HOYOUNA 29

Suipipu Rapya Umpu'nungei Makatthutbi Marthingthut:

1 # Lev 8.1-34. “Heirou yani Keiyei bomra Suipipurap khoini Puwatlhou tounanungei nangni yaya makadthutbi marthingthutyei kheenrou tounungei lhou rapri: Koukhi msei mak halpa doucha khatle yaopa khintam loubini marshiklak. 2Heitoubi phri sikmak mumtolkhi, heirou shirekra mathumpungkur phri sikmak mumtol rapkhi ngoumarshiklak; heirou mumtolrap heiri gehuei yamni lhangaini ngoumarshikrou da. 3Heitoubi heirapya nangni bungka khatra lhakrou da; heitoubi bungka heile kalhonni, halpa douchale yaopa khintam heiri Aaron'le aiyei chanapawa rapnungei malanpirou da. 4Heitoubi nangni Aaron'le aiyei chanapawa rapya Khulbung Kartilna khuiluphi cheem shumtrumra heiruilhakbi, heitoubi yaya yuini choumathaipirou da. 5Heirou nangni shamb rapya loubini heitoubi linglikchulle, Ephod ruile, Ephodle heirou malungpak khangnakhi namma Aaron'nungei nabangpirou da; heitoubi hutsa karbilni yekbini sheemkur Ephodyei shintlak ruikhi yanungei yitbangpirou da. 6Heitoubi nangni aiyei lura murshum lingkhangkhi yitbangpirou da, heirou murshum doura khyingei lukhupkhi makhupbangpirou da. 7Heitoubi nangni teinungei shirek loubini heitoubi aiyei lura shungbangbi fnalpirou da. 8Heirou nangni aiyei cha napawa rapyakhi yenruilhakbini, heitoubi yayakhi linglikchul rapya nabangpirou da. 9Heitoubi nangni yaya lingkhamphi rapkhi hyilbangpirou da, Aaronkhi heirou aiyei cha napawa rapyakhi yaiyei lura lukhupkhi makhupbangpibi phonphoppirou da; heirouri yani Puwatlhouwei lammit hilthungni suipipurap khoini watlhou tourou. Heisitoubi nangni Aaron'le aiyei cha napawa rapya Puwatlhoura makadthutpirou da.

Malan Put Makatnei Lammit:

10“Heitoubi nangni Khulbung Kartilna khuiluphi cheem maibongra halpa khat heilhakrou da; heitoubi Aaron'le aiyei cha napawa rapni hallu doura yaiyei hutni palbini khourou da. 11Heitoubi nangni halpa heiwaya khulbung kartilna khuiluphi cheem shumtrumra Dunpuei maibongra hatrou da. 12Heitoubi nangni halpawaei hee tha loubini heitoubi Mardingrilna Theengkungei halchee rapbei doura neiyei hutmayungni teiphangrou da; heitoubi nangni hee namma heiri Mardingrilna Theengkung holira shungphangrou da. 13Heirou nangni halpa heiyei uklhopbei anyaorap nammale, mathinle, khrilkui-khrilrangei anyao raple heirou makal khintamle, heirou heirapya lhomphopna anyaorap nammakhi loubini, heirapya nangni khrahpal doura meira hongbini makatlaka. 14Heiya halpa heiyei an miteele an'unle heirou heiyei haldeerap heiwari nangni palshung pura urthutloubi meini hongurlak, ngamri an heiwari borhnung'tlim malankur khrumna put khat.

15“Heirou nangni yaopa khintamrei khatya loubini, heitoubi Aaron'le aiyei cha napawa rapni yaihut lamthutbini yaopa heiyei ludoura heipallaksu; 16heitoubi nangni yaopa heiwaya hatlak, heirou heiyei hee dongloubini, khrahpal karhilni khrephanglak. 17Heitoubi nangni yaopa heiri harhar shatchallak, heirou heiyei khrilrang rapkhi heirou heiyei ho rapkhi yuira chaamthailak, heitoubi heirapya anhar raple kalhonni aiyei lule pulni khrahpal doura bangkhoulak. 18#Eph 5.2; Php 4.18. Heisitoubi nangni yaopa heiwaya khrahpal doura pumni meira hongurbi makatlak; an heiwari Umpunungei meira hongbi makatkur khrumna put; heiwari meira ikbini, Umpuya pilyerkna khrim muiknam malanput khoime.

