HOYOUNA 2

Moses Puknei

1Kheen heirouri Lev cheemkhurrei napawa khatni, Leviyei cha'nyul khatya nu khoini loukur. 2#Pao 7.20; Heb 11.23. Heirouri napuiya heiwiri nao urbini, heitoubi chanapawa khat pukkurla; heirou naoshun heichari beimakni thang'lhangai naome touri ani muwurnarouri, naoshun heichaya ani tangla tlun'khyumbil muni yulkhoukur. 3Heiya ani naoshun heichaya kheen tlani yulkhouchang'makura; heitounei ngamrou ani chanreel trungrap thatloubini, nao lhakbini khupkhalnanungei toubi bungka khummalluk knai khat sabini, heitoubi heiyei rilla yui che'kalleimak'nungei toubi thleibulle khenai teifnalkur. Heitoubi heiyei rilla ani naoshun heichaya phneikur, heitoubi Nile Kungruira chanreel pukna hangra ani dunlhakurkhou. 4Heitoubi naoshun heichaei charwi upachani tlatnara heimayungbi naoshun heichaya kou thukkurleiyo toubi thikulkur. 5#Pao 7.21. Heirouri Pharaohyei cha nangaka heiwini aiyei shok-napuiya raple kalhonni Nile Kungruira hak chounungei yuchumkur; heirouri ani chanreel loutrungrap hangra louklei bungka heiya mulhakurla, heirouri ani aiyei shok-napuiya heiwinung heishunbi bungka heiya khulthutyerkur. 6Heirouri ani bungka heiya loulaatbini thinarouri, rilla naoshun khat loukyao ani mukur; heirouri thilak, naoshen napawacha heiri chapbini louklei. Heirouri ani naoshen heichaya kringkna pukkurbi asitoubi kyun, “Naoshencha ari Hebrew rapbei nao raprei khat louhoirou!” 7Heirouri naoshun heiyei charwini wachangbi Pharaohyei chawinung washun, “Keine hungbini, neinung'tlim naochaya chuchu pompinungei Hebrewa napuiya khatya hung'ungpiyeise; Heiyanungri ani neinungei naoshen heichaya pomtangpirou.” 8Heirouri Pharaohyei chawini yanungei loushun, “Heiyanungri hung'ungpilak.” Heisitoubi napuiya douwacha heine chanwurbi naoshen heiyei puiwiya hung'ungloukur. 9Heirouri Pharaohyei chawini yanungei loushun, “Naoshun achaya louheilaka, heitoubi nangni keinungei'tlim pomtangpilak; heirou Keine neiyei klahman mallengpirou.” Heisi toubine napuiya heiwini naoshen heichaya louheibini aya pomtangpikur. 10Heirouri naoshun heichari kat'tangura, heitoubi ani Pharaohyei chawinungei heiruiheikur; heisitoubi a heiri Pharaohyei chawiyei chanapawa hoikur. Heirouri ani nao heiyei min Moses#2.10: Heb-Mosheh. toubi thulpikur. “Ngamri ayari Keine yuirei khulthutme” toubi ani kyun.

11 # Pao 7.23; Heb 11.24. Kheen heirouri asitoubi hungthukkura, touri Mosesne kartlang katphakur heirouri, nungkhatnuiri ani heikuithutbi aiyei thimi rapni beimak klahni lhouchur-lhoupaangbi klei heiwaya thikulkur; heirouri Egyptbei lhousilla upa khatpani aiyei thimi Hebrewa napawa khatya beimak thuithini umphitbini louklei heiwaya ani mulhakur. 12#Pao 7.24. Heirouri ani thyoi-thyara kallekphabi thiphanarouri, aiyei pongra thimi hukhatkhi makleime toubi munarouri, Egyptbei napawa heiwaya ani umhatkur, heitoubi aya shitnrui hangra muni phorphumkur. 13Heirouri thangei tlainiroukhi ani heikuithutyei kheenroukhi, thilak, Hebrewa napawa napung'khnine khatle khat ngaalrilbi louklei karthangkur; heirouri ani kngaal waikyou napawa heinungei heishun, “Koutounei neiyei teinaowaya umpikurawo?” 14Heiya ani mallangbi loukyun, “Huni neiyari kaidoura pichar pu hoiyerkurro? Nangni Egyptbei napawaya hatkur heinaksini keiyakhi hanui hatthuroume touneiko?” Heirouri Moses'ne chiwurbi, “Lhouthuk heiwari mulhakurchila,” toubi ningchakur.

Moses'ne Midian'ra Trukyulkur

15 # Pao 7.29. Asinungri lhouthuk heiwari Pharaoh'ne mayeklhakwurla, heirouri ani Moses'ya hatnanungei raangura.

Heiya Mosesne Pharaoh'yei bom'rouwei trukkurbi, heirou Midian'yei ramra trukyulbi paalkur. Heirou nungkhatnuiri Moses'ne yuisoyei yuiphum paalla ombini louleiyeinang, 16kheen heirouri Midian'yei suipi puwaei cha'napuiyarap napung-enine yuisora wabini, yai pawaei yaorul rapya yui pimongnungei heenglhingra yui shukthimkur. 17Heiyei kheenrou yaosil thimi rapni wachangbi, heirou yaya hulthutloukur, heiya Moses'ne kanthoubi heirou yaya trungpikur, heirou yaorul rapyakhi yui pimongkur. 18Heirouri yani yaipawa Reuelnung yenkallengeinang ani loushun, “Koutounei nari angturi anak manmani yenkallengkurawo?” 19Heitounei Yane loumallang, “Egyptrei napawa napung khatni kayari yaosil thimi rapbei hutrei kalthutpikurme, heirou heiyakhi duini ani kanung'tlim yuikhi shukthutpibi heirou yaorul rapyakhi yui pimongkurme.” 20Heitounei aiyei chawi rapnung ani loukngai, “Heiyanungri napawa heiri kouranga? Koutounei nani napawa heiya lakurkhou? Aya wa'unglaklo, heiyanungri, akhi wabi mumtol thacha chamailaksu.” 21Heisitoubi Mosesne napawa heiyei pongra akou kalhonni leinikur, heirou anikhi Moses'nung aiyei chanapuiya Zipporahya nu khoini pikur. 22Heirouri ani Moses'nung chanapawa khat pukkur, heitoubi pawani aiyei min Gershom toubi thulpikur, ngamri ani kyun, “Keine miyei ramra puichabini ramtaangbi leiwurkhoula.”

23Heirou kumni heisi yenraalkur heirouri, Egyptbei Krungkhi hiyura. Heirou Israel douwa rapni minai khoini kleiri yaitam khal'rikraiyura, heitounei ngammei yani ungraochakur, heirouri yaya naibom'rouwei kalthutpinanungei ungraochakur heiwari Dunpunung ka'tlungura. 24#Pao 7.34. Heitounei ngammei yaiyei klah-mrimnei ungraochakur heiwari Dunpune loumayekpiwurla; heirouri Dunpune Abraham, Isaac heirou Jacob'nungei kantombi mardingpikhou tlou heiwaya Ane ningthutkur. 25Heisitoubi Dunpune Israellei chanao rapya mupibi, heirou Dunpune yaidoura thilhakpikur

Currently Selected:

HOYOUNA 2: MARIBSI

Highlight

Copy