HOYOUNA 3

Moses'ya Ungpikur:

1 # Hoy 6.2-13. Kheen heirouri Moses'ne aiyei puwa Midian'yei Suipipu Jethro'yei yaorul rapya silbi louklei; heirou ani yaorul rapya kulrel lhangrei ramthingra heihulheibini, Dunpuei Lhungdou Horebra wa'tlungkur. 2#Pao 7.30. Heirouri Umpuei Thangring khatni heeng'nbur khatra mei kaangna rillouwei anungei muyerkur; heirouri ani heisi thimanrenarouri, thilak, heeng nbur heiri meithlan heisi chokbi leiyanungkhi, nbur heiwari tekkhi kaangtlumkur naimak. 3Heitounei Mosesne kyun, “Asinungri keine pongra tonkarsilbi, kngak khat khoini meithlan kaangbinikhi, nbur heiwari tekchakhi kaangtlumkur naimakya koutouneiyo touri keine thirou dawa.” 4Heirouri Umpune ani thimanre'nungei pongra heikarnaklhakya loumunarouri, Dunpune nbur meiwairei aya ungbini loushun, “Moses, Moses!” Heitounei ani loumallang, “Kouweiyo, keiri bi arou leileime.” 5#Pao 7.33. Heirouri Ane shun, “Bi aei ponghakra knakni wachangmaka; neihorei khorkhangri yuklhukurlak, ngamri neiyei mayungna bi heiwari Khyingei bi.” 6#Mt 22.32; Mk 12.26; Lk 20.37; Pao 3.13; 7.32. Ane asitoubikhi shunthu, “Keiri neiyei patar rapbei touri Abraham, Isaac heirou Jacobei Dunpu.” Heirouri Mosesne aiyei mairung sikhuplhakbi yulkhoukur, ngamri Dunpuya ani chrungknani thiro-ngammakur.

7Heirouri Umpune shun, “Keiyei thimi rapni Egyptra klah-mrimni leikur heiwari tanghakni Keine muwurla, heirou yaidoura watlhousil pu rapni marhotpiwurnei ngamrou yaiyei ungraochakur houya Keine loumayekurla; kouweiyo toulanungri, yaiyei lahkurya Keine mubi thilhakpilei. 8Heitounei ngammei mantrangkur Egyptbei thimi rapbei hutrouwei yaya kalthutpinanungei Keine yongkurra; heitoubi ram heirouwei yaya ruithutloubini, thlei lhangaina ramra heirou ram maryanara urlhakbini, nushung yuile, khuining channa ramra, Canaania raple Hittia, Amoria, Perizzia, Hivia heirou Jebusia rapni paalbi leina ramra ruilhakpirouwa. 9Heirou asinung naneri, thilak, Israellei chanao rapbei ungraochanei hou heiri Keinungei ka'tlungura; heiya duinarakhi, Egyptbei thimi rapni yaidoura marhotbi, klah-mrimyerkur heiwakhi Keine mupiwurla.”

Mosesya Watkyil

10“Ngam heineri asinung nang hunglaka, Keine neiyari Pharaohyei leina bira yenyilrouwa, heirouri nangni Keiyei thimi Israel rapya Egypt'rouwei ruithutnanungei tourou da.” 11Heiya Mosesne Dunpunung loushun, “Pharaohyei pongra wachangbi, heirou Israellei chanao rapya Egypt'rouwei ruithutrou kyou thimi kei awari huwo touneiyo? Keineya koutou manirouwo?” 12Heirou Ane loushun, “Keine tanghakpani neiya kalhonpirou; heirou Keine neiya watkyilme toubi munanungnei hutlhari awane hoilaksu, touri nangni Israel rapya Egypt'rouwei yenruithutbi, Lhungdou atamrou nani Dunpuya khrumbini watlhou toulaklo.”

13Heirouri Mosesne Dunpunung loukyun, “Thilak, keine Israellei chanao rapnung hungbini, yanungei asitoubi shunrouwa, ‘Nai patar rapbei Dunpune keiyari nai leinara yenyillei.’ Heirouri yani keinungei, ‘Heiyanungri Aiyei minri kousi ung?’ toubine loungailanungri, keine yanungei koutoubi yunserou?” 14Heirouri Dunpune Mosesnung shun, “KEI touri KEI'HAKME,”#3.14: KEIME TOURI KEI. heirou Ane hanuikhi yenyunthu, “Nangni Israellei chanao rapnungei asitoubine shunpilak, ‘KEI'HAKME’ toubi min ung Heiwani keiyari nanungei yenyilpikurme!” 15Heiya duinarakhi Dunpune Mosesnung shun, “Israellei thimi rapnungei nangni asitoubine shunpilaka, ‘Nai patar'rap Abraham, Isaac heirou Jacobei Dunpu Umpune keiyari nai leinara yenyilpikurme. Awari Keiyei klui naimak minme; Awane thimi chaanserrou Keiyei min khoini ningthutrillou.’ 16Hunglaka, heitoubi Israellei thimi namyerwaya khumtillaka, heitoubi yanungei shunlak, Nai pawa rapbei touri Abraham, Isaac heirou Jacobei Dunpu, Umpune keinungei muyerbi, asitoubi shunpilei, ‘Tanghakpani Keine nayari yeelthipila, heirou Egyptra naidourei marhotpikur heiwaya Keine mupila. 17Heineri Keine shunkhoula, Keine nayari Egypt ramra klah-mrimni marhotpinarei ruithutloubini, Canaania, Hittia, Amoria, Perizzia, Hivia heirou Jebusia rapbei ram, nushung yuile khuining kanchirsundana ramra ruilhakpirouwa.’ 18Heirouri yani neiyei shun tlouya louninglhakbini, heitoubi nangni Israellei cheemkhur upa raple kalhonni Egypt Krungei leinara wachanglaka, heitoubi nangni yanungei asitoubi shunlaka ‘Hebrew rapbei Dunpu Umpune kaya muyerwurla; heineri asinung nani, kringpibi kaya ramthingra tlaini khyumni lam tlananungei malhetpilaklo, heitoubi kani bi heirou kaiyei Dunpu, Umpunungei khrumnaput makatdeise.’ 19Heiya Keine mulei touri Egyptbei Krungneri nayari kouniroukhi loumalhetmakrou, heiya namni malhetyerrou da. 20Heineri Keine Keiyei hut lamthutpirouwa, heitoubi Keiyei kngakei lhou raple kalhonni Egyptbei thimi rapbei doura tanti tourouwa, heitoulanungri ani nayari loumalhetpirou. 21Heirou Israellei thimi rapyari Keine Egyptbei thimi rapbei mit'thrilnara kringpikheiya phayerou, heirouri asitoubi hungthukheirou, touri nani shaalthutyei kaalnangri, hutdingni shaalmakrou. 22Heiya napuiya kantangni, ai'aiyei cheemlhunra, cheem kantangei napuiya kantangrei sina-lapaei shamb'rap, heirou phirul-phishamb rapkhi buphabini heitoubi heirapya nainaiyei chanao rapnungei nabaangpilak; heisitoubi nani Egyptbei thimi rapya mareknawurlak.”

Currently Selected:

HOYOUNA 3: MARIBSI

Highlight

Copy