19“Heitoubi nangni yaopa khatkhi loubini, heirou Aaron'le aiyei cha napawa rapni aiyei lura aiyei hutrap palyerlak. 20Heisitoubi nangni yaopa heiwaya hatbini, heitoubi heiyei hee tha loubini heirou Aaronyei thyarei khna bungrale, aiyei cha napawa rapbei thyarei khnabung raprakhi, heirou yaiyei thyarei hutpuibung raprale heirou thyarei hopui bungrap rakhi teiphangpilak; heitoubi heirouwei maleithungkur heerap namma heiri khrahpal doura karhilni khrephangurlak. 21Heitoubi nangni khrahpal dourei klei hee tha loubini heitoubi teinungei shirekkhi tha loubini Aaronyei dourale aiyei shamb rapbei dourakhi, heirou akou kalhonbi klei aiyei cha napawa rapbei dourakhi, heirou yaiyei shamb rapbei dourakhi khrephangpilak; Heiyanungri ale, aiyei shamb rapkhi, heirou aiyei cha napawa rapkhi heirou yaiyei shamb rapkhi kyaoni Puwatlhoura makatthutkur hoirou.

22“Heirou nangni yaopa heirouwei anyaokhi, khmeirei yaokhi, heirou uklhoprei yaokhi, khrilrangei yaokhi, heirou mathin msurkhi, heirou makal khintamle, heirou heirapya lhomphopna yaokhi heirou thyarei pheikhnangei yaokhi kamloulak; ngamri yaopa heiri Puwatlhou tounanungei malan putkhat. 23Heirouri mumtol mtum khatle heirou shirekle mankonbini ngouminkur mumtol pak khatkhi, heirou Umpuei maibongra malanthutkur bungkarei phri sikmak mumtol pak khatkhi loumarshiklak. 24Heitoubi nangni heirapya namma Aaronyei hutrale aiyei cha napawa rapbei hutra malanlhakbini, heitoubi yaya Umpuei maibongra ngaaklhakbi makatkur khrumna putnakni thinglhakyerlak. 25Heirou nangni putrap heiwaya yai hutrouwei heilouthutbini, heitoubi khrahpal doura khoubini Umpuei maibongra malung pilyerkna khrim muiknam khrumnaput khoini meira hongbini Umpunungei makatlak.

26“Heitoubi nangni Aaron'yei makatna yaopayei malungpakrei seramma ansiruk aatloubini, heitoubi Umpuei maibongra thinglhakbi malanlhakur khrumnaput khoini makatlak; ngamri heiyei anlhangse heiwari neiyei siruk hoirou. 27Heirou nangni khrumnaput khoiyei makatkur yaopa malungpakrei serammale pheikhnangrei seramma kanthraikur heiwari Aaronyei sirukle aiyei chanapawa rapbei sirukrap heiri laini marthingthutlak. 28Heitoubi heiyei seramma rap heiri klui naimakni Israel rapbei hangra Aaron'le aiyei cha napawa rapbei siruk hoiyerrou da; kouweiyo toulanungri, heiwari Umpunungei malankur khrumnaput, heirou khrumnaput heiwari Israellei chanao rapbei malung damyerna khrumnaput khoini Umpu'nungei makatkur khrumnaput.

29“Heirou Aaronyei khyingei shambrap heiri aiyei hillei hungrou kyou chanao rapnungeikhi hoirou; heiyanungri yayakhi shambrap heiwaya bangbini shirek fnalpibi Puwatlhoura bom lhakpi kya. 30Kouweiyo toulanungri, aiyei chanapawa rapbei hangrouwei khatni aiyei rungkhlangra Suipipu khat hoiyeinung ani khulbung kartilna khuiluphi Pucheem rilla Khying bomra wachangei kalnung shamb heiri tlaini eninibil bangbini wachang yarou.

