HOYOUNA 23

Tharmuchim Pichar Heirou Kringpikhei:

1 # Hoy 20.16; 23.7; Khn 5.20; 19.15-21. “Nangni mandalbi pao tamnungei yamakrou; khril lhangaimak thimile malnabini chimmakna bomra tlou mayungnungei yamakrou. 2Nangni lhangaimak lhouya tounanungei thimichung hilla chanthungmakrou da; chim tloubomya mangyernanungei pichar bomra nani thimichung hil-chanthungbi tlou mayungnung yamakrou. 3#Lev 19.15. Kounakpi tlouthuk khatrou kanring thimi khatya kanringleime toubine minambi tlou yunnungei yamakrou.

4“Kounakpi nangni neiyei yeekna thimiyei halpa khat nimanung aiyei gadha khat kanwaiwurnarei karthanglanungri, nangni heiwaya halpuyei cheemra shuimakni yenhulmallengpirou da. 5Kounakpi neiyei machinbi klei thimi khatdei gadha khat putyumni nanphopbi kanthouchang'makni louklei nangni mulanungri, aitamya lakurkhoumakni nangni aya khulkanthoupirou da.

6“Neiyei teinao kanring thimi khatni tlouthuk khat heinung'tlim pichar bira tlou makatyeinung, kanring thimime toubi nangni ayari namsundapinung yamakrou. 7#Hoy 20.16; 23.1. Sowal khingbangbi tlou yunnara nangni yaothungmakni tlatni heikartleibi leithungurlak, heitoubi mral mak thimiya nimanung tharmu chim thimiyari hatmak; ngamri, hut mraokur thimi heiyari Keine leemni horkhoumakrou. 8#Khn 16.19. Heirou nangni tuy chanungei yamakrou; kouweiyo toulanungri, tuycha-lalchanei lhouri roushing klei thimiya mit deokyer, heirou tharmu chimmei tlouya holfletkyer.

9 # Hoy 22.21; Lev 19.33,34; Khn 27.19. “Heirou nangni ramtangbi klei miram-mithrillei thimi rapyakhi thuithini marhotnungei yamakrou; kouweiyo toulanungri, miramra ramtangbi klei thimi rapbei ukningri nanikhi kmu heiwariya, ngamri nakhi Egyptbei ramra ramtangbi leikhou thimithil.

Sabbath Kngaak Heirou Yai Paalna Ram:

10 # Lev 25.1-7. “Heirou nani naipaalna ram heiwari kum thrukbil trunwaiyei lung tuklhakbini truncha trunkmai yarou; 11heiya kum'eni tlungkur kum heirouri phailourap heiri trunmakni horwurou da; heiyanungri naihangrei kanring-kanwai thimi rapni truncha-trunmailaksu; heitoubi yani lakurkhou trunwai lungrap heiri ramhangrei yoocha-waacha rapni khulcha-khulmailaksu. Heinakrimni nani naiyei darkha yekulkhi, heirou Olive yekulrakhi horkhoupirou da.”

12 # Hoy 20.8-11; 31.15-17; 34.21; 35.2; Khn 5.12-15. “Heirou nani tlaini thrukni lhou churrou da, heitoubi enini tlung tlainirouri nani lhou churnarei karngarou da; heiyanungri naiyei halpa rapkhi heirou gadha rapkhi lhou churnarei karngayerrou da; heitoubi neicheemra puklhakur shok-napuiya rapbei chanao rapkhi lhou churnarei mathrilpharou. 13Asinungri Keine nanungei shunmatupikur tloubom kantangya nani mukheine toulaka; heirou dei thrai rapbei minkhi nani mintlangnungei yamakrou, heirou yaimin rapya naimurni mintlangbi mayekyernungkhi yamakrou.”

Kum Khatdei Kneitang Khyumtam

(Hoy 34.10-35; Khn 16.1-17)

14 # Hoy 34.22-24; Lev 23.1-44; Khn 16.1-17. “Nane kum khatrou Keinungei Kneitang khyumbuirek markhullou da. 15Nane ‘Phri sikmak mumtol shainei Kneitang’ khat markhullak; Keiyei chay pikur hilthungni, kartinkur tangla ‘Abib’ heiyei rilla nani phri sikmak mumtol shaibini tlaini eninibil Knei markhullak; kouweiyo toulanungri, nani heiyei tanglarou Egypt ramrei shalthutkur. Heitoubi thimi hukhatnikhi Keiyei maibongra hangwalni wachangnungei yamakrou. 16Heirou nani naiyei louyaora trunwaiyei lung wa'tlabini heiyei ‘Hutlha hei rapya luklhaknei Kneitang’ khatkhi markhullou da; heitoubi kumchaan hungtlungei kheenrou nani lourei ‘Trunwai lukchinei Kneitang’ khatkhi markhullou da. 17Kum khatrou naiyei napawa touwei'mkhei nammani Yerrouwei Choudui Umpu, naiyei Dunpuei maibongra khyumbuirek wachangbi khulbung kartillou da.”

