HOYOUNA 21

Kulyomni Chanungei Lammitrap:

1“Awari nangni yanungei shunmatupi'nungei kulyomei lammitrap: 2#Lev 25.39-46; Khn 15.12-18. Nangni Hebrewa shok khat lolanungri, kum'thruk ani shok khoini watlhou tourou da, heiya kum'eni tlung heirouri aya klahmanri koukhi yaomakni malhetpirou da. 3Kounakpi a heine aitamtom hoiyanungri, aitamya malhetpirou da; heiya kounakpi a heiri nu-cha klei thimi khat hoiyanungri, aiyei nu-charap heikhi akou kalhonni malhetpirou da. 4Kounakpi aiyei cheempuni yanungei nu loubaangpikur hoiyanungri, aiyei nu heiwini anungei cha napawarap, heirou cha napuiya rapkhi puklanungri, aiyei nule aiyei chanaorap heiri aiyei cheempuei hoithungrou da, heitoubi a heiri aitamtom shalrou da. 5Heiya kounakpi shok heiwani chamni, ‘Keine keiyei cheempule keiyei nu-cha rapya malungshime, heineri keiri hangwalni shalnimakme,’ toubine yunlanungri; 6Heiyanungri, aiyei cheempuni ayari Dunpuei bomra ruilhakpirou, heitoubi Pucheemyei shumtrumbil heiruilhakbi, heirou shumtrum heeng pongra mayungyerbini aiyei cheempuni aiyei khnara thirmsuini shuputpirou, heitoubi ani aiyei cheempuei cheemra aiyei chaan khatrek watlhou toubine klei yarou.

7“Heirou napawa khatni aiyei cha'napuiya khatya shok khat khoini yorlanungri, a heiwiri shok napawa'naksini chanungei yamakrou. 8Kounakpi napuiya heiwini aya loloukur cheempu heiwani aiyei mit'thrilnara yanimak hoiyanungri, ani napuiya heiwiya mallengthutkur kya; heiya ani shok-napuiya heiwiya thinimakme toubi thuithini mareknabi, miram-mithrilnungei yorwurnei maniri makrou. 9Heirou kounakpi napawa heine napuiya heiwiya aiyei chanapawa heinungei nu khoini loubaangpirou dawanungri, napawa heiwani napuiya heiwiya aiyei cha napuiya naksini toupirou da. 10Kounakpi napawa heiwani napuiya deikhatya nu khoini loulhakrou dawanungkhi, napawa heine napuiya heiwiyei chanung-mainungkhi heirou phirul-phishambkhi thulpirou da; heitoubi nu-shal shangram khatdei chorit lamkhi rkhum tilrilmakni lakkhounungei yamakrou. 11Heirou kounakpi ani heinaksi lammit khyumtam heiwaya napuiya heiwinungei toupimakanungri, napuiya heiwiri koukhi klahman yaomakni hangwalni shaalrou da.

Touyemrilnei Leichuinei Lammitrap:

12 # Hoy 20.13; Lev 24.17; Khn 5.17; Mt 5.21. “Thimi hukounak khatni thimi khatya umbi, umkur thimi heiwani hiyanungri, ayakhi shuimakni hatrou da. 13#Msh 35.10-34; Khn 19.1-13; Jos 20.1-9. Heiya kounakpi napawa heiwani thimi khatya mrimbini hatdeise toubine umhatkur nimakni, heiya Dunpune raangbi aihutra hiyerkur hoiyanungri, heinaksi thimihat napawane kartleibi trukyulnanungei Keine neinungei bi khat khalthutpirou. 14Heiya kounakpi napawa napung'khatni aiyei cheemlhunrei thimi napung-khatya hatdeise toubine raangbi hatlanungri, heinaksi thimi heiyari Keiyei khrahpal birouwei ramphani taangthutloubini hatkurkhi kya.”

15“Heirou thimi hukounak khatni aiyei paya nimanung aiyei puiya hatlanungri, heinaksi thimi heiyari shuimakni hatrou da.”

16 # Khn 24.7. “Heitoubi thimi hukhatni thimi napung'khatya muni manlouheibi yorkur nimanung aihutra muni yulkhoulanungri, heinaksi yulkhou thimi heiyari shuimakni hatrou da.”

17 # Lev 20.9; Mt 15.4; Mk 7.10. “Heirou thimi hukhatni aiyei paya nimanung aiyei puiya manchollanungri, ayari shuimakni hatrou da.”

18“Heirou kounakpi thimi rapni kngaal'ok thukrilbini, heirou thimi napung'khatni khatpaya thlungni nimanung aiyei huttumni umkur hoiyanungri, thimi heiwani himakbikhi hyemwurbi rkhum doura leiyuranungri; 19kounakpi ani kna raiwurbi, cheishu suchabini kanthoubi karwaicha maniyanungri, aya umhyemkur thimi heiyari duinikhi klah dayernei tanti pimakbikhi, kna thimi heiwani kna bulyei maangkur kheen, heiyei yra'man heiwaya mallenglhakyerrou; heitoubi kna heikhi damkarbil'bongyen ani kna buldamyerrou da.”

20“Heirou thimi hukhatpani aiyei shok napawa khatya nimanung aiyei shok-napuiya khatya hutsuni umbi hatlanungri, ayakhi hatrou da. 21Kounakpi shok heine nungkhatnui nimanung khniniyei rilla himakanungri, ayari hatmakrou, ngamri shok heiri aiyei lolhakur putchei khatnaksi.”

22“Heirou napawa rapni khatle khat ngaalrilnarou, nao-ur napuiya khatya toushawurbini, nao rullurbi dakur thukkanungri, kounakpi napuiya heiwini khi-kna thukmanungkhi, miya umshapikur napawa heiwayari aiyei shal heiwani chuiyerkni bomra chuikyer yarou; heitoubi leichuina lammit heiri pichar pu rapni darilkur tlou hilthungni ani chuirou da. 23#Lev 24.19-20; Khn 19.21; Mt 5.38. Heiya kounakpi napuiya heiwini hillou hikur thukkanungri, thimi hatnei tanti heiri aiyei dourakhi dayerrou. 24Mitlungei khlang mitlung, haei khlang ha, hutdei khlang hut, heirou hoei khlangri honi lhakrou da. 25Mei shunei khlangri meini, umhemnei khlangri umhemrou; heirou shaat'hemnei khlangri shaat'hemrou da, 26Heirou kounakpi thimi khatni aiyei shok napawa nimanung aiyei shok-napuiya khatya mitlung paangkhat umdeokur thukkanungri, ani shok heiya mitlung deowurnei ngamrou leemni malhetpirou da. 27Heirou kounakpi napawa heine aiyei shok napawa nimanung aiyei shok-napuiya khatya ha umdeekkur thukkanungri, ani shok heiya ha deekkurnei ngamrou leemni malhetpirou da.”

28“Heirou kounakpi halpa khatni napawa khatya nimanung napuiya khatya shuhatkur thukkanungri, heinaksi halpa heiyari thlungni nanghatrou da; heiya aiyei anri mainungei yamakrou, heitoubi halpa heiyei pu heiyari koukhi leichuiyermakrou da. 29Kounakpi halpa heine haalnungkhi aiyei cheene thimiya kheihatdurbi, halpuyakhi pao shunbi lhangaini kulchalphopmakni, halpu heine lhou hoipimaknei ngamrou hanuikhi halpa heine napawa khatya nimanung napuiya khatya shuhatkur thukkanungri, halpa heiyari thlungni nanghatrou, heitoubi halpu heiyakhi hatrou da. 30Kounakpi halpu heiwani tuy pibini rochallanungri, aidoura dayerkur thimiman heiri mtikchani pibini aiyei rongchanya lhukrou da, 31Kounakpi halpa heine napawa khatdei chanapawa nimanung cha napuiya khatya shuhatlanungri, yanungeikhi heisibil leichuinei lammitrap hilthungni tourou da. 32Kounakpi halpa heine shok napawa khatya nimanung shokpuiya khatya shuhatlanungri, halpu heiwani shokyei cheempu heinungei kulshan tuy shekel somthum pirou da; heitoubi halpa heiyari thlungni nanghatrou da.”

33“Heirou napawa khatni khur yukna khat latputkhoubi, nimanung ani khur khat utyukkhoubi, heirou ani khur heiwaya khumna pingkhalmakni khounarou, halpa nimanung gadha khat dahatdanungri; 34khur heiyei puni halpa nimanung gadhayei pu heinungei halman mtikchani pirou da; heitoubi hikur halpa nimanung gadha heiri khur puwei hoirou da.”

35“Heirou kounakpi napawa napung'khatdei halpa khatni thimi napung'khatdei halpa khatya shuhatlanungri, halpu napung'khnine himak halpa heiwaya tuy khoini yorwurbi, heitoubi yarukhnine tuy heiri lhang-lhang yerkhairillou da; heitoubi hikur halpa heikhi yarukhnine lhang-lhang shatkhaibini yerrillou da. 36Nimanung, kounakpi halpa heiwani halnungkhi miyei halya shuhatkhoubi leinarou, halpu heiwani lhou hoipimakni kulchalphopbi khoumaknarou shuhatkur hoiyanungri, halpu heiwani shuimakni hal-khlang khoini singpirou da; heitoubi hikur halpa heiri aiyei khoini lourou da.”

Currently Selected:

HOYOUNA 21: MARIBSI

Highlight

Copy