HOYOUNA 22

Kulyom Pichar:

1“Kounakpi napawa napung khatni halpa khat nimanung yaopa khat mumailoukur nimanung yormukur thukkanungri, halpa heiyei rungkhlangnung halpa phangatam heirou yaopa rungkhlangnung yaopa phalitam shingyerrou da. 2Kounakpi mucha thimini muchabi leiyei kalnung chanphabi, heirou aya manbini umhatlanungri, mucha thimiya umhatkur thimi heinungei mral makrou.

3“Heiya nungwarkur hillou mucha thimiya hatlanungri, aidoura thimi hatnei mral leirou da; heirou mucha thimini aiyei muchakur putchei rapya mallenglhakrou; kounakpi ani mallenglhaknungei koukhatkhi makkanungri, putchei heinung'tlim ai'mshaya nai khoini yorwurou da. 4Kounakpi aiyei muchakur putcheirap heiri aihutra khringni louklei chanphalanungri, halpa hoiyasu nimanung gadha hoiyasu nimanung yaopa hoiyasu, put heiyei siruk'khni ani mallengbi shingrou da.

5“Kounakpi napawa napung'khatni phailoura nimanung darkha yekulra hal silyeinung, ani aiyei halrul rapya napawa khatdei phailoura nimanung yekulra hul'lhakbi pishailanungri, ani aiyei namyerrouwei lhangai darkha yekulya pibini aiyei mralya rochakur kya.

6“Kounakpi ramhangra mei kaangyoubi heengna-ronara meithlan waipopbi phailourei markumkhou trunwai lungrapya, nimanung pukbi klei trunwai trung rapya nimanung phailoura klei trunwairap nammaya meini kaangtlumlanungri, mei shukaangyoukur thimi heiwani aiyei mral heinung'tlim rochabini trunwai puwanung mtikchani shingpirou da.

7 # Lev 5.14—6.7; Msh 5.5-8. “Kounakpi napawa napung'khatni aiyei cheemlhunyei hutra tuy nimanung putchei pilhakbi khouyerrei kalnung, putchei khouna cheemra mucha thimine changbi mulouheinarou, muchakur thimi heiwaya manlanungri, aya putchei heiyei siruk'khni duini mallengyerrou da. 8Kounakpi mucha thimiya manchangmakanungri, cheempu heiwaya pichar pu rapbei maibongra mayungyerbi tlou darrou, heitoubi aiyei cheemlhunyei putcheirap heiri aiyei hutne palbi muchakurko nimanung muchamako toubine tlou darthibi kantomyerrou da.

9“Koukou putchei rapya mucha theirilnarou, halya hoiyasu, gadhaya hoiyasu, yaoya hoiyasu, phirul-phishambya hoiyasu, nimanung koukou putchei mangurbi rkalrilbi, thimi napung khatni ‘Awari keiyei putme’ toubi kalphopbi heiyanungri, ya napung'khnirekpa picharpu rapbei maibongra wathukbini tlou makatkur kya; heirou picharpu rapni mral kleime toubi pichar dakur napawa heiwani putchei heiyei siruk'khni aiyei cheemlhun heiwanung mallenglhakpirou da.

10“Kounakpi napawa khatni aiyei cheemlhunnung aiyei gadha khat nimanung halpa khat nimanung yaopa khat, nimanung koukou ui-waa khat pibini dunyernarou, ui-waa heiri hikur nimanung touhyemkur nimanung hulthraokur thukkanungri; 11heirou yasiyei tlakra tlou luilhaknanungei toubine Umpuei maibongra tlou kantombi ui-waa dunpi thimi heiwani aiyei cheemlhunyei ui-waa heiri ‘Aihut'hakpani palmakme’ toubine shakhi tourilbi kantomrou da. Heiyanungri putpu heinekhi kantomkur heiwaya yarou da, heitoubi ani ui-waa heiri rungkhlang shingyermakrou da. 12Heiya ui-waa heiri aiyei cheemrei muloukurhakpa hoiyanungri, ui-waa heiyei pune aiyei cheemlhun heinungei ani put heiyei rungkhlang shingpirou da. 13Kounakpi ui-waa heiri hume yaatangni threlmaikur hoiyanungri, heiyei hutlha hoinanungei ani sraltang an-har khat khulthutlaksu; heiyanungri yaani threlmailounei rungkhlang ui-waa shingmakhi kya.