18 # Hoy 12.10; 34.25; Lev 2.11; 7.15. “Nane keinungei makatkur khrumna put anheele, phri sikmak mumtolle markotbini makatmakrou da; heirou Keinungei Kneitang markhulnarei anyao heiwakhi ningshun nungwar phani maleiyernungei yamakrou.”

19 # Hoy 22.29; 34.26; Khn 26.2-11; 14.21. “Heirou nai lourei trunthutkur trunwai hutlha heirap lhangaiyame touya naiyei Umpu, Dunpuei Cheemra makatrou da.

“Nane tlangshun anya puiwiyei nuyuira butchoknungei yamakrou.”

Raal Manebi Ram Luknanungei Shunmatukur Chaylamrap

20“Thilak, naya lamtlunthung ngaksilpinanungei, heirou Keine marshikpikur ramra naya ruilhakpinanungei, Keine nai maibongra Thangring khat yenmalhetpirou. 21Nane aiyei maibongra mukheine chawalo, heitoubi aiyei shunpikur tlou rapya chanthunglak, heitoubi aya malungkhayermak; kouweiyo toulanungri, naiyei klalya ani kukpichangmakrou, ngamri Keiyei min heiwari yanungei klei.”

22“Heiya nani aiyei kyun tlouya chanthungbi, heirou Keiyei shunpikur heiwaya nani toulanungri, Keiri naya yeekna thimi rapbei yeekna hoirou, heitoubi naya yanimak thimi rapbei yanimak hoirou. 23Kouweiyo toulanungri, Keiyei Thangringni naiyei maibongra lam ruipibi, heirou naya Amoria rapbei, Canaania rapbei, Perizzia rapbei, heirou Jebusia rapbei ramra ruilhakpirou; heitoubi Keine ya nammaya tumni maangyerrou. 24Nane yaiyei thrailha rapya khrumnungei yamakrou, heirou yaiyei thrai watlhoukhi tounungei yamakrou; heitoubi yaiyei youkna lhou rapkhi touthungnungei yamakrou; heiya nani yaya maniwurbi namyerwa toumangurou da, heirou yaiyei lukbomrei thrailha rapkhi namma harhar dani umchaallhakurou da. 25Heiya nani naiyei Dunpu Umpuei watlhouya tourou da; heiyanungri naiyei chana-mainara, heirou naiyei nongnungei yuidingra Keine phor pirou; heirou Keine naihangrei kna'sa namma louthutpirou. 26Heirou nairam heirouwei hukhatnikhi chapuk-naopukeinung pukrulkur toukhi makrouwa, nimanung chanao pommakni khungkur toukhi makrou; nayari Keine naiyei rongchanya pulchini paalyerrou. 27Keine nai maibongra Keiyei chi'knaei shakrungya yenmalhetrou, heitoubi nani yentlaralkur thimi rapya tamungyerrou; heirou naya yeekna thimi rapya nairouwei mai khreiwurbi trukyerrou. 28Keine nai maibongra khuirui rapya lamkrini yenmalhetrou, heitoubi yani Hivia rapya, Canaania rapya, heirou Hittia rapya nai maibong'rouwei hulthutyerou. 29Yayari Keine nai maibong'rouwei kumkhatdei rillari hulthutmakrou; koungameiyo toulanungri, kumkhatrou yaya hulthutdurlanungri ram heiwari horwurbi, ramyaa rapkhi duini katchungurbi naya kontumrou. 30Nane ram heirouwei paalkaryoubongyen Keine yayari naiyei maibongrei thathacha hulthutyourou. 31Heirouri Keine nairam heiyei ri karchunna heiwari Mrao Samadru heirouweini Philistia Samadru waphani, heirou Ramthing'rouweini Euphrate Kungtang waphani hoiyerrouwa; kouweiyo toulanungri, ram heirouwei yuldabi louklei thimi rapyari Keine naihutra dayerrouwa; heitoubi nani yaya hulthutdurou. 32Nane yakou yarilbini tlou kantomrilnungei yamakrou, heirou yaiyei thrailha rapkoukhi ya'kril khounungei yamakrou. 33Heirou yayari nairamra leiyernungei yamakrou, nimanungri yani nayari Keiya karhani borhyei lhou touyerheirou; kouweiyo toulanungri, naiyei hora chaang kamkhounara honkhapburlame touri nani ningmulak.”

Currently Selected:

HOYOUNA 23: MARIBSI

Highlight

Copy