HOYOUNA 28

Suipipu Rapbei Yrengnungei Shamb'rap:

(Hoy 39.1-39)

1“Heitoubi nangni neiyei 'tei Aaron'ya aiyei chanapawa raple kalhonni Israel thimi raprouwei ungthutloubini, Suipipu rapbei lhoubomra Keiyei Puwatlhou tounanungei keinungei heiruilhakpilak; Aaron'le aiyei chanapawa- Nadab'le, Abihu'le, Eleazar heirou Ithamar yayakhi yaoyerlak. 2Heitoubi nangni neiyei 'tei Aaron'nung khyingei shamb rapkhi marshikpirou da; heirapni aya rikrai khrumknayei thang'al hoiyerrou. 3Heinaksi lhoura Keine hutsa kheiyei roushing lhakpikur thimirap nammaya nangni shunlak, touri yani Aaron'nungei shamb rapya sheem'marshikbikhi, heirou aya makatthutbi, heirou ani Suipipu khat khoini Keiya watlhou toupilaksu. 4Heirou yai sheem'marshiknungei shamb rapri: Malungpak'khang khat, ephod touri rillei linglik khat, linglikchul khat, linglik bungrang khat, lingkhangphi khat heirou shintlak kaina shangthing phi khat yaorou da; heisitoubi yani nei'tei Aaron'le aiyei chanapawa rapnungkhi khyingei shamb rapya sheem'marshikpirou da; heitoubi yani Suipipu khat khoini keinungei Puwatlhou toupirou.

5“Heitoubi yani shamb rapya sheem marshikyeinang, sinayei kimle, mraotrong kimle, khmongdup heirou mrao phaikhringphi yekbini sheemrou da.”

6 # Hoy 39.2-7. “Heitoubi yani ephod linglik khatkhi sinayei kimle, khmongdup kimle, mraosot kim heirou mrao kimyei phaikhringni manlehbini hutsa khei thimi rapni lhangaidui mansambangbi sheemrou da. 7Heitoubi linglik heiwari khlabang thyoi-thyara rui khintamni hil-maibong khintamra suimandokrou da; heitoubi rui heine thyoi-thyara suiphoprillou da. 8Heitoubi shintlakra kainanungei shangthing phikhi heinakrimni, sinayei kimle, khmongdup kimle, mraosot kimle heirou mrao kimyei phaikhring manlehbini hut changni karbilni yekbini sheemrou da. 9Heirou nangni Onyx thlungkwaar khintam loubini, heitoubi heirapbei doura Israel chanao rapbei min rapya yemkhaklhakbi mayelhakrou da. 10Thlung khatra yaiyei min thruktam mayelak, heitoubi maleithungkur minlam khyumtam heiwari thlung khatra, yai puknarei upa thangsil knaini yemkhaklhakbi mayelhakrou da. 11Heitoubi sina sa thimine hutshi yemkhaklhakbi mansam'naksini nangi thlung khintamei doura Israel chanao rapbei min rapya upa thangsil knaini yenkhaklhaklak, heitoubi heirapya nangni sina parruini karhilni mansamkoollak. 12Heirou nangni thlung khintam heiri Ephod khlabang kaina rui khintamei doura thruibanglak, thlungrap heine Israellei chanao rapbei minlam rapya ningthutnabom hoirou da. Heisitoubi Aaron'ne Umpuei maibongra wachangeinang yaimin rapya aiyei khlabang khintamra urbini yaya ningthutkna hoinarou. 13Heitoubi nangni sinayei ruikhi sheemlak; 14heitoubi sina khyingni ruifret'naksini pherbini khintam sheemthutlak, heitoubi mharkur sina ruifretrap heikhi linglik doura mansambaangrou da.”

Malungpak Khaangna:

15 # Hoy 39.8-21. “Heitoubi pichar touyei naanungei malungpak khaangna khat hutsa khei thimiya lhangai-karbilni nangni sayerrou da; heiwakhi Ephod linglik thruinaksini hutsa karbilni, sinayei kimle, khmongdup kimle, mraosot kimle heirou mrao kimyei phaikhringni lhangaini manlehbi nangni sayerrou da. 16Malungpak khangna heiwari homrakhi heirou dungrakhi pak malnayerrou da; heitoubi tho khni thiklhepbini marthorou da; heirou aiyei homrakhi hutmainam khyumtam pakyerrou da, heitoubi heiyei dungrakhi hutmainam khyumtam shaangyerrou da. 17Heitoubi nangni heiyei doura thlungkwaar lingshang phalitam thutbaanglak; heirou lamkriyei lingshaang heiwari ruby'le topaz, heirou carbuncle thlungkwaar thutbaangrou da. 18Heitoubi khintam tlung lingshaangrani thlungkwaar emerald'le, saphire, heirou diamond thlungkwaar rapya thutbaangrou da; 19heirou lingshaang khyumtam tlungrani thlungkwaar jacinth'le, agate, heirou amethyst thlungkwaar rapya thutbaangrou da. 20Heitoubi phalitam tlung lingshaang dourani beryl thlungkwaar, Onyx heirou Jasper thlungkwaar rapya thutbaangrou da. Thlungrap heiri sina khrullei ruini thruibaangbini ruilimrou da. 21Heitoubi thlungrap heiri Israellei chanao rapbei minlam chiple khni hilthungni, thlung chiple khni loubini heiyei doura yaiyei phunghlam min khatsol hutshirei thlungnakni khaklhakbini sayerou da. 22Heirou nangni malungpak khaangna khatkhi sina khyingni ruifretnaksi mharbini khatkhi sheemrou da. 23Heitoubi nangni malungpak khangna heinungeikhi sinayei hutshi khintam khatkhi koolbini sheemlak; heitoubi hutshi khintam heiri malungpak khaangna msur thyoi-thyara thruibaangrou da. 24Heitoubi nangni malungpak khaangna msur khintamra thruibaangkur hutshi khintamra sinayei khrulrui khintam msuibaangrou da. 25Heirou thlungkwaar thutbaangna khintamra msuibangkur sina khrulrui khintamyei msur khintam heirapri khlabangrei yarsundanungei Ephod doura maibong lhangei thyoi-thyara nangni suimandokrou da. 26Heitoubi nangni sinayei hutshi khintam sheembini, heitoubi heirapya malungpak khaangna msur khintamra thruiphoprou da; heirapya Ephod'yei rilhangei msurra thruiphoprou da. 27Heitoubi nangni sinayei hutshi khintam khatkhi sheembi, heitoubi heirapya khlabangrei yarsundanungei Ephod mayura, maibong lhangei thruimaryomna bi knakni doura karhilni thruikalleirou da. 28Heirou malungpak khangna hutshi raple Ephodyei hutshi rapya khmongdup phairui khatni suiphoprillou da; heiyanungri malungpak khaangna heiwari Ephod'rouei lailongcha chulni kanthuithutbi leiyurmakrou. 29Heitoubi Aaron'ne Pucheem rilla Khyingei Bomra wachangei kaalnung, Israellei chanao rapbei min rapya Umpuei maibongra kalleng-kallengni ningthutnanungei khoini, picharyei malungpak khaangra mayebini malungpak lhangra manyarbi wachangrou da. 30Heitoubi nangni picharyei malungpak khaangna rilla Urimle Thummimkhi lhakrou da; heitoubi heirapri Aaron'ne Umpuei maibongra wachangei kaalnung aiyei malungpakra manyarrou da; heitoubi Aaron'ne Israellei chanao rapbei mral heiwari aiyei ukningra urlhakbi Umpuei maibongra kalleng-kallengni ningthutpirou da.”