14“Heirou kounakpi napawa khatni aiyei cheemlhunrei koukou putchei khatya shalnungei louheibi, heirou put pu muthungmakni put heiri shuikur-ngamkur, nimanung hikur thukkanungri, putchei kwai thimi heiwani putchei heiyei manya mtikchani mallengpirou da. 15Kounakpi put pu kyaoni muthungbi putchei heine shuikur-ngamkur thukkanungri, heiyei rungkhlangri putchei khoini shingyerrou da; heiya putchei heiwari shalloukur hoiyanungri, shalnei manyatom piyerrou da.

Kulyomni Chanungei Lammit Heirou Tharmuei Lammitrap:

16 # Khn 22.28,29. “Heirou kounakpi napawa khatni miyei ngaimankhou nangaka khatya ibpiwurbi touchoplanungri, napawa heiwani nangaka heiwiya aiyei nu khoini loulhakrou da. 17Kounakpi nangaka heiyei pawani napawa heiwanung tekkhi pinimakur hoiyanungri, napawa heiwani nangaka khatdei shal dunyeinung urnungei manthunput changbomthuk namma heiri ani marshikbi pirou da.

18 # Lev 20.27; Khn 18.10. “Nangni lhangaimak thui-ur thimiyari khounungei yamakrou.

19 # Lev 18.23; 20.15,16; Khn 27.21. “Kounakpi thimine ui-waakou ipmalnakur yaowanungri, ayari hatrou da. 20Umpu'nungtom nimakni, deidei thrai rapnungkhi khrumna putya makatbi khrumkur thimi rapyari tlumni mangyerrou da. 21#Hoy 23.9; Lev 19.33,34; Khn 27.19. “Heirou nani miram-mithrillei thimi rapya klal da'kyer nimanung marhotpi toumakrou da; kouweiyo toulanungri, nakhi Egyptbei ramra miram-mithril thimirap khoini ramtangbi leikhou thimithil. 22#Khn 24.17. Nane trulmei rapya nimanung pui-pa mak saracha rapya thi'msitbini marhotpimakrou da. 23Kounakpi nani yaya kourou-kourou thuithini mareknapibi, heirou yani keinungei chapni shunchakur kheenrou, yaiyei shunchakur heiwaya Keine shuimakni ninglhakpirou; 24heirouri Keiyei malungkha heiwari meinakni kaangrou, heitoubi nayari Keine raalshonra hiyerrou; heirouri naiyei nu rapri trulmei hoirouwa, heitoubi naiyei chanao rapni puipa makur saracharap hoirouwa.

25 # Lev 25.36,37; Khn 23.19,20. “Kounakpi nangkou leimalkna Keiyei kanring-kanwai thimi rapnungei nangni tuy puknungei pithutlanungri, minungei tuy thangnungei pithut thimi khoini nangni tangchabini leiwurmak; heitoubi airouwei tuy khingduiyerbi thangyernungei yamak. 26Kounakpi nangni neiyei cheemlhunyei phi'up khat panthopnung loulhakkhou hoiyanungri, putchei heiwaya nangni Kinni yongchipbongnung anungei mallengpithurou da. 27Kouweiyo toulanungri, aiyei sharung hupkhalnanungei kleiri heitomngei; heichaya nangni louheillanungri ari kouya upbini iprou? Heirou asitoubi hungthukeinung, touri ani keinungei chapni shunchayei kheenrouri, Keine aiyei chapya ninglhakpirou, kouweiyo toulanungri, Keiri kringpikhei Pume.

28 # Pao 23.5. “Nangni Umpuya kansopibi manchonungei yamakrou; neiyei thimi rapbei doura ruipipu khoini klei upa rapyakhi manchonungei yamakrou.

29 # Hoy 23.16,19; Khn 26.2-11; Hoy 13.2,11-16. “Naiyei trunwai hutlha heikhi, heirou naiyei darkha hutlha heiyei yuikhi leiwangmakni(marsenmakni) Keinungei makatrou da.

“Naiyei cha napawa samran rapkhi nani Keinungei pirou da. 30Heinakrimni nangni neiyei halpakhi heirou neiyei yaokhi pirou da. Halshun nimanung yaoshun puklanungri, aiyei puile kalhonni tlaini enini leiyerbi, heitoubi tlaini chotni tlunganungri, nangni shun heichari Keinungei makatrou da.

31 # Hoy 19.6; Lev 11.44; 19.1; 7.24; 17.15. “Heiyanungri nangni Keiyei bomra khying thimi hoirouwa; ngam heineri nani ramhangra yaatang humeni threlmaikur sraltang anya mainungei yamakrou; heirapya nani uinungei khingpiwurou da.

Currently Selected:

HOYOUNA 22: MARIBSI

Highlight

Copy