Suipipu Rapbei Murchak:

31“Heirou neiyei makatkur yaopa heiya louheibini, heitoubi heiyei anlhangse heiri khyingei bira butminlak. 32Heirou Aaron'le aiyei cha napawa rapni yaopa heiyei anchumya mairou, heitoubi khulbung kartilna khuiluphi cheemmei shumtrumra dunkhoukur bungkarei klei mumtolkhi shairou da. 33Heisitoubine yaya khaithutnanungei heirou marthingnanungei makatkur lhukthutpina putlamrap heiwaya yani chamairou; heiya thimi deineri heirapya chamainungei yamakrou, ngamri heirapri khyingei chamai putrap. 34Heirou kounakpi seramma thraithutkur anchum nimanung mumtol tha ningshun phani maleikur hoiyanungri, heirapyari nangni chamaimakrou da, heiya meira hongurou da; ngamri heirapri khyingei putlamthil.

35“Heisitoubi nangni Aaron'le aiyei cha napawa rapya, Keine neinungei chay piwurkhou hilthungni toupirou da; nangni yaya tlaini eninibil marthingthutpinei lhouya toupirou da. 36Heirou tlainiserrei nangni borh'rouwei lhukthutpina khrumna put khoini halpa khat-khat makatrou da; lhukthutpinei malan putya makatbini khrahpalya marthingthutlak; heitoubi nangni shirekkhi teipibi marthingthutrou da. 37Heirou tlaini eninibil nangni lhukthutpinei malanput makatnei Puwatlhou toupirou da; heiyanungri khrahpal heiwari yerrouwei hyingdui hoirouwa; heirou khrahpalya wapalkur'mkhei marthing hoirou.

38 # Msh 28.3-10. “Asinungri nangni khrahpal doura makatnungei putlam rapri: Tlainiserrou kumkhat phakur yaoshun khintamtam karholni makatrou da. 39Heirou yaoshun khatchari nangni ningshunyei kheenrou makatrou da; heitoubi khatri nangni rawaiyei kheenrou makatrou da. 40Heirou yamkun lhangai krungkok khatle Olive shirek krungkok tungka khatle'mshung khat konmnuibini, heitoubi darkha yuile toubi mongnungei makatput khoini lamkri yaoshunle kalhonni makatrou da. 41Heirou nangni khintam tlung yaoshun khatyari rawainung makatlak; heitoubi heiyei makat putkhi ningshunyei makatnaksini, trunwaiyei lung raple, darkha yuile mankonbini, Umpuya pilyerkna khrim muiknam khrumnaput khoini meira hongbini makatlak. 42Heiwari neiyei yu-cha rapbei chaan ramphani khulbung kartilna khuiluphi cheemmei shumtrumra meira hongbini makatkur khrumna put khoini Umpuei maibongra kalleng-kallengni makatrou da; bi heitamrou Keine neiya murilbi neinungei tlou kallangrillou. 43Heirou Keine bi heitamrou Israellei chanao rapkou murilbini, heitoubi Keiyei thang'alni bi heitamrou yaya marthingthutpirou. 44Heirou Keine khulbung kartilna khuiluphi cheemle, heiyei khrahpal heikhi marthingthutpirou; Keine Aaron'le aiyei cha napawa rapyakhi Suipipurap khoini Keinungei watlhou tounanungei marthingthutpirou. 45Heitoubi Keine Israellei chanao rapbei hangra thrungbini, heirou yaiyei Dunpu khoini leipiroume. 46Heirouri Keiri yaya Egyptbei ram'rouwei ruithutpikur yaiyei Dunpu Umpume touri yani murouwa; heitoubi Keine yaihangra thrungrouwa, ngamri Keiri yaiyei Dunpu Umpu.”

Currently Selected:

HOYOUNA 29: MARIBSI

Highlight

Copy