HOYOUNA 1
1
Israel Rapya Egyptra Klah-Mrimni Marhotpikur:
1 #
Kan 46.8-27; Msh 26.4-50. Arapri Jacob'le kalhonni Egyptra yudakur aiyei chanapawa rapbei minlam: 2Reuben, Simeon, Lev heirou Judah; 3Issachar, Zebulun, heirou Benjamin; 4Dan, Naphtali, Gad heirou Asher. 5#Pao 7.14-18. Heisitoubi Jacobei bommairei yukur thimi mshingri nammani somretbil tlung, heiya Joseph'ri lamkrini Egyptra louleiyura. 6Heirouri Joseph hiyura; heirou aiyei teinao rapkhi heirou chaan heikaallei lingthralrap nammakhi hiwurchiya. 7Heiya Israelyei chanao rapri pung-shanbi, nungkhatnui'nuiyei thimi mshing katduilhakur; heitounei ngammei hutmantrang limkhat khoini kathukkur; heisitoubi yai leina ram heiwaya thimi paalkaryoukur.
8Kheen heirouri Josephya shak mumak Krung ran khatni Egyptbei Krungbomra paalyoukur. 9Heirouri ani aiyei thimi rapnung shun, “Thilak, Israellei chanao rapri mshingkhi heirou Mantrangna'rakhi kayari katduiyura. 10#Pao 7.19. Heineri kani yayari mukheine thilhakbi, heitoubi thuithini mareknawase, heinima'nungri, yani thimi mshingkhi heisi katchungduibi, raal tourilleinungkhi yani kaya yeekna thimi rapkou malnawurbini kaidoura raal dakurkhi kya, heitoubi kairam arouwei trukthutkurkhi kya.” 11Heisitoubi yani watlhousil Punungei thimi khalthutbini, Israelyei thimi rapya thilhakbi, yaidoura putkhrit lhou rapya nambini paangyerbi thuithini marhotpikur. Heisitoubi yani Pharaoh'yei lalthum marpeikhouna bi khoini Pithom'le Raamses (Rameses toubikhi ung) khukarthil khintam heirapya sabaangpikur. 12Heiya Israel thimi rapya thuithini marhotleiyen, yaiyei thimi mshingkhi katchungduilei, heirou yai paalna ramkhi duiduini heikaryoukur. Heitounei ngammei Egyptbei thimi rapni Israel rapyari duiduini chiwura. 13Heingammei Egyptbei thimi rapni Israel rapya thuithiyei khrit watlhou rapya churyerbini raakpikur. 14Heisitoubi yani Israel rapya putkhrit lhou rapya nanbaangbini thleibul mankonyerbi, heirou chiek seoyerbi sheemyerkur, heirou lou'lhoukhi limlim churyerbi beimak mrimni kulchalbi khoupikur.
15Heirouri Egyptbei Krungni naokal khoi napuiya rapbei hangrei Shiphrah toubi min ung khatpi'le heirou napuiya khatpiyei minri Puah toubine ung yakhuntaya shunmatukur. 16Heirou ani asitoubi kyun, “Nakhuntani Hebrewa napuiya rapbei nao puknara naokal khoini lhou touyeinang, nakhuntani thirobi, kounakpi naoshen heine napawa hoiyanungri, hatdurlak, heiya kounakpi naoshen heiri napuiya hoiyanungri, hatpimakni heisi khringni khoupilak.” 17Heiya naokal napuiya rapni Dunpuya chinei ngamrou, Egyptbei Krungni yanungei chay pibi shunkur hilthungni yani lhou toukhoumak; heiya naoshen heiri napawacha khoini puklanungkhi yayari hatpimakni khoukur. 18Heisi tounei ngamrou Egyptbei Krungni naokal napuiya rapya ungbini yaya shunkur, “Koutounei nani Keiyei shun tlouya hil-chanthungbi lhou toumakni, nao napawacha rapya hatmakni khringni khoukurro?” 19Heirouri naokal napuiya rapni Pharaohnung mallangbi loukyun, “Hebrewa napuiya rapri Egyptbei napuiya'naksi nimakleime, heiya yari beimakni khril lhangai; heitounei ngammei, naokal napuiya rapni chanpha'bongnung, naopuk waishangurbi louklei.” 20Heitounei ngammei Dunpune naokal napuiya rapya kringpikhei phayekur, heirou thimi rapkhi nungkhat'nuinuiyei mshing katchung'duibini beimakni mantranglhakur. 21Heisi toubine, naokal napuiya rapni Dunpuya chinei ngamrou, yaiyei cheemmai-bommai rapya karbilni paalyerpikur. 22Heirouri Pharaoh'ne aiyei thimirap nammaya chay piwurbi shun, “Hebrewa bommaira pukkur chanapawa toueimkheiri nani Nile Kungra khinglhakrou da, heiya nani napuicha toueimkheiri khinglhakpimakni khringni khoupirou da.”
Currently Selected:
HOYOUNA 1: MARIBSI
Highlight
Share
Copy
Want to have your highlights saved across all your devices? Sign up or sign in
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.
