HOYOUNA 14
14
Pharaoh'ne Israel Rapya Hulbini Chanthungkur:
1Heirouri Umpune Moses'nung shun: 2“Asinungri Israel rapya hil'lhangra kallengnanungei shunlaka, heitoubi Pi-ha-hiroth'yei maishuk lhangra wabini, Migdol heirou Samadruei tlakra, Baal-zephon'yei maibongra rungbom phunbini leiyerlaka; heitoubi nani Samadru ruira mai kallukrilni rungbomyei raalpalkhi sabaanglak. 3Kouweiyo toulanungri, Pharaoh'ne Israel rapbei ngamrou asitoubine yunheirouhui, touri ‘Yari biso naimakni lam tamungbini raancharouwa, ngamri ramthingra yai chananungei lamtlun kantangya tlathatdurchila.’ 4Heisitoubi Keine Pharaohyei ukning kalyerrou, heitoubi ani yaihilla chanthungrouwa. Heirou Pharaohle aiyei raallui rapbei ngamrou raal maninei Keiyari rikrai khrumrou; heirouri Egyptbei thimi rapni Keiri Umpuhakme toubine murouwa.” Heisitoubi yani lhou touwurkhou.
5Heirou Egyptbei Krungnungei, thimirap heiri trukurame toubine pao shunpikur heirouri, Pharaohle, aiyei thimi rapbei ukning hollurbi, heirou yani thimi rapya yanimakni, “Kane Israel rapya minai bom'rouwei dongyerwurbi malhetkur awari kouweiyo?” toubine kyun. 6Heitounei ani aiyei sapuk kaari rapya marshikbi, heitoubi aiyei raallui rapya ruilouheibini yaya chanthungkur. 7Heirouri ani sapuk kaari macha'thruk khalthutbi, heitoubi Egyptbei sapuk kaari'rap deikhi marshikbini, heitoubi heirapbei doura raallui rapkhi khatsol tungyerbini chanthungkur. 8#Pao 13.17. Heirou Umpune Egyptbei Krung Pharaohyei ukning kalyerkur, heitoubi Israellei thimi rapni aya thimi manthakhoumakni shaalthutkur heiwaya chanthungkur. 9Heirouri Egyptbei thimi rapni yaihilla chanthungbi Pharaohyei sapuk raple, sapuk kaari rapkhi, heirou aiyei thimi raple raalluirap nammale kalhonni yaya hulbini chanthungkur; heirouri yani Samadru ruirei, Pi-ha-hiroth pongra, Baal-zephonyei maishuk lhangra rungbom sheembini louleiyei kheenrou heichanphakur.
10Heirou Pharaoh'ne heikarnakyei kheenrouri, Israellei thimi rapni loukallekbi thinarouri, thilak, Egyptbei thimi rapni yaihilla heichanthungkur heiwaya yani loumuwurla; heirouri yani beimakni chiwura; heisi tounarouri Israellei thimi rapni Umpunung ungraochani shunchakur. 11Heirouri yani Mosesnung shun, “Awari Egyptra lhanbom makme tounei nangni kayari ramthingra hiyernanungei ruiloukurako? Kounungei nangni kayari Egyptrei ruithutloubini asitoubi mareknapikuro? 12#Hoy 16.3; 17.3. Kane Egyptra leiyeinang, ‘Kalimtamya horkhoulaka, heitoubi kani Egypt rapbei minai khoini leithungeise’ toubine neinungei kyunri awaya kyun nimakko? Kouweiyo toulanungri, kani ramthingra hilhakkurnung tlimri Egyptbei thimi rapbei minai khoini watlhou toukurni lhangaime.”
Samadru Lhangkhni Thukni Toukarkhaikur:
13Heiya Mosesne thimi rapya shun, “Nari chimaklo; heiya ukningra khraangni mayunglaklo; angtutou tlaini arouri Umpune nanungei touthutpirou kyou Ralthutpinei lhou heiwaya nani louthilak; kouweiyo toulanungri, angtu nani loumubi klei Egyptbei thimi rapya hillouri hanui kallengni mukhoumakarou. 14Umpune nanung'tlim raal kardoupirou, heineri nani koutloukhi yunmakni mulleiyalo.” 15Heirouri Umpune Mosesnung shun, “Koutounei nangni keinungei chapni ungraobi leikurawo? Heinung'tlimri Israellei thimi rapya maibong lhangra tontlaknanungei loushunlaklo. 16Heiya nangniri, neiyei cheishu katkhaangbi, heirou neihut heiwari Samadru doura lamthutlaka, heitoubi yui heiwari tlailamra khaibong lhang dayerlaka; heitoubi Israellei thimi rapya Samadru tlaira thlei taarna'doura chayerbini raalthutyerlaka. 17Heirouri thilak, Keine Egyptbei thimi rapya ukning kalyerwurbi, heirou yani Israel rapbei hilla heichanthungrou; heirouri Keine Pharaohle aiyei raallui rapbei doura, aiyei sapuk kaari rapbei doura heirou aiyei sapuk tung raallui rap nammaei dourakhi raal maninei thang'alya mutpirouwa. 18Heirou Keine Pharaohle aiyei sapuk kaari rapbei doura heirou aiyei sapuk'tung raallui rapbei doura maniwurnei thang'alya mutpikur heirouri Egyptbei thimi rapni Keiri Umpume toubine murouwa.”