31 # Hoy 39.22-26. “Heirou nangni Ephod sananungei phi heiwari namma khmongdupthil marshikrou da. 32Heitoubi Ephod heiwari dou lhangrei tlailamra lu thunthutnanungei purkhi khat touputrou da; heitoubi purputna heiwari linglik ngak kuinaksini cheetmaknanungei hutni lhangaidui ruilimrou da. 33Heitoubi nangni Ephod heiyei rim heiwakhi karbilni phai khmongduple, mraosot, heirou phai mrao kimni bohei'lha rapkhi thutbangrou da; heitoubi heirapbei tlak-tlakra sinayei tonshi rapkhi mankhanbi karbilni thutbangrou da. 34Heirou bohei lha khatle sinayei tonshi khat, heirou bohei lha khatle sinayei tonshi khat toubine tlak kantangra mankhanbini phirim karhilni msuibaangrou da. 35Heisitoubi Aaron'ne Puwatlhou touyeinung heiwaya naarou da; heirou ani Khyingei Bomra Umpuei maibongra wachang-wathuk touyei kallou, bohei lha raple tonshi rapni karsirilnei houya mayekpharou, heiyanungri ayari hiyermakrou.”

36 # Hoy 39.30,31. “Heirou nangni sina khyingei daarpang khatkhi sheemrou da; heitoubi heiyei dourei hutshira hutlha khaklhaknaksini khaklhakbini, ‘Umpuri Khying’ toubine mayelak. 37Heitoubi nangni heiwaya khmongdup phairuini ringbi murshum doura msuibanglak, heiwari murshum maibong lhangra msuibangyerrou da. 38Heitoubi heiwari Aaronyei lura makhuprou da; heiwari Israellei chanao rapni Puwatlhoura khyingei khrumna putya makatnara marmokur hoiyanungkhi Aaron ai'mshani mral namma urrou da; heisitoubi heiwaya Aaronyei lura kheenserou yarchabini leiyerrou, heiyanungri yayari Umpuei maibongra yapibi loulhakpirou.”

39 # Hoy 39.27-29. “Heitoubi nangkhi phaikhringei linglikchul bungrang khat yekrou da; heirou phaikhringei lingkhang phi khatkhi sheemrou da; heirou shintlak yitna kungoi'rei khatkhi hutni lhangaini yekbini thutbangrou da.”

40“Heirou nangni Aaron'yei cha napawa rapnungeikhi linglik chulrap sheempirou da; heirou nangni yanungei shintlak yitna kungoirei rapkhi yekyerrou da; heitoubi yani lhangaini heirou thang thukni kansamna'nungei nangni yanungei murshum lingkhang phikhi sheempirou da. 41Heitoubi heirapya nangni neiyei'tei Aaron'le aiyei chanapawa rapnungei bangpibi kansampirou da; heisitoubi nangni yaya shirek fnalphaangpibi, heirou yaya lhoubom lhakpibi makadthutpilak; heiyanungri yani keinungei Suipi purap khoini watlhou toubine leirou. 42Heitoubi nangni yai hyilnungei lingkham phi rapkhi yekyerrou da; heirapri yaiyei shintlak'rouweini pheikhnangbil yongdani yitkhalyerrou da. 43Heitoubi lingkham phirap heiri Aaron'le aiyei cha napawa rapni Khulbung kartilna Khuiluphi Pucheemra wachangei kaalnung, nimanung khyingei Pucheem rilla khrahpal maibongra wachangeinung yilbini wachangrou da; heisi nimaka'nungri yaitamni toumarmokbi hinanungei hoinarou. Chaylam awari Aaron aimsha'nungei'le aiyei hillei hungrou kyou yu-cha rapnungeikhi lakkhounungei yamakni chanthungnungei chaylam khat hoirou.”

Currently Selected:

HOYOUNA 28: MARIBSI

Highlight

Copy