi yamakrou. 10Heitoubi Aaron'ne kum khatrou hanuitom khrahpallei maibongra wachangbini, heiyei halcheera palbini borh'rouwei ukning hungnei Puwatlhou tourou; heirou ani borh'rouwei ukning hungnei makatkur khrumna putyei hee heiwaya khrahpal doura makatnei Puwatlhou heiri, naiyei yu-cha rapbei chaanseroukhi makatrou da; ngamri heiwari Umpuei bomra yerrouwei khyingei Puwatlhou.”

11 # Hoy 38.25,26. Heirou Umpune Mosesnung asitoubikhi shunpithu: 12“Nangni Israellei thimi rapya thimi mshing kanshernanungei min mayeyeinung, ya thimi napung kantangni ai'aiyei rungkhlangnung Umpuei bomra ruiharou da; heiyanungri nangni yaya thimi mshing kansheryei kalnung yaihangra pharknayei chansher damakrou. 13Heitoubi mshing kansherchokkur thimi napung kantangei pibomthuk ruiput rapri: Pucheemyei Puwatlhoura pibomthuk ruituy heiyei shekel lhang'khat hoirou; heitoubi shekel lhang'khat heiri Umpunungei pibomthuk ruiput hoirou da. 14Heirou ai'mshaei kum somni'rouweini heithakrei 'mkhei, thimi mshing kanshernara kansherchokkur thimi napung kantangri Umpu'nungei ai'aiyei ruiput tuy makatrou da. 15Nane borh'rouwei ukning hungnei Umpunungei ruiput tuy makatyeinung, laldun thimine piduinungei yamakrou; heirou kanring thiminekhi shekel lhang khatrouwei kanthritni pinungei yamakrou. 16Heirou nangni borh'rouwei ukning hungnei ruiput tuy heiwari Israel thimi raprei loubini, heitoubi khulbung kartilna khuiluphi cheemra Puwatlhou tounanungei pilhakrou da. Heiyanungri heiwani Umpuei maibongra Israel rapya ningthutyerbi, naiyei borhya kukpinanungei hoirou.”

17Heirou Umpune Moses'nung shunbi asitoubi kyun: 18#Hoy 38.8. “Nangni kulshanyei lhingtang khatkhi sheemrou da; heitoubi heiwaya dunkhouna thiryungphukhi kulshanni sheemrou da; heitoubi nangni heiwaya khulbung kartilna khuiluphi Pucheemle khrahpal khintamyei tlakra dunbini khoulak; heitoubi nangni lhingtang heiwayei rilla yuiding tha shunglhakbini khoulak. 19Heitoubi Aaron'ne aiyei chanapawa rapni lhingtang heirouwei yaihut-yaihokhi chikmathai-choumathairou. 20Heirou yani khulbung kartilna khuiluphi cheemra wachangeinung, nimanung yani Umpunungei khrumna put hongbini makatnungei khrahpal pongra wachangeinung, bi heirouwei yani choumathairou, nimanungri yari hirou. 21Heisitoubi yani yaihut-yaiho rapya chikmathairou, heinimanungri yari hikurkhi kya; lhoulam lammit heiwari yaiyei yu-cha rapbei chaan ramphani karyomni chanungei youkna lammit hoirou da.”

Teimnuinungei Shirek:

22 # Hoy 37.29. Heiyakhi duinara, Umpune Mosesnung shunbi asitoubi kyun: 23“Nangni yerrouwei lhangai muiknam mroh'lung rapya tha loubini marshiklak; myrrh shirek yuikhi shekel macha-phanga, heirou schairungkhor kunkhi shekel macha-khnile somnga, heirou agorkhi shekel macha-khnile somnga loubini marshiklak. 24Heitoubi schairungpa nakhi Pucheemrei changbomthuk changh hilthungni shekel macha-phanga Olive shirekle toubi mankonlak. 25Heitoubi nangni heirapya lhangaini marchunbini, shirek muiknam marchun thimi rapbei sheemthutnaksi muiknam shirek khoini marchunbi sheemthutlak, heitoubi khyingei mnuinungei shirek hoiyerlak. 26Heirou shirek heiri nangni khulbung kartilna khuiluphi cheemkhi, heirou Mardingrilna Theengkungkhi shungphanglak. 27Heitoubi heiyei turng dourakhi, heirou heiyei phuwan-shungyangrap nammakhi, heirou meitharlkhi, heiyei shungyang rapkhi, heirou mrohkun ikna khrahpalkhi; 28heirou khrumna put anchum hongbi makatna khrahpalkhi, heiyei shungyangrap nammakhi, heirou kulshan lhingtangle heiwaya dunkhouna thiryungphukhi namma shirek shungphanglak. 29Heitoubi nangni heirapya namma makatthutbini marthingyerrou da; heiyanungri heirapri yerrouwei marthing shungyangrap hoirou, heitoubi heirapya palril-thirrilkur shungyangrap nammakhi khying hoirouwa. 30Heirou nangni Aaron'le aiyei chanapawa rapyakhi shirek shungphangbini fnalpilak; heitoubi yaya makatthutbini marthingthutyerpilak; heiyanungri yani suipi purap khoini keinungei Puwatlhou toupirou.” 31Heitoubi nangni Israellei chanao rapnung asitoubi shunpilak: “Awari Keiyei khying shirek khoini naiyei yu-cha rapbei chaan ramphani hoiyerrou da. 32Awari thimicham hukhatdei sharungra teiphangnungei yamakrou; heitoubi nangni thimi hukhatnungkhi heinaksi shirek marchunpimakrou da; kouweiyo toulanungri, heiwari khyingei shirek, heineri heiwari nanungei khying putshak khatme toubine lourou da. 33Thimi hukounak khatni heinaksi marchunlanungri, nimanung hukounak khatni heinaksi shirekya thimicham hukhatdei doura shungphaanglanungri, heinaksi thimiyari aiyei thimi raprouwei louthutdurou.”

34Heirouri Umpune Mosesnung shun, “Nangni khrim muiknam mroh kun Stacte, Onycha heirou Galbanum lim rapya loubini, heitoubi frankincense mroh khyingle toubi changh chapmalknani holmarkhebini marchunlak. 35Heitoubi nangni heiraple kalhonni khrim muiknam mroh marchun thimine sheemkur'naksini mitti lhakbini marthingni marchunlak. 36Heirou nangni mrohlim thacha loubini rahui thukni takyunlak; heitoubi heiyei kunrap thari Keine neiya murillou youna bi Khulbung Kartilna Khuiluphi cheemrei klei Mardingrilna Theengkung maibongra khyingei putlam khoini tlathutrou da. 37Heirou neiyei marchunkur muiknam mrohkun heinaksiri nani chummei chamni yrengnungei marchunnungri yamakrou; ngamri heiwari nanungei Umpuei watlhoura khyingei putlim hoirou da. 38Heirou thimi huhuni heinaksi marchunbi muiknam mrohlim khoini yrenglanungri, ayari aiyei shullam'rouwei louthutdurou da.”

Currently Selected:

HOYOUNA 30: MARIBSI

Highlight

Copy