19Heirouri Israel rapbei maibongra ruipikhou Dunpuei Thangringni heirou rameibur shutlai heiwani yai maibong'rouweini hil lhangra hungmayungbi leikur. 20Heirouri Egyptbei thimi rapbei rungbomle, Israel thimi rapbei rungbomyei tlakrari ramei'burni omkhalwurbi, kmehni khupkhalkur, heiya masanungri Israel rapnungri kwaarni yuk'alpikur; heisitoubi masantan thimi hukhatnikhi yailhangra wakarnakchangmakni masa raalthutkur.
21Heirouri Mosesne Samadru doura aiyei hut khangbaangkur; heirou Umpune masantan kulkung lhangrei martheetang yenthiyerbi, Samadrurei yui'nlaak heiwari tlailamra sakhaiwurbi, thleitaar holyerkur, heisitoubi yui heiwaya toukarkhaikur. 22Heirouri Israellei thimi rapni Samadru tlaira thlei taarna doura yaiyei honi chabi raalthutkur; heirou yuirap heiri yai thya lhangrakhi heirou yai thyoi lhangrakhi raapthang'naksini tonpungurbini leikur. 23Heirouri Egyptbei thimi rapnikhi, heirou Pharaohyei sapuk rapkhi, sapuk kaari rapkhi heirou sapuk'tung raallui rapnikhi yaihilla heichanthungbini Samadru tlaira yakhi wachangkur. 24Heirou ningshunnangri asitoubine thukkura, touri Umpune Egyptbei raallui rapbei doura rameibur shutlai'le meiyei shutlai rapya kalleini yukthrilkur; heitoubi Egyptbei raallui rapya tamungyerbi klah dayerkur. 25Heitoubi Umpune yaiyei sapuk kaariyei kalletna ho rapkhi touthalwurbi kallet yamaknarou yani chanthungchangmakur. Heitounei Egyptbei raallui rapni kyun, “Kane Israel rapbei maibongrouwei truklakase, kouweiyo toulanungri, Umpune yanungei'tlim Egyptbei raallui rapya karhani raal kardoukurame.”
26Heirouri Umpune Mosesnung shun, “Neiyei hut heiri Samadruei doura khangbaanglak, heisi toulanungri yuini yenha'lhakbini, Egyptbei raallui rapbei doura yaiyei sapuk kaari rapbei dourakhi, heirou sapuk'tung raallui rapyakhi yuini dumhatrouwa.” 27Heisitoubi Mosesne Samadruei doura aiyei hut khangbangkur; heitoubi nung katwaarkur heirouri, Egyptbei thimi rapni yuitlaira loutrukyei kaalnungri, Samadru heiyei yuini haallei'nakrimni yenkallengbi omthimkur; heisitoubi Umpune Egyptbei thimi rapya Samadru tlaira martlaohatkur. 28Heirou yuini yenkallenglhakbi, yaihilla chanthungnarouri yuitlaira wachangkur sapuk kaarirap heirou sapuk tung raalluirap, heirou Pharaohyei raalluirap nammakhi, khatchatomkhi maleithungyermakni yuini omdumkur. 29Heirou Israellei thimirap nammaniri Samadru rilla thlei taarna doura honi chabi ralthutkur; heirou yuini yaiyei thyoirakhi thyarakhi raapthangnakni katchoubaangbini leikur.
30Heisitoubi heiyei tlainirouri Umpune Israel rapya Egyptbei thimi rapbei hutrouwei kalpikur; heirou Egyptbei thimi rapni Samadru paalra khini martlaothutbi klei heiwaya Israel rapni mukur. 31Heirouri Israel rapni, Umpune Egyptbei thimi rapbei doura toupikur Toumaniyei Mantrang heiwaya mulhakur heirouri, thimi rapni Umpuya chikur, heirou yani Umpuya uklumkur, heitoubi Aiyei shikrui Moses'yakhi shunkningni chanthungkur.
Currently Selected:
HOYOUNA 14: MARIBSI
Highlight
Share
Copy
Want to have your highlights saved across all your devices? Sign up or sign in
